ស្ពានបណ្ដោះអាសន្នឆ្លងទំនប់ទឹកចាក់ទឹម ដែលកាត់ផ្តាច់ដោយទឹកភ្លៀងកសាងរួចរាល់ហើយ
- កំពង់ឆ្នាំង
ប្រធានមន្ទីរទេសចរណ៍ខេត្តកំពង់ឆ្នាំង លោក សេង សាលី នៅព្រឹកថ្ងៃទី១២ ខែសីហា ឆ្នាំ២០២២នេះ បានបញ្ជាក់ថា
ខេត្តកំពង់ឆ្នាំង ៖ ប្រធានមន្ទីរទេសចរណ៍ខេត្តកំពង់ឆ្នាំង លោក សេង សាលី នៅព្រឹកថ្ងៃទី១២ ខែសីហា ឆ្នាំ២០២២នេះ បានបញ្ជាក់ថា ស្ពានបណ្ដោះអាសន្នឆ្លងកាត់ទំនប់ចាក់ទឹម ដែលត្រូវបានកាត់ផ្ដាច់ដោយសារទឹកជំនន់កាលពីពេលកន្លងទៅ បានកសាងរួចរាល់វិញហើយ លោកសូមអំពាវនាវដល់បងប្អូនដែលមានបំណងទៅកំសាន្ត នៅរមណីយដ្ឋានទឹកធ្លាក់ថ្មក្រាល អាចទៅលេងបានវិញហើយ តាមមធ្យោបាយរថយន្តប្រភេទ កូរ៉េ សាំយ៉ុង និងទេសចរណ៍ ។
លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំង បានឲ្យដឹងថា ក្រោយពេលរងគ្រោះជំនន់ទឹកភ្លៀង បណ្តាលឲ្យកាត់ផ្ដាច់ទំនប់ចាក់ទឹម មានប្រវែងប្រមាណជាង១០០ម៉ែត្រដែលមិនអាចធ្វើដំណើរបាន កាលនោះក្រសួងធនធានទឹក និងឧតុនិយម ក៏ដូចជាមន្ទីរ ព្រមទាំងអាជ្ញាធរ និងសហគមន៍បានរួមគ្នាកសាងស្ពានជាបណ្ដោះអាសន្នដែលអាចធ្វើដំណើរបានត្រឹមថ្មើរជើង និងម៉ូតូ ប៉ុន្តែក្រោយមកក៏បានកែប្រែថែមជើងសសរបុកគ្រឹះ ពង្រឹងគុណភាពស្ពានឲ្យរឹងមាំជាងមុន រហូតដល់ពេលនេះស្ពានឆ្លងកាត់ចំណុចដាច់នោះ ត្រូវបានតភ្ជាប់វិញហើយ អាចឲ្យរថយន្ដធន់កូរ៉េ រថយន្ត សាំយ៉ុង និងរថយន្តពន្ធទេសចរណ៍ អាចធ្វើដំណើរបាន ហេតុនេះលោកសូមអំពាវនាវដល់បងប្អូនប្រជាពលរដ្ឋដែលមានបំណងទៅលេងកម្សាន្តនៅរមណីយដ្ឋានទឹកធ្លាក់ថ្មក្រាល អាចធ្វើដំណើរទៅបានវិញហើយ សម្រាប់ថ្ងៃចុងសប្តាហ៍នេះ និងថ្ងៃបុណ្យទានខាងមុខ។
សូមរំលឹកថា ទំនប់ចាក់ទឹម ដែលស្ថិតនៅក្នុងភូមិកោះខ្ទុម ឃុំជៀប ស្រុកទឹកផុស គឺជាទំនប់ស្ទាក់ទឹកផង ជាផ្លូវធ្វើដំណើរទៅកាន់រមណីយដ្ឋានទឹកធ្លាក់ថ្មក្រាលផង ត្រូវបានកាត់ផ្ដាច់ ដោយសារទឹកជំនន់ កាលពីរំលងអធ្រាត្រឈានចូលថ្ងៃទី២០ ខែកក្កដា ឆ្នាំ២០២២ ។ ក្រោយទំនប់បានកាត់ផ្ដាច់ទាំងស្រុង និងមានមុខទឹកធំដល់ទៅជាង១០០ម៉ែត្រ ការធ្វើដំណើររបស់បងប្អូនប្រជាពលរដ្ឋជួបការលំបាកយ៉ាងខ្លាំង ជាពិសេសតំបន់រមណីយដ្ឋានទឹកធ្លាក់ថ្មក្រាល ត្រូវបានកាត់ផ្ដាច់ដោយពុំអាចធ្វើដំណើរបានឡើយ ។
ក្នុងស្ថានភាពបែបនេះ ទាំងក្រសួង ទាំងមន្ទីរជំនាញ ក៏ដូចជាបងប្អូនប្រជាពលរដ្ឋ សហគមន៍និងអាជ្ញាធរ ខិតខំកសាងស្ពានធ្វើដំណើរជាបណ្ដោះអាសន្នរហូតបានសម្រេច បើទោះបីមិនដូចទំនប់ដែលជាផ្លូវធ្វើដំណើរឡើងវិញក្តី ក៏អាចធ្វើដំណើរជាបណ្ដោះអាសន្នលើស្ពានថ្មីនេះ បានដែរ ៕
ចែករំលែកព័តមាននេះ