ផ្លូវការ! World Cup 2022 នឹងត្រូវចាប់ផ្តើមការប្រកួតមុនពេលកំណត់
កាតា ៖ សហព័ន្ធបាល់ទាត់ពិភពលោក (FIFA) កាលពីថ្ងៃទី១១ ខែសីហា ឆ្នាំ២០២២ បានសម្រេចជា
កាតា ៖ សហព័ន្ធបាល់ទាត់ពិភពលោក (FIFA) កាលពីថ្ងៃទី១១ ខែសីហា ឆ្នាំ២០២២ បានសម្រេចជាផ្លូវការថា ការប្រកួតព្រឹត្តិការណ៍ World Cup 2022 នឹងត្រូវចាប់ផ្តើមមុនថ្ងៃកំណត់ ពោល១ថ្ងៃមុនការគ្រោងទុក នៅថ្ងៃទី២០ ខែវិច្ឆិកា ឆ្នាំ ២០២២ ដើម្បីអនុញ្ញាតឱ្យម្ចាស់ផ្ទះកាតាធ្វើការប្រកួតមុនគេ។
ដើមឡើយ ព្រឹត្តិការណ៍ World Cup 2022 គ្រោងនឹងចាប់ផ្តើមការប្រកួតរបស់ខ្លួន ចាប់ពីថ្ងៃទី២១ ខែវិច្ឆិកា រហូតដល់ថ្ងៃទី១៨ ខែធ្នូ ដែលជាថ្ងៃប្រកួតផ្តាច់ព្រ័ត្រ។ ដោយនៅថ្ងៃបើកឆាក មានការប្រកួតរហូតដល់៤គូ នៅក្នុងពូល A និង B។ ការប្រកួតរវាងសេណេហ្គាល់ នឹងហូឡង់នៅក្នុងពូល A ត្រូវធ្វើឡើងមុនគេបង្អស់។ ហើយ៦ម៉ោងបន្ទាប់ ទើបចាប់ផ្តើមការប្រកួតរវាងម្ចាស់ផ្ទះកាតា នឹងអេក្វាឌ័រក្នុងពូលដដែលនេះ។
ប៉ុន្តែទោះជាយ៉ាងណា FIFA បានសម្រេចធ្វើការផ្លាស់ប្តូរកាលបរិច្ឆេទការប្រកួតរវាងកាតា និងអេក្វាឌ័រ ដោយត្រូវរៀបចំមុន១ថ្ងៃ។ ដោយធ្វើតាមការពិភាក្សាជាមួយប្រទេសទាំង២ និងទទួលបានសំណើពីសហព័ន្ធអាមេរិកខាងត្បូង CONMEBOL ជាមួយអំណះអំណាងយល់ឃើញថាវាពិតស័ក្តិសមបំផុតនឹងប្រពៃណីដែលម្ចាស់ផ្ទះ ត្រូវធ្វើការប្រកួតបើកឆាកមុនគេបង្អស់។
ដូច្នេះមានន័យថា ការប្រកួតរវាងម្ចាស់ផ្ទះកាតា នឹងអេក្វាឌ័រ នឹងក្លាយជាការប្រកួតបើកឆាកព្រឹត្តិការណ៍ World Cup 2022 ដែលនឹងត្រូវធ្វើឡើងនៅថ្ងៃទី២០ ខែវិច្ឆិកា ឆ្នាំ២០២២ នៅឯកីឡដ្ឋាន Al Bayt វេលាម៉ោង ១១:០០នាទីយប់ (ម៉ោងនៅកម្ពុជា)៕ (ប្រភពពី BBC)
ចែករំលែកព័តមាននេះ