ក្រោយពីប្រជាពលរដ្ឋបានលើកឡើងពីផលលំបាកនៃផ្លូវមួយខ្សែ ដែលកំពុងធ្វើការស្ថាបនាចាប់ពីភូមិចក សង្កាត់ព្រះពន្លា ទៅសង្កាត់ភ្នៀត ត្រង់ចំណុច
ខេត្តបន្ទាយមានជ័យ ៖ ក្រោយពីប្រជាពលរដ្ឋបានលើកឡើងពីផលលំបាកនៃផ្លូវមួយខ្សែ ដែលកំពុងធ្វើការស្ថាបនាចាប់ពីភូមិចក សង្កាត់ព្រះពន្លា ទៅសង្កាត់ភ្នៀត ត្រង់ចំណុចបុរីឈើយ ចាន់ណា ទៅភូមិកន្ទួត សង្កាត់ភ្នៀត ក្រុងសិរីសោភ័ណ ដែលមានប្រវែងជាង៨០០ម៉ែត្រ ពិបាកខ្លាំងក្នុងការធ្វើដំណើរនៅពេលមានភ្លៀងម្តងៗនោះ នៅរសៀលថ្ងៃទី១០ ខែសីហា ឆ្នាំ២០២២ អាជ្ញាធរក្រុងសិរីសោភ័ណ បានយកថ្មមិចទៅចាក់ក្រាលជាបណ្តោះអាសន្ន ដើម្បីជួយសម្រួលដល់ការធ្វើដំណើរ ។
លោក ហ៊ឹល រ៉ាយ៉ា អភិបាលក្រុងសិរីសោភ័ណ ក៏សុំការយោគយល់អធ្យាស្រ័យពីសំណាក់បងប្អូនប្រជាពលរដ្ឋ ចំពោះភាពយឺតយ៉ាវនៃដំណើរការស្ថាបនាផ្លូវខាងលើ ដោយសារផ្លូវនេះខាងក្រុមហ៊ុនកំពុងធ្វើការសិក្សាបន្ថែម ដោយត្រូវបន្ថែមគ្រឹះកម្ពស់១ម៉ែត្រឲ្យខ្ពស់ជាងនីវូ៉ទឹក ដើម្បីបញ្ចៀសការជន់លិចផ្លូវនារដូវទឹកជំនន់ ។
ដូច្នេះហើយ ទើបការស្ថាបនាមានការយឺតយ៉ាវប៉ុន្តែជាការឆ្លើយតប អាជ្ញាធរបានជំរុញឲ្យក្រុមហ៊ុនចាក់ក្រាលថ្មមិចជាបណ្តោះអាសន្នសិន ។ មួយវិញទៀត លោកអភិបាលក្រុងសិរីសោភ័ណ ក៏បានធ្វើការជូនដំណឹងផងដែរចំពោះបងប្អូនពលរដ្ឋស់នៅក្នុងសង្កាត់កោះពងសត្វ ដែលត្រូវធ្វើដំណើរទៅក្នុងក្រុង សូមប្រើប្រាស់ផ្លូវសង្កាត់ភ្នៀតជាបណ្តោះអាសន្នសិន ដោយផ្លូវពីសង្កាត់ព្រះពន្លាទៅសង្កាត់កោះពងសត្វ ក្រុមហ៊ុនម៉ៅការ នឹងចាប់ផ្តើមស្ថាបនាក្នុងពេលឆាប់ៗខាងមុខនេះ ។ ដូច្នេះក្នុងនាមអាជ្ញាធរ សូមបងប្អូនប្រជាពលរដ្ឋមេត្តាយោគយល់ និងអធ្យាស្រ័យចំពោះភាពយឺតយ៉ាវនេះ ។
សូមបញ្ជាក់ថា ផ្លូវដែលតភ្ជាប់ពីភូមិចក សង្កាត់ព្រះពន្លា ទៅភូមិបង្រុះ សង្កាត់ភ្នៀត ត្រូវបានអាជ្ញាធរខេត្តលើកជាគម្រោងផ្លូវក្រាលកៅស៊ូ ដែលមានប្រវែងប្រមាណ១៣គីឡូម៉ែត្រ។
បច្ចុប្បន្ន គម្រោងបានចាប់ផ្តើមក្រាលកៅស៊ូជាបណ្តើរៗហើយ នៅសល់ចំណុចមួយចំនួនដែលត្រូវការសិក្សាក្រាលបន្ថែមគ្រឹះ ដើម្បីឲ្យផ្លូវមានគុណភាពរឹងមាំ ប្រើប្រាស់បានយូរអង្វែង ៕
ចែករំលែកព័តមាននេះ