កាយសម្ព័ន្ធសង្ឃឹមបានមេដាយពីការប្រកួតជើងឯកអាស៊ី លើកទី៧ នៅថៃ
- ភ្នំពេញ
រាជធានីភ្នំពេញ ៖ កីឡាកាយសម្ព័ន្ធនឹងចេញទៅប្រកួតជើងឯកអាស៊ីឆ្នាំ២០២២ (7th AEROBIC
រាជធានីភ្នំពេញ ៖ កីឡាកាយសម្ព័ន្ធនឹងចេញទៅប្រកួតជើងឯកអាស៊ីឆ្នាំ២០២២ (7th AEROBIC GYMNASTICS ASIAN CHAMPIONSHIPS) នៅប្រទេសថៃ នាចុងខែនេះ។ ការប្រកួតនឹងចាប់ផ្ដើមពីថ្ងៃទី៣១ សីហា ដល់ថ្ងៃទី៦កញ្ញា។
លោក ណយ ផាន់ណា អគ្គលេខាធិការសហព័ន្ធកីឡាកាយសម្ព័ន្ធកម្ពុជាបានឲ្យដឹងថា ក្នុងទិសដៅរបស់សហព័ន្ធត្រូវតែយកឲ្យបាននូវមេដាយណាមួយសម្រាប់ព្រឹត្តិការណ៍ខាងលើ ដើម្បីមុខមាត់ប្រទេសជាតិ បើទោះប្រទេសចូលរួមសុទ្ធតែខ្លាំងៗក៏ដោយ ។ ការចេញទៅប្រកួតក្នុងព្រឹត្តិការណ៍
អន្តរជាតិគឺជារឿងចាំបាច់ខ្លាំងបំផុតសម្រាប់កីឡាករកីឡាការិនីកាយសម្ព័ន្ធកម្ពុជា ដើម្បីវាស់ស្ទង់សមត្ថភាពសម្រាប់កំណត់ទិសដៅក្នុងការត្រៀមខ្លួនឲ្យបានកម្រិតខ្ពស់សម្រាប់ស៊ីហ្គេមឆ្នាំ២០២៣ដែលកម្ពុជាធ្វើជាម្ចាស់ផ្ទះ។
លោកបន្ដថា វាពិតជាកត្តាដ៏សំខាន់បំផុតនៃការចូលរួមប្រកួតលក្ខណៈអន្តរជាតិដូចជាជើងឯកអាស៊ី ជើងឯកអាស៊ីអាគ្នេយ៍ ឬក៏ជើងឯកពិភពលោកនោះ ។ វាជាកត្តាសំខាន់សម្រាប់ពង្រឹងសមត្ថភាព ជាពិសេសពង្រឹងនូវសមិទ្ធផលកីឡាករកីឡាការិនីយើង។យើងធ្វើយ៉ាងណាឲ្យមានការចូលរួមប្រកួតឲ្យបានច្រើនតាមដែលអាចធ្វើទៅបាន ដើម្បីស្វែងរកការអភិវឌ្ឍកម្រិតបច្ចេកទេសឆ្ពោះទៅរកគោលបំណងជាក់លាក់មួយដែលកម្ពុជានឹងទទួលធ្វើជាម្ចាស់ផ្ទះព្រឹត្តិការណ៍ស៊ីហ្គេមឆ្នាំ២០២៣។
លោក ណយ ផាន់ណា បន្តថា ចាប់ពីពេលនេះទៅមុខ គោលបំណងនៃការចេញទៅប្រកួតនានារបស់យើងគឺជាកត្តាដ៏សំខាន់ណាស់ ព្រោះការប្រកួតនេះនឹងធ្វើឲ្យកីឡាករកីឡាការិនីរបស់យើងមានការរីកចម្រើនទាំងកម្លាំងកាយកម្លាំងចិត្តធ្វើឲ្យរីកចម្រើនកម្រិតបច្ចេកទេសមានដូចជាគុណផលបច្ចេកទេសរបស់ពួកគាត់ ធ្វើឲ្យគាត់បន្សាំជាមួយបរិយាកាសក្នុងការប្រកួតជាលក្ខណៈអន្តរជាតិជាដើម។ ទាំងនេះហើយជាកត្តាសំខាន់សម្រាប់កីឡាករកម្រិតខ្ពស់ក្នុងការប្រជែងយកមេដាយជូនជាតិមាតុភូមិ ។ ការចូលរួមលើកនេះទៀតសោត យើងបានដាក់គោលដៅរបស់យើងថា ត្រូវតែស្វែងរកមេដាយឲ្យបាន បើទោះជាមេដាយអ្វីក៏ដោយ មិនថា មាស ប្រាក់ ឬក៏សំរឹទ្ធនោះទេ។
លោកអគ្គលេខាធិការសហព័ន្ធបានបន្ថែមទៀតថា ប្រទេសចូលរួមមានចំនួន១២ដែលសុទ្ធតែជាប្រទេសខ្លាំងៗ ប៉ុន្តែកីឡាករកីឡាការិនីកាយសម្ព័ន្ធកម្ពុជាបាននិងកំពុងប្រឹងប្រែងហ្វឹកហាត់យ៉ាងយកចិត្តទុកដាក់ ដើម្បីត្រៀមការប្រកួតមួយនេះ ក៏ដូចជាក្នុងការត្រៀមខ្លួនឆ្ពោះទៅស៊ីហ្គេម២០២៣។ ការចេញទៅប្រកួតលើកនេះ មានកីឡាករកីឡាការិនីប្រតិភូនិងមន្ត្រីចូលរួមសរុប១៨នាក់ ក្នុងនោះមានចៅក្រមអន្តរជាតិ២នាក់ គ្រូបង្វឹក និងគ្រូជំនួយ៣នាក់ កីឡាការិនី៨នាក់ និងកីឡាករ៥នាក់។
សម្រាប់ព្រឹត្តិការណ៍ AEROBIC GYMNASTICS ASIAN CHAMPIONSHIPS សហព័ន្ធកីឡាកាយសម្ព័ន្ធកម្ពុជាធ្លាប់បានចូលរួមប្រកួត២លើករួចមកហើយគឺនៅប្រទេសវៀតណាមកាលឆ្នាំ២០១៤ និង២០១៦ ។ សម្រាប់ឆ្នាំ២០១៤ គឺធ្លាប់ឈ្នះមេដាយសំរឹទ្ធ១គ្រឿង និងឆ្នាំ២០១៦ ឈ្នះមេដាយប្រាក់១គ្រឿង និងសំរឹទ្ធ១គ្រឿងផងដែរ ៕
ចែករំលែកព័តមាននេះ