រាជធានីភ្នំពេញ ៖ សម្តេចក្រឡាហោម ស ខេងឧបកនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានបញ្ជាក់ថា ការធ្វើកំណែទម្រង់ប៉ុស្តិ៍នគរបាលជាតិ ដោយសារនគបាលជាតិបានដើរតួនាទីយ៉ាងសំខាន់ក្នុងជួយឲ្យប្រជាពលរដ្ឋរស់នៅបានសុខសាន្ត ។
ការបញ្ជាក់របស់រដ្ឋមន្ត្រីក្រសួងមហាផ្ទៃធ្វើឡើងនៅពេលអនុញ្ញាតឱ្យនាយនគរបាលចំនួន៦០រូបដែលត្រៀមចេញទៅសិក្សាវគ្គបំប៉ននៅសាធារណរដ្ឋសង្គមនិយមវៀតណាម ចូលជួបសម្ដែងការគួរសម កាលពីរសៀលថ្ងៃទី១០ ខែសីហា ឆ្នាំ២០២២ នៅទីស្ដីការក្រសួងមហាផ្ទៃ ។
សម្ដេចក្រឡាហោម ស ខេង បានសម្ដែងក្ដីរីករាយដែលបានជួបទទួលជួបនាយនគរបាលដែលត្រៀមចេញទៅសិក្សានៅប្រទេសវៀតណាម ទាំង៦០រូប នាឱកាសនេះ ដោយសម្ដេចបានអះអាងទៀតថា នេះជាលើកទី១ហើយដែលសម្ដេចបានទទួលជួបជាមួយមន្ត្រីនគរបាលដែលចេញទៅសិក្សានៅក្រៅប្រទេស មិនមែនតែប្រទេសវៀតណាមនោះទេ ។
សម្ដេចបានបញ្ជាក់ថា៖«កងកម្លាំងនគរបាលជាតិ ជាកម្លាំងអនុវត្តច្បាប់ដើម្បីពង្រឹងសន្តិសុខ សុវត្ថិភាព សណ្ដាប់ធ្នាប់សាធារណៈ និងជួយពង្រឹងដល់សន្តិភាពប្រទេសជាតិ ដើម្បីបង្កលក្ខណៈសម្បត្តិឱ្យប្រជាពលរដ្ឋបានរស់នៅប្រកបដោយសេចក្ដីសុខ ។ នគរបាលជាតិពិតជាបានដើរតួនាទីយ៉ាងសំខាន់នៅក្នុងការអនុវត្តបេសកកម្មដូចបានបញ្ជាក់លើខាងលើ» ។
សម្ដេចបានលើកឡើងថា ៖ ក្រសួងមហាផ្ទៃ បានធ្វើកំណែទម្រង់ដើម្បីលើកកម្ពស់គុណភាពកងកម្លាំងនគរបាលជាតិជាបន្តបន្ទាប់ក្នុងន័យដើម្បីធានាដល់ការពង្រឹងកា រអនុវត្តតួនាទី និងភារកិច្ចរបស់មន្ត្រីនគរបាលជាតិ ក្នុងនោះការសិក្សារៀនសូត្រនេះ គឺជាគន្លឹះដ៏សំខាន់មួយនៅក្នុងការងារកំណែទម្រង់នគរបាលជាតិ ទាំងការសិក្សារៀនសូត្រក្នុងប្រទេស និងក្រៅប្រទេស ។
ពាក់ព័ន្ធនឹងការបណ្ដុះបណ្ដាលនគរបាលជាតិនេះដែរ សម្ដេចក្រឡាហោម ស ខេង បានរម្លឹកថា កន្លងមកភាគច្រើននៃកម្លាំងនគរបាលដែលបានបញ្ជូនទៅរៀនសូត្រនៅក្រៅប្រទេសនោះ គឺបានបញ្ជូនទៅរៀននៅប្រទេសវៀតណាម ។
សម្ដេចបន្តថា ក្នុងកិច្ចសហប្រតិបត្តិការជាមួយក្រសួងមហាផ្ទៃកម្ពុជា គឺភាគីវៀតណាមបានរួមចំណែកច្រើនក្នុង ការបណ្ដុះបណ្ដាល ធនធានមនុស្សកងកម្លាំងនគរបាលជាតិ ។
ក្នុងឱកាសនោះដែរ សម្ដេចបានបន្ថែមថា នៅប៉ុន្មានឆ្នាំចុងក្រោយនេះសម្ដេចបានដាក់ការប្ដេជ្ញាចិត្ត និងឈានទៅអនុវត្តបានកាន់តែច្រើនហើយនូវការកាត់បន្ថយ ការបញ្ជូនមន្ត្រីនគរបាលជាតិវគ្គបឋមទៅសិក្សានៅក្រៅប្រទេស ហើយថា សម្ដេចមានការប្ដេជ្ញាចិត្តខ្ពស់អនុវត្តការងារនេះ ឱ្យបាន១០០ភាគរយ ។
ជាមួយគ្នានេះ សម្ដេចក្រឡាហោមក៏បានគូសបញ្ជាក់អំពីការងារកំណែទម្រង់ប៉ុស្តិ៍នគរបាលជាតិផងដែរ ។ សម្ដេចថា តាមរយៈការងារកំណែទម្រង់ប៉ុស្តិ៍នគរបាលនេះ សម្ដេចបានចាត់តាំងឱ្យរដ្ឋលេខាធិការទទួលបន្ទុក និងអគ្គនាយកដ្ឋានបុគ្គលិកបន្តពិនិត្យ និងរៀបចំរំលែកក្របខ័ណ្ឌពីការិយាល័យ ឬនាយកដ្ឋាននានាដែលមានមន្ត្រីលើសពីតម្រូវការចាំបាច់ដើម្បីចែកទៅឱ្យប៉ុស្តិ៍នគរបាលរដ្ឋបាលដែលជាទូទៅសម្ដេចសង្កេតឃើញថាពិតជាមានការខ្វះខាតធនធានមនុស្សគ្រប់ឃុំ សង្កាត់តែម្ដង ។
សម្ដេចក្រឡាហោម ស ខេង បានណែនាំឱ្យនាយនគរបាលទាំង៦០រូប យកចិត្តទុកដាក់គោរពវិន័យឱ្យបានល្អ ចៀសវាបង្កបញ្ហាផ្សេងៗនាំឱ្យប៉ះពាល់ដល់កិត្តិយសជាតិ និងកងកម្លាំងនគរបាលជាតិ ហើយប្រសិនបើមានបញ្ហាឬការលំបាកអ្វីពេលកំពុងរៀនសូត្រនោះ ក៏ត្រូវរាយការណ៍មកថ្នាក់ដឹកនាំ ដើម្បីជួយផ្ដល់ការគាំទ្រឱ្យបានល្អ ដ្បិតនាយនគរបាល ចេញទៅសិក្សានេះគឺដើម្បីយកចំណេះដឹងមកបម្រើអង្គភាព បម្រើសជាតិ និងប្រជាជន៕
ចែករំលែកព័តមាននេះ