រាជធានីភ្នំពេញ ៖ នៅរសៀលថ្ងៃសៅរ៍ ទី១៤ មករា ប្រដាល់អន្តរជាតិរបស់ខារ៉ាបាវមិនមានការប្រកួតសន្សំពិន្ទុទៀតទេ ដោយត្រូវសម្រាកមួយសប្ដាហ៍ បន្ទាប់ពីការប្រកួតដណ្ដើមខ្សែក្រវាត់រដូវកាលទី២ បានបញ្ចប់
រាជធានីភ្នំពេញ ៖ នៅរសៀលថ្ងៃសៅរ៍ ទី១៤ មករា ប្រដាល់អន្តរជាតិរបស់ខារ៉ាបាវមិនមានការប្រកួតសន្សំពិន្ទុទៀតទេ ដោយត្រូវសម្រាកមួយសប្ដាហ៍ បន្ទាប់ពីការប្រកួតដណ្ដើមខ្សែក្រវាត់រដូវកាលទី២ បានបញ្ចប់បាន៤សប្ដាហ៍រវាងកីឡាករកម្ពុជា និងបរទេសនៅលើសង្វៀនទូរទស្សន៍អាស៊ីអាគ្នេយ៍ ។ ព្រឹត្តិការណ៍នេះ ត្រូវបានមហាជនភាគច្រើនផ្ដោតការចាប់អារម្មណ៍ ខណៈដែលសប្ដាហ៍នេះសមាសភាពកីឡាករកម្ពុជា ដែលឡើងប្រកួតមិត្តភាពសុទ្ធតែជាជើងខ្លាំង និងល្បីឈ្មោះដោយតម្រូវឱ្យកីឡាករចាន់ ប៊ុនលាភ និងជា សំនៀង ត្រូវប៉ះជាមួយថៃ ។
ព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់របស់ភេសជ្ជៈខារ៉ាបាវវគ្គ២នេះ មានការរំពឹងខ្ពស់យ៉ាងខ្លាំងថា នឹងមានការគាំទ្រដាច់ឆ្ងាយជាងការប្រកួតអន្តរជាតិកាលពីវគ្គ១ ដោយសារតែសមាសភាពកីឡាករសុទ្ធតែល្អៗ និងល្បីឈ្មោះ បើទោះជាព្រឹត្តិការណ៍នេះត្រឹមជាការប្រកួតមិត្តភាព ។ កីឡាករកម្ពុជា២រូបគឺ ចាន់ ប៊ុនលាភ និងជា សំនៀង គឺជាគូប្រកួតស៊ីសាច់ហុតឈាមជាមួយកីឡាករថៃនៅរសៀលថ្ងៃសៅរ៍នោះ ដែលការប្រកួតរបស់ពួកគេគឺអ្នកណាៗក៏ជឿថា ម្នាក់ៗមិនចង់ចាញ់ដែរ ។
អ្នករៀបចំការប្រកួតបានអះអាងថា កីឡាករទាំង៤រូបត្រូវបានផ្គូផ្គងហើយត្រូវប៉ះគ្នាក្នុងសប្ដាហ៍ទី២នេះ សម្រាប់ព្រឹត្តិការណ៍អន្តរជាតិខារ៉ាបាវ ដោយអ្នកឈ្នះនឹងទទួលបានកិត្តិយស ហើយអ្នកចាញ់នឹងត្រូវបាក់មុខមិនខុសគ្នានឹងកីឡាករដែលប្រកួតដណ្ដើមពិន្ទុនោះឡើយ ។ កីឡាករកម្ពុជាត្រូវបានអះអាងថា សម្ងំហ្វឹកហាត់មិនខុសគ្នានោះទេ ដោយសារតែមិនចង់បាក់មុខនៅលើសង្វៀនអន្តរជាតិរបស់ខារ៉ាបាវ ដែលមានអ្នកទស្សនាកុះករទស្សនារាល់សប្ដាហ៍ ។ យ៉ាងណាមិញ គេមិនទាន់ដឹងថា កីឡាករណាមួយនឹងមានលទ្ធភាពដណ្ដើមបានជ័យជម្នះសម្រាប់ការប្រកួតមិត្តភាពកំដររេញមួយសប្ដាហ៍ ដែលការប្រកួតសន្សំពិន្ទុត្រូវខាងកម្មវិធីតម្រូវឱ្យសម្រាក ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានប្រាប់ថា កីឡាករ ចាន់ ប៊ុនលាភ មកពីក្លិបនិរោធមានជ័យ ត្រូវជួបប្រកួតជាមួយកីឡាករថៃឈ្មោះផា យ៉ាក់ឡេក ក្នុងនាមជាគូបើកឆាកអន្តរជាតិមិត្តភាពនៅក្នុងព្រឹត្តិការណ៍នេះ ដោយជំនួបរវាងពួកគេ គឺបានកើតឡើងដោយសារតែការផ្គូផ្គងទុកជាយូរមកហើយ ដើម្បីឱ្យពួកគេស្ទាបស្ទង់សមត្ថភាព ។ លោកថា កីឡាករចាន់ ប៊ុនលាភ ចាត់ទុកថា ជាជើងខ្លាំងម្នាក់នៅលើសង្វៀនប្រដាល់អន្តរជាតិនាពេលកន្លងមក ទើបការប៉ះប្រកួតមិត្តភាពនៅលើសង្វៀនខារ៉ាបាវ កីឡាកររូបនេះនឹងធ្វើឱ្យអ្នកគាំទ្រអស់ចិត្ត ហើយជាប់ចិត្តនឹងការប្រកួតដែលប្រកាសធ្វើឡើង ។ លោកថា ព្រឹត្តិការណ៍ដែលបានទទួលជោគជ័យក្រោយការបញ្ចប់ការប្រកួតដណ្ដើមខ្សែក្រវាត់នៅរដូវកាលទី១នេះ កាន់តែមានសន្ទុះចាប់អារម្មណ៍ទ្វេដង បន្ទាប់ពីក្រុមការងារប្រកួតសម្រេចដាក់កីឡាករកម្ពុជា៤រូប និងថៃ៤រូបសុទ្ធតែខ្លាំងឱ្យឡើងប្រកួតគ្នា ។ លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជា ចាន់ ប៊ុនលាភ ទើបសម្រេចជ្រើសភ្លាមឱ្យឡើងប្រកួតមិត្តភាពនៅថ្ងៃសៅរ៍នេះ ដើម្បីឱ្យអ្នកគាំទ្រជាប់ចិត្តមិនខុសគ្នាពីការប្រកួតសន្សំពិន្ទុ ។
ទោះបីយ៉ាងណា លោកមិនហ៊ានប៉ាន់ស្មានថា ការប្រកួតរបស់គេនៅល្ងាចថ្ងៃសៅរ៍ខានស្អែកនេះ អ្នកណានឹងទទួលបានកិត្តិយសនោះទេ ដោយសារតែកីឡាករថៃក៏ជាជើងខ្លាំង ហើយកីឡាករកម្ពុជាក៏ខ្លាំង ។ លោករំពឹងយ៉ាងខ្លាំងថា ការប្រកួតបើកឆាករបស់គូអន្តរជាតិទី១រវាង ចាន់ ប៊ុនលាភ និងកីឡាករថៃ នឹងទាក់ទាញចំណាប់អារម្មណ៍ខ្លាំងក្លា ក្នុងពេលដែលម្នាក់ៗក៏ត្រូវលោកជឿថា នឹងប្រឹងប្រកួតអស់ពីសមត្ថភាពរៀងខ្លួន ។ កីឡាករថៃ ផា យ៉ាក់ឡេក ធ្លាប់ប្រកួត៦៤លើក ឈ្នះ៦១លើក និងចាញ់៣លើក ក្នុងពេលដែលកីឡាករកម្ពុជាឆ្លងកាត់ការប្រកួត៦១លើក ឈ្នះ៥១លើក ចាញ់៨លើក និងស្មើ២លើកនៅលើសង្វៀន ។
សម្រាប់កីឡាករជា សំនៀង លោកញាណ សុធី បញ្ជាក់ថា គេក៏ជាគូឯកសម្រាប់ព្រឹត្តិការណ៍មិត្តភាពរបស់ភេសជ្ជៈខារ៉ាបាវ ដោយត្រូវប្រកួតជាមួយកីឡាករថៃឈ្មោះផ្លាយ ណយ ។
លោកថា ការប្រកួតរបស់គូនេះនៅមិនទាន់ដឹងថា អ្នកណាទទួលបានកិត្តិយសនោះទេ ក្នុងពេលដែលកីឡាករកម្ពុជាក៏ល្អ ហើយកីឡាករថៃក៏មានកេរ្តិ៍ឈ្មោះមិនធម្មតា ។ បើទោះជាប្រវត្តិ និងបទពិសោធន៍កម្ពុជារាងស្ទើរជាង ប៉ុន្តែបើនិយាយពីកម្លាំងស៊ុហ្វ និងបច្ចេកទេស គឺគេល្អនៅលើសង្វៀន ទើបម្នាក់ៗបានត្រឹមតែយល់ថា ពួកគេនឹងប្រកួតស្វិតស្វាញ ។ កីឡាករថៃលោកថា ធ្លាប់ប្រកួត១០៦លើក ឈ្នះ៨៣លើក ចាញ់១៩លើក និងស្មើ៤លើក ក្នុងពេលកីឡាករកម្ពុជា ធ្លាប់ប្រកួតបាន៧៥លើក ឈ្នះ៦០លើក ចាញ់១២លើក និងស្មើ៣លើក ៕
ចែករំលែកព័តមាននេះ