រាជធានីភ្នំពេញ ៖ នៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ ទី១៤ មករាសប្ដាហ៍នេះ កីឡាករជើងខ្លាំងកម្ពុជា៣រូបនឹងជួបប្រកួតជាមួយកីឡាករបរទេស ក្នុងនោះកីឡាករ ជឹម ចិត្រា មកពីក្លិបខ្លារខិនមានរិទ្ធ នឹងជួបប្រកួតជាមួយ
រាជធានីភ្នំពេញ ៖ នៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ ទី១៤ មករាសប្ដាហ៍នេះ កីឡាករជើងខ្លាំងកម្ពុជា៣រូបនឹងជួបប្រកួតជាមួយកីឡាករបរទេស ក្នុងនោះកីឡាករ ជឹម ចិត្រា មកពីក្លិបខ្លារខិនមានរិទ្ធ នឹងជួបប្រកួតជាមួយកីឡាករថៃឈ្មោះដេតក្រាក់រ៉ន កាវក្លៃយីម ក្នុងប្រភេទទម្ងន់៦៥គីឡូក្រាម ។ មឿន សុខហ៊ុច មកពីក្លិបពុទ្ធសិរីវង្សព្រែកតាទែន ប្រកួតជាមួយកីឡាករថៃឈ្មោះនីវវាំងច័ន្ទ ប៉ាកនផនសុរិន្ទ ក្នុងប្រភេទទម្ងន់៦៧គីឡូក្រាម និងសរ រាជសីហ៍ មកពីក្លិបមោងឬស្សីមរតកគុនខ្មែរ ប្រកួតជាមួយកីឡាករបារាំងឈ្មោះថៃឡឺស៊ីត នឹងត្រាកាន ក្នុងប្រភេទទម្ងន់៦៩គីឡូក្រាម ។
តាមការឱ្យដឹងព្រឹត្តិការណ៍ប្រកួតបែបនេះស្ថានីយទូរទស្សន៍ស៊ីអិនស៊ីបានរៀបចំចំនួន២លើករួចមកហើយ ធ្វើឱ្យមានការចាប់អារម្មណ៍ពីទស្សនិកជនយ៉ាងខ្លាំង ។ ជាពិសេសជំនួបរវាងជឹម ចិត្រា ជាមួយកីឡាករថៃតែម្ដង ដែលពួកគេទាំង២មានប្រវត្តិប្រកួតខុសគ្នាឆ្ងាយណាស់ ។ ជឹម ចិត្រា អាយុ២០ឆ្នាំ ធ្លាប់ប្រកួតបានត្រឹមតែ២២ដងប៉ុណ្ណោះ ឈ្នះ១៥ដង ចាញ់៧ដង និងធ្លាប់ផ្ដួលគូប្រកួតឱ្យសន្លប់បាន៦ដង ក្នុងពេលកីឡាករថៃអាយុ២០ឆ្នាំដូចគ្នា តែធ្លាប់ប្រកួតរហូតដល់ទៅ៧០ដង ឈ្នះ៥០ដង ចាញ់១៨ដង ស្មើ២ដង។ យោងតាមប្រវត្តិប្រកួតសម្រាប់ជឹម ចិត្រា មានសង្ឃឹមឈ្នះតិចបំផុត ។
គូអន្តរជាតិទី២ មឿន សុខហ៊ុច អាយុ២៤ឆ្នាំ ធ្លាប់ប្រកួត១០២ដង ឈ្នះ៧៣ដង ចាញ់២៤ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បាន១៥ដង ក្នុងពេលកីឡាករថៃធ្លាប់ប្រកួត៨៧ដង ឈ្នះ៦៥ ដងចាញ់១៩ដង ស្មើ៣ដង ។ ទោះជាយ៉ាងណាគូនេះគេមានជំនឿចិត្តលើមឿន សុខហ៊ុច ច្រើនជាង ព្រោះអ្នកប្រដាល់មកពីក្លិបពុទ្ធសិរីវង្សព្រែកតាទែនរូបនេះមានថ្វីដៃប្រកួតល្អខ្លាំងណាស់ ។
គូអន្តរជាតិទី៣ សរ រាជសីហ៍ អាយុ២៥ឆ្នាំ ធ្លាប់ប្រកួត៦២ដង ឈ្នះ៤៦ដង ចាញ់១៥ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន៨ដង ក្នុងពេលកីឡាករបារាំងអាយុ២៤ឆ្នាំ ធ្លាប់ប្រកួត៤៥ដង ឈ្នះ៣៥ដង ចាញ់៨ដង ស្មើ២ដង និងធ្លាប់ផ្តួលគូប្រកួតឱ្យសន្លប់បាន១១ដង ។
គូនេះពិបាកប៉ាន់ស្មានខ្លាំងណាស់ ដោយសារកីឡាករទាំងពីរមានភាពខ្លាំងម្យ៉ាងមា្នក់ ពោលគឺកីឡាករកម្ពុជាពូកែវាយ តែចាញ់កម្លាំងកីឡាករបារាំង។
ដោយឡែកនៅលើសង្វៀនទូរទស្សន៍ស៊ីធីអិនថ្ងៃសៅរ៍នោះដែរ ក៏មានការប្រកួតអន្តរជាតិរវាងកីឡាករពេជ្រ សីហា មកពីក្លិបកងពលធំអន្តរាគមន៍លេខ២ ប្រកួតជាមួយកីឡាករឡាវ ឈ្មោះយ៉តឃុន ផុនអេកប៉ាងសៃ ក្នុងប្រភេទទម្ងន់៦៩គីឡូក្រាម និងសុខ សុវណ្ណ មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករថៃឈ្មោះឌែនឡាំប៉ាវ ស.ភុងស៊ីត ក្នុងប្រភេទទម្ងន់៦០គីឡូក្រាម ។
ចំណែកគូប្រកួតមិត្តភាពមានកីឡាករជឹម សារ៉ាត់ មកពីក្លិបតាព្រហ្មមានជ័យ ប្រកួតជាមួយកីឡាកររិទ្ធ ប្រាក់ប៊ិន មកពីក្លិបកងពលតូចលេខ៧០ ។ កីឡាករវ៉ែន ហុងជីវ៉ុង មកពីក្លិបកងកេងកីឡាខេត្តបាត់ដំបង ប្រកួតជាមួយកីឡាករប៊ិត ប៊ុនធឿន មកពីក្លិបតាព្រហ្មមានជ័យ និងគូចុងក្រោយកីឡាករផៃ គឹមហឿត មកពីក្លិបគីសែមានរិទ្ធ ប្រកួតជាមួយកីឡាករសុខ ចិន្ដា មកពីក្លិបឃ្លាំងមឿងកីឡា ៕
ចែករំលែកព័តមាននេះ