ចរាចរណ៍ដែនអាកាសជុំវិញកោះតៃវ៉ាន់វិលមកធម្មតាវិញ ទោះចិនប្រកាសសមយុទ្ធថ្មី
តៃវ៉ាន់ ៖ ចរាចរណ៍ដែនអាកាសជុំវិញកោះតៃវ៉ាន់កំពុងវិលត្រឡប់ទៅរកភាពធម្មតាវិញជាបណ្តើរៗ
តៃវ៉ាន់ ៖ ចរាចរណ៍ដែនអាកាសជុំវិញកោះតៃវ៉ាន់កំពុងវិលត្រឡប់ទៅរកភាពធម្មតាវិញជាបណ្តើរៗ បន្ទាប់ពីមានការបើកដែនអាកាសឡើងវិញ ទោះបីចិនប្រកាសធ្វើសមយុទ្ធយោធាថ្មីនៅតំបន់ផ្សេង។ នេះបើយោងតាមការបញ្ជាក់របស់ក្រសួងដឹកជញ្ជូន និងគមនាគមន៍តៃវ៉ាន់នៅថ្ងៃចន្ទ ទី ៨សីហានេះ។
កាលពីសប្តាហ៍មុន មហាយក្សចិនបានដាក់ពង្រាយយន្តហោះចម្បាំងជាច្រើនគ្រឿង និងបានធ្វើការបា.ញ់គ្រាប់ពិតអំឡុងការធ្វើសមយុទ្ធយោធាជុំវិញកោះតៃវ៉ាន់ ដើម្បីឆ្លើយតបទៅនឹងដំណើរទស្សនកិច្ចរបស់ប្រធានសភាអាមេរិក លោកស្រី Nancy Pelosi។
ក្រុមហ៊ុនអាកាសចរណ៍កូរ៉េខាងត្បូង Korean Air ដែលបានលុបចោលជើងហោះហើរទៅកាន់ទីក្រុងតៃប៉ិ កាលពីថ្ងៃសុក្រ និងថ្ងៃសៅរ៍កន្លងទៅនេះ និងប្តូរទិសដៅហោះហើរដើម្បីគេចពីតំបន់រងផលប៉ះពាល់ បាននិយាយនៅថ្ងៃចន្ទ ទី ៨ សីហានេះថា ខ្លួនបានបន្តប្រតិបត្តិការហោះហើរធម្មតាវិញ។
ចំណែកក្រុមហ៊ុនអាកាសចរណ៍ហ្វីលីពីន និយាយថា ខ្លួននឹងបន្តការហោះហើរទៅកាន់ និងមកពីទីក្រុងតៃប៉ិជាធម្មតាវិញ បន្ទាប់ពីបានប្រើប្រាស់ជើងហោះហើរជំនួសអំឡុងការធ្វើសមយុទ្ធរយៈពេល ៤ថ្ងៃរបស់ចិន។
រហូតមកដល់ពេលនេះ មិនទាន់មានការឆ្លើយតបភ្លាមៗនោះទេពីក្រុមហ៊ុនអាកាសចរណ៍ជាច្រើន បន្ទាប់ពីចិនប្រកាសធ្វើសមយុទ្ធយោធាថ្មីនៅតំបន់ផ្សេង៕ (យោងតាមប្រភព៖ Reuters)
ចែករំលែកព័តមាននេះ