កម្ពុជាឈ្នះមេដាយសរុប២៨គ្រឿង ពីព្រឹត្តិការណ៍អាស៊ានប៉ារ៉ាហ្គេមនៅឥណ្ឌូណេស៊ី
- ភ្នំពេញ
ឥណ្ឌូណេស៊ី ៖ អត្តពលិកជនពិការកម្ពុជា បានបញ្ចប់ភារកិច្ចរបស់ខ្លួនក្នុងព្រឹត្តិការណ៍កីឡាអាស៊ានប៉ា
ឥណ្ឌូណេស៊ី ៖ អត្តពលិកជនពិការកម្ពុជា បានបញ្ចប់ភារកិច្ចរបស់ខ្លួនក្នុងព្រឹត្តិការណ៍កីឡាអាស៊ានប៉ា
ឥណ្ឌូណេស៊ី ៖ អត្តពលិកជនពិការកម្ពុជា បានបញ្ចប់ភារកិច្ចរបស់ខ្លួនក្នុងព្រឹត្តិការណ៍កីឡាអាស៊ានប៉ារ៉ាហ្គេម លើកទី១១ ឆ្នាំ២០២២ នៅទីក្រុងសូឡូ ប្រទេសឥណ្ឌូណេស៊ី ជាផ្លូវការត្រឹមថ្ងៃទី០៥ ខែសីហា ដោយដណ្តើមបានមេដាយសរុប ២៨គ្រឿង និងឈរលេខរៀងទី៧ ក្នុងចំណោម ១១ប្រទេសចូលរួម។
មេដាយទាំង២៨គ្រឿងរបស់កម្ពុជាមាន មេដាយមាស៧គ្រឿង មេដាយប្រាក់១០គ្រឿង និងមេដាយសំរឹទ្ធ១១គ្រឿង រកបានលើប្រភេទកីឡាចំនួន ៧ រួមមាន អត្តពលកម្ម, ហែលទឹក, អុកអន្តរជាតិ, ប៊ូស្យា, បាល់ទះអង្គុយ, វាយកូនឃ្លីលើតុនិងបាល់បោះជិះរទេះ ។ ៤ប្រភេទកីឡាដែលមិនទទួលបានមេដាយ មានវាយសី លើកទម្ងន់ បាល់បោះពិការភ្នែក (Goalball) និងបាល់ទាត់ចលករខួរក្បាល (Football CP)។
ម្ចាស់ផ្ទះឥណ្ឌូណេស៊ី ឈរកំពូលតារាងដោយរកមេដាយសរុបបាន ៤២៨គ្រឿង (មាស១៧៧, ប្រាក់១៤១ និងសំរឹទ្ធ ១១០) តាមពីក្រោយដោយថៃ មេដាយសរុប៣២០គ្រឿង (មាស ១១៧, ប្រាក់១១៦ និងសំរឹទ្ធ ១១០) វៀតណាម ឈរនៅលេខ៣ ជាមួយមេដាយសរុប១៨០គ្រឿង (មាស៦៤, ប្រាក់៦០ និងសំរឹទ្ធ៥៦)។
ដោយឡែក ម៉ាឡេស៊ី ឈរនៅលេខ៤ រកបានមេដាយសរុប ៧០គ្រឿង (មាស៣៦, ប្រាក់២០ និងសំរឹទ្ធ១៤) ហ្វីលីពីន ឈរនៅលេខ៥ ដោយរកបានមេដាយសរុប១០៤គ្រឿង (មាស២៨, ប្រាក់៣១ និង
សំរឹទ្ធ ៤៥) លេខ៦ មីយ៉ាន់ម៉ា មេដាយសរុប ៤៤គ្រឿង (មាស១៤, ប្រាក់១៣ និងសំរឹទ្ធ១៧)។ ៤ប្រទេសដែលនៅពីក្រោមកម្ពុជា គឺលេខ៨ សិង្ហបុរី រកបានមេដាយសរុប ២៧គ្រឿង (មាស៧, ប្រាក់ ៩ និងសំរឹទ្ធ១១) ទីម័រខាងកើត លេខ៩ រកបានមេដាយសរុប១២គ្រឿង (មាស៥, ប្រាក់ ២ និងសំរឹទ្ធ៥) ព្រុយណេ លេខ១០ មេដាយសរុប ៤គ្រឿង (មាស១, ប្រាក់០ និងសំរឹទ្ធ ៣) និងចុងក្រោយគេគឺ ឡាវ រកបានមេដាយសុប ៩គ្រឿង (មាស ០, ប្រាក់២ និងសំរឹទ្ធ ៧)។
សរុបមេដាយមាសទាំង៧គ្រឿងដែលកីឡាករ-កីឡាការិនីកម្ពុជា ដណ្តើមបាន រួមមាន៖ បាល់បោះ (វិញ្ញាសានារី ៣ទល់៣), អត្តពលកម្ម (វិញ្ញាសា លោតចម្ងាយ), ប៊ូស្យា (វិញ្ញាសានារីឯកត្តជន ប្រភេទពិការ BC2) អត្តពលកម្ម (វិញ្ញាសារត់ចម្ងាយ ១.៥០០ម៉ែត្រ ប្រភេទT46) អត្តពលកម្ម (វិញ្ញាសារត់ចម្ងាយ ៤០០ម៉ែត្រ ប្រភេទ T47), បាល់ទះអង្គុយ(វិញ្ញាសាបុរស), អត្តពលកម្ម (វិញ្ញាសាប្រណាំងរទេះបណ្ដាក់ ១០០ម៉ែត្រ ៤x៤) ។
ដោយឡែក មេដាយប្រាក់ចំនួន ១០គ្រឿងរកបានដោយកីឡាហែលទឹក៣គ្រឿង អត្តពលកម្ម ៦គ្រឿង និងបាល់បោះជិះរទេះ១គ្រឿង ខណៈមេដាយសំរឹទ្ធ១១គ្រឿង ដណ្តើមបានដោយកីឡា
វាយកូនឃ្លីលើតុ ១គ្រឿង ហែលទឹក៥គ្រឿងអត្តពលកម្ម ៤គ្រឿង និងអុកអន្តរជាតិ ១ គ្រឿង ។
ការសម្រេចបានសមិទ្ធផលរបស់ក្រុមអត្តពលិកជនពិការកម្ពុជាខាងលើនេះ បានធ្វើឲ្យកម្ពុជាបំបែកកំណត់ត្រាប្រវត្តិសាស្ដ្រ ឈ្នះមេដាយច្រើនជាងពេលណាណាទាំងអស់ បើគិតចាប់ពីព្រឹត្តិការណ៍អាស៊ានប៉ារ៉ាហ្គេមបង្កើតឡើងដំបូងកាលពីឆ្នាំ២០០១រហូតមកទល់បច្ចុប្បន្ន ។ ពិសេសលើសពីនេះ កម្ពុជាបានបំបែកកំណត់ត្រា ឆ្នាំ២០១៣ នៅមីយ៉ាន់ម៉ា លើមេដាយទាំង៣ប្រភេទ (មាស ប្រាក់ និងសំរឹទ្ធ)កាលនោះកម្ពុជាដណ្ដើមបានមេដាយសរុប៩គ្រឿង មានមេដាយមាស៣គ្រឿង ប្រាក់៤គ្រឿង និងសំរឹទ្ធ២គ្រឿង។
សូមបញ្ជាក់ថា អត្តពលិកកម្ពុជា បានពាំនាំមេដាយត្រឡប់មកមាតុប្រទេសវិញហើយ ដើម្បីត្រៀមខ្លួនម្ដងទៀតក្នុងការធ្វើជាម្ចាស់ផ្ទះវិញម្ដងនៅឆ្នាំក្រោយ សម្រាប់ព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ដែលគ្រោងធ្វើអំឡុងថ្ងៃទី០១ ដល់ថ្ងៃទី១០ ខែមិថុនា ឆ្នាំ២០២៣៕
ចែករំលែកព័តមាននេះ