ADផ្ទាំងផ្សព្វផ្សាយពាណិជ្ជកម្ម

កម្ពុជាដណ្ដើមបានមេដាយ៧គ្រឿង ពីព្រឹត្តិការណ៍ប្រកួតកីឡាវ៉ូស៊ូអាស៊ាន-ចិននៅម៉ាឡេស៊ី

2 ថ្ងៃ មុន

ភ្នំពេញ
២៦ ខែ កញ្ញា ឆ្នាំ ២០២៥ ម៉ោង ១០:៣១

រាជធានីភ្នំពេញ ៖ ក្រុមកីឡាករ កីឡាការិនីជម្រើសជាតិវ៉ូស៊ូកម្ពុជា ដែលទៅចូលរួមប្រកួតក្នុងព្រឹត្តិការណ៍ប្រកួតកីឡាវ៉ូស៊ូអាស៊ាន-ចិន(The 1st ASEAN-CHINA WOMEN’s Wushu Championship 2025) ដែលធ្វើឡើងនៅប្រទេសម៉ាឡេស៊ី ដោយដណ្ដើមបានមេដាយចំនួន៧គ្រឿងត្រឡប់មកជូនជាតិមាតុភូមិ។

ចំពោះប្រតិភូកីឡាវ៉ូស៊ូកម្ពុជាដែលបានទៅចូលរួមនៅក្នុង ព្រឹត្តិការណ៍ប្រកួតកីឡាវ៉ូស៊ូអាស៊ាន-ចិនដែលប្រទេសម៉ាឡេស៊ីលើកនេះគឺទទួលបានការអនុញ្ញាតិពីក្រសួងអប់រំយុវជននិងកីឡាដោយការប្រកួតបានប្រព្រឹត្តិទៅចាប់ពីថ្ងៃទី២១ដល់ថ្ងៃទី២៥ខែកញ្ញា ឆ្នាំ២០២៥ មានបណ្ដាប្រទេសចំនួន៩ចូលរួម។

ចំណែកកម្ពុជាបានបញ្ជូនប្រតិភូ គ្រូបង្វឹក គ្រូជំនួយកីឡាករ កីឡាការិនីចំនួន៨នាក់ដឹកនាំដោយលោកម៉ៅ ចន្ថាវុធ អគ្គលេខាធិការសហព័ន្ធកីឡាវ៉ូស៊ូកម្ពុជា ចូលរួមក្នុងព្រឹត្តិការណ៍ដែលរៀបចំធ្វើឡើងដោយសហព័ន្ធកីឡាវ៉ូស៊ូកីឡាវ៉ូស៊ូអាស៊ាន-ចិន(ASEAN-CHINA Wushu Federation)ដោយកម្ពុជាដណ្ដើមបានមេដាយចំនួន៥គ្រឿងក្នុងនោះមេដាយប្រាក់១គ្រឿងនិងមេដាយសំរឹទ្ធចំនួន៤គ្រឿង។

លោកម៉ៅ ចន្ថាវុធ អគ្គលេខាសហព័ន្ធកីឡាវ៉ូស៊ូកម្ពុជាបានរាយការណ៍ពីប្រទេសម៉ាឡេស៊ីមកថា ក្នុងចំណោមមេដាយទាំង៥គ្រឿងដែលកម្ពុជាដណ្ដើមបាន សម្រាបវិញ្ញាសាDuilian សម្ដែងជាក្រុមមានចំនួន២នាក់លើប្រភេទអាយុក្រោម១៨ឆ្នាំដណ្ដើមបានមេដាយប្រាក់ចំនួន២គ្រឿង និង២នាក់លើប្រភេទមនុស្សពេញវ័យវិញ្ញាសាសម្ដែងដូចគ្នាដណ្ដើមបានមេដាយសំរឹទ្ធ២គ្រឿង។ចំណែកវិញ្ញាសាTaoluសម្ដែងឯកត្តជន រួមមាន៖វិញ្ញាសាណាន់ឈាន វិញ្ញាសាណាន់តាវនិងវិញ្ញាសាជឿនស៊ុលើប្រភេទអាយុក្រោម១៨ឆ្នាំដណ្ដើមបានមេដាយសំរឹទ្ធចំនួន៣គ្រឿងបន្ថែមទៀត។

សូមបញ្ជាក់ថាប្រតិភូកីឡាវ៉ូស៊ូកម្ពុជានឹងត្រឡប់មកវិញនៅល្ងាចថ្ងៃទី២៦ខែកញ្ញាឆ្នាំ២០២៥វេលាម៉ោង៥និង៣០នាទីល្ងាច៕