មួយរយៈមកនេះមានការចាប់អារម្មណ៍ខ្លាំងទៅលើកុមារតូចៗចេះចាំរឿងរាវប្រវត្តិសាស្ត្រ ភូមិសាស្ត្ររបស់កម្ពុជា ។ ក្មេងៗដែលរៀនត្រឹមថ្នាក់ទី២ មានអាយុត្រឹម៦ ឬ៧ឆ្នាំ ប៉ុន្តែអាចចេះកម្មវិធីសិក្សា សិស្សថ្នាក់អនុវិទ្យាល័យជារឿងដែលមិនកោតសរសើរមិនបាន ។ ការសរសើរមិនត្រឹមតែសម្រាប់ក្មេងដែលឆ្លាតវៃនោះទេ…
មួយរយៈមកនេះមានការចាប់អារម្មណ៍ខ្លាំងទៅលើកុមារតូចៗចេះចាំរឿងរាវប្រវត្តិសាស្ត្រ ភូមិសាស្ត្ររបស់កម្ពុជា ។ ក្មេងៗដែលរៀនត្រឹមថ្នាក់ទី២ មានអាយុត្រឹម៦ ឬ៧ឆ្នាំ ប៉ុន្តែអាចចេះកម្មវិធីសិក្សា សិស្សថ្នាក់អនុវិទ្យាល័យជារឿងដែលមិនកោតសរសើរមិនបាន ។
ការសរសើរមិនត្រឹមតែសម្រាប់ក្មេងដែលឆ្លាតវៃនោះទេ គេបានគោរពសរសើរទៅដល់ទឹកចិត្តបស់អ្នកគ្រូដែលបានខិតខំបង្រៀនក្មេងៗទាំងនោះបានយ៉ាងល្អទៀតផង ។ អ្វីដែលកុមារតូចៗបានចេះចាំទាំងអស់នោះកើតចេញពីការការអប់រំមួយ ដែលអ្នកគ្រូម្នាក់បានយកបេះដូងទៅបង្រៀន ។
អ្នកគ្រូ ស៊ីប ស្រីណុច ដែលកំពុងបង្រៀនសិស្សថ្នាក់បឋមសិក្សាអន្លង់រមៀត ក្នុងស្រុកកណ្តាលស្ទឹង ខេត្តកណ្តាល បានអះអាងថា គាត់បានយកបេះដូងទៅបង្រៀនកូនសិស្សរបស់គាត់ ។ អ្នកគ្រូបានបញ្ជាក់ថា ផ្តើមពីគំនិតចង់ឲ្យកូនសិស្សរបស់ខ្លួនស្គាល់ប្រវត្តិសាស្ត្រ ភូមិសាស្ត្រ និងរឿងរ៉ាវសង្គមមួយចំនួន គាត់បានចំណាយពេលវេលាបង្រៀនកូនសិស្សបន្ថែមពីកម្មវិធីសិក្សា ។
អ្នកគ្រូបញ្ជាក់ថា តាមពិតទៅអ្វីដែលគាត់បង្រៀនកូនសិស្សរបស់គាត់នោះជាមេរៀននៅក្នុងកម្មវិធីសិក្សាសិស្សថ្នាក់ទី៦ ឬទី៧ ប៉ុន្តែដោយយល់ថា ចំណេះដឹងទូទៅទាំងនោះមានសារៈសំខាន់ ដូច្នេះអ្នកគ្រូបានចំណាយពេលពន្យល់បង្រៀនដល់កូនសិស្សរបស់គាត់ ។
អ្នកគ្រូបានសរសើរកូនសិស្សរបស់ខ្លួនទាំងអស់ថា ជាក្មេងឆ្លាត ពីព្រោះសំណួរខ្លះគាត់បានណែនាំជាទូទៅតែម្តង ឬពីរដងពួកគេចេះចាំ ចំណែកសំណួរខ្លះទៀត អ្នកគ្រូបានដាក់ជាកិច្ចការផ្ទះ ដើម្បីឲ្យពួកគេយកទៅទន្ទិញ និងរំលឹកនៅផ្ទះ ។ «ខ្ញុំមិននឹងស្មានថា វីដេអូដែលខ្ញុំថតនោះមានការចាប់អារម្មណ៍ច្រើនពីពលរដ្ឋយើងបែបនេះទេ ។ ដំឡូងឡើយខ្ញុំបង្រៀនកូនសិស្សខ្ញុំ ប៉ុន្តែខ្ញុំយល់ថា បើថតវីដេអូអាចឲ្យកូនៗនៅកន្លែងផ្សេងយកគំរូតាម ខិតខំរៀនសូត្រដូចគ្នា ខ្ញុំក៏ថតវីដេអូនោះឡើង ។រហូតមកដល់ពេលនេះ ខ្ញុំថតបានពីរវីដេអូ និងបន្តថតទៀត។»
តាមរយៈវីដេអូប្រមាណ៤នាទីដែលកុមារតូចៗបានឆ្លើយសំណួរអ្នកគ្រូដោយរីករាយ ដូចជា តើផ្ទៃដីព្រះរាជាណាចក្រកម្ពុជាមានទំហំប៉ុន្មាន? តើព្រះរាជាណាចក្រកម្ពុជាមានព្រំទល់ជាប់ប្រទេសណាខ្លះ? តើបាវវចនាជាតិមានអ្វីខ្លះ? ទង់ជាតិកម្ពុជាមានប៉ុន្មានពណ៌ ? ជាដើម ។
បើលោកអ្នកចឹងថា កុមារនៅសាលាបឋមសិក្សាអន្លង់រមៀត ដែលអប់រំបណ្តុះបណ្តាល ដោយអ្នកគ្រូ ស្រីណុច ឆ្លាតប៉ុណ្ណា សូមអញ្ជើញទស្សនាវីដេអូដែលយើងភ្ជាប់មកជាមួយនៅខាងក្រោយពីវីដេអូនេះ ។
និយាយពីអ្នកគ្រូ ស៊ីប ស្រីណុច វិញ គាត់បានចេញបង្រៀនកូនសិស្សបានរយៈ៧ឆ្នាំហើយ ។ អ្នកគ្រូមានលំនៅដ្ឋាននៅមិនឆ្ងាយពីសាលារៀនអន្លង់រមៀតប៉ុន្មាននោះទេ ។ នៅរៀងរាល់ថ្ងៃ អ្នកគ្រូ បានធ្វើដំណើរដោយម៉ូតូទៅបង្រៀនសិស្ស ដែលជាអាជីពអ្នកគ្រូស្រឡាញ់ ចូលចិត្តបំផុត ។
បង្រៀនពេលព្រឹក នៅពេលថ្ងៃអ្នកគ្រូត្រូវចំណាយពេលតែងការសម្រាប់បង្រៀនសិស្សនៅថ្ងៃស្អែកទៀត ។ ពេលខ្លះគាត់ត្រូវផលិតជាឧកបរណ៍សម្ភារៈសម្រាប់ពន្យល់កូនសិស្សឲ្យងាយយល់ផងដែរ ។
ក្រៅពីអាជីពជាគ្រូបង្រៀនអ្នកគ្រូ ឆ្លៀតលក់ដូរតិចតូចនៅផ្ទះដើម្បីបង្គ្រប់ជីវភាពគ្រួសារតូចមួយរបស់អ្នកគ្រូ ដែលមានស្វាមី និងកូនស្រីជាទីស្រឡាញ់ម្នាក់ទៀត ៕
ចែករំលែកព័តមាននេះ