ការបរិច្ចាគឈាមជាសកម្មភាពមនុស្សដ៏មានតម្លៃក្នុងការជួយសង្គ្រោះអាជីវិតពលរដ្ឋ ។ បច្ចុប្បន្នគេសង្កេតឃើញពលរដ្ឋមានការយល់ដឹងក្នុងការនាំគ្នាទៅបរិច្ចាគឈាម ។ ខ្លះទៅបរិច្ចាគជាលក្ខណៈបុគ្គល ខ្លះគេរៀបចំបរិច្ចាគឈាមជាក្រុម ជាស្ថាប័ន តែម្តង ។ កញ្ញានីកា…
ការបរិច្ចាគឈាមជាសកម្មភាពមនុស្សដ៏មានតម្លៃក្នុងការជួយសង្គ្រោះអាជីវិតពលរដ្ឋ ។ បច្ចុប្បន្នគេសង្កេតឃើញពលរដ្ឋមានការយល់ដឹងក្នុងការនាំគ្នាទៅបរិច្ចាគឈាម ។ ខ្លះទៅបរិច្ចាគជាលក្ខណៈបុគ្គល ខ្លះគេរៀបចំបរិច្ចាគឈាមជាក្រុម ជាស្ថាប័ន តែម្តង ។
កញ្ញានីកា ពលរដ្ឋរស់នៅភ្នំពេញ និយាយថា កញ្ញាបានផ្តើមបរិច្ចាគឈាមតាំងពី២០០០មក ។ រហូតមកដល់ពេលនេះ កញ្ញាបានបរិច្ចាគឈាមបានជាង១០លើកហើយក្នុងមួយឆ្នាំកញ្ញាបរិច្ចាគឈាមម្តង គឺនៅថ្ងៃខួបកំណើត ។ «ខ្ញុំចាត់ទុកការបរិច្ចាគឈាមជាអំពើល្អ អាចជួយសង្គ្រោះអ្នកដទៃបាន ដូច្នេះហើយខ្ញុំជ្រើសរើសយកថ្ងៃខួបកំណើតខ្លួនឯង ដើម្បីធ្វើអំពើល្អនេះ »។
បុរសម្នាក់ទៀតជាមន្ត្រីរាជការ ជាអ្នកបានបរិច្ចាគឈាមទៀងទាត់ម្នាក់ គាត់មានវ័យ៤២ឆ្នាំនេះ បានបរិច្ចាគឈាមមិនតិចជាង១០លើកនោះទេ ។ លោកថា ពេលខ្លះលោកបរិច្ចាគឈាមតាម រយៈក្រសួងដែលលោកធ្វើការ គេរៀបចំកម្មវិធីបរិច្ចាគឈាម ហើយពេលខ្លះលោកបានធ្វើដំណើរទៅកាន់មន្ទីរពេទ្យគន្ធបុប្ជា និងមជ្ឈមណ្ឌលជាតិផ្តល់ឈាម ធ្វើការបរិច្ចាគឈាមតែម្តង ។
លោកថា ការបរិច្ចាគឈាមមិនប៉ះពាល់សុខភាពឡើយ ហើយជាកុសលផង ។ ទោះមានពលរដ្ឋបានយល់ដឹងពីការបរិច្ចាគឈាមយ៉ាងណាក្តី តែគេសង្កេតឃើញថា នៅពេលពលរដ្ឋក្រីក្រ ឬអ្នកមានតម្រូវការឈាមបន្ទាន់ ការស្វែងរកឈាមតាមមន្ទីរពេទ្យ ឬកន្លែងផ្តល់ឈាម មានការលំបាក និងស្មុគស្មាញ ។
ជាទូទៅគេសង្កេតឃើញពលរដ្ឋត្រូវការឈាមរហូតផ្សព្វផ្សាយតាមវិទ្យុ អ្នកខ្លះទៀតជូនដំណឹងបន្ទាន់តាមហ្វេសប៊ុក និងមានពលរដ្ឋខ្លះទៀតចុះតាមផ្លូវ សុំគេឯងដែលធ្វើដំណើរឲ្យជួយបរិច្ចាគ ដើម្បីជួយសង្គ្រោះអាយជីវិតសាច់ញាតិខ្លួន ។
ជាក់ស្តែងថ្មីៗនេះ នៅពេលត្រូវការឈាមបន្ទាន់ ស្ត្រីម្នាក់បានឈរចិញ្ចើមផ្លូវលើកបដា «ត្រូវការឈាម» ស្វែងរកសប្បុរជនជួយបរិច្ចាគឈាម ។ ក្នុងឆ្នាំ២០២១ កន្លងទៅកម្ពុជាត្រូវការឈាមមួយប្លោក ដើម្បីជួយសង្គ្រោះអាយុជីវិតអ្នកជំងឺរៀងរាល់ ៦នាទីម្តង ដោយតម្រូវការឈាមប្រចាំថ្ងៃប្រមាណ ២០០ប្លោកនៅរាជធានីភ្នំពេញ និងតម្រូវការទូទាំងប្រទេសប្រមាណ១០ម៉ឺនប្លោក ដែលលើសពីឆ្នាំមុនជិត២០ភាគរយ ហើយមជ្ឈមណ្ឌលផ្តល់ឈាមបានគ្របដណ្តប់ជាង៧០ ភាគរយនៃការផ្គត់ផ្គង់ទូទាំងប្រទេស ។
ថ្លែងក្នុងកម្មវិធីបរិច្ចាគឈាមដោយស្ម័គ្រចិត្ត ក្រោមប្រធានបទ «រួមគ្នាបរិច្ចាគឈាមថ្ងៃនេះ ដើម្បីសង្គ្រោះជីវិតមាតា» កាលពីដើមខែមេសា ឆ្នាំ២០២២នេះ ក្រុមគ្រូពេទ្យបានបញ្ជាក់ថា ចំណែកការទទួលឈាមតាមរយៈសប្បុសជនដោយមិនគិតកម្រៃ និងដោយស្ម័គ្រចិត្តឆ្លើយតបបានប្រហែល១០ ភាគរយនៃតម្រូវការក្នុងប្រទេសប៉ុណ្ណោះ ខណៈប្រទេសជិតខាងការបរិច្ចាគឈាមដោយស្ម័គ្រចិត្តអាចផ្គត់ផ្គង់ដល់លើស៩០ ភាគរយនៃតម្រូវការ ។
អ្នកជំងឺដែលត្រូវការឈាមចាំបាច់បន្ទាន់មានដូចជា អ្នកជំងឺទាក់ទិននឹងការហូរឈាមតាមប្រដាប់រំលាយអាហារ ការវះកាត់ជំងឺបេះដូង គ្រោះថ្នាក់ចរាចរណ៍ ការហូរឈាមមិនប្រក្រតីនៅមុន និងក្រោយពេលសម្រាលកូន ជំងឺខ្សោយតំរង់នោម ការព្យាបាលថែទាំជំងឺមហារីក ពិសេសការដូរក្រលៀនជាដើម ៕
ចែករំលែកព័តមាននេះ