ខេត្តកំពង់ស្ពឺ ៖ ក្រុមបងធំជនបទមួយក្រុមក្នុងនោះមាន២នាក់បងប្អូនជាជើងខ្លាំង ព្រមទាំងគូកន ត្រួវបានសមត្ថកិច្ចតាមចាប់ខ្លួនបន្ទាប់ពីប្រព្រឹត្រអំពើហិ.ង្សាគប់ និងវាយ …
ខេត្តកំពង់ស្ពឺ ៖ ក្រុមបងធំជនបទមួយក្រុមក្នុងនោះមាន២នាក់បងប្អូនជាជើងខ្លាំង ព្រមទាំងគូកន ត្រួវបានសមត្ថកិច្ចតាមចាប់ខ្លួនបន្ទាប់ពីប្រព្រឹត្រអំពើហិង្សាគប់ និងវាយបំផ្លាញឧបករណ៍តន្ត្រី ដែលកំពុងប្រគំក្នុងកម្មវិធីឡើងផ្ទះរបស់អ្នកភូមិម្នាក់ ។ ហេតុការណ៍នេះកើតឡើងកាលពីវេលាម៉ោង១០ និង៣០នាទីព្រឹក ថ្ងៃទី៨ ខែមករា ឆ្នាំ២០១៧ នៅភូមិអង្គរមាស ឃុំជង្រុក ស្រុកគងពិសី ខេត្តកំពង់ស្ពឺ ។
ប្រភពពីក្រុមតន្ត្រីករបានឲ្យដឹងថា វង់តន្ត្រីរបស់ខ្លូន(រង់តន្ត្រីរបស់លោក សុវណ្ណ ថេត ផ្សារដើមរកា)ត្រូវបានម្ចាស់ផ្ទះជួលឲ្យមកប្រគំក្នុងកម្មវិធីឡើងផ្ទះនៅភូមិឃុំខាងលើដើម្បីកំដរភ្ញៀវតាំងពីហូបអាហាររហូតដល់រាំលេងកំសាន្តមិនមានបញ្ហាអ្វីនោះទេ ប៉ុន្តែស្រាប់តែមុនពេលកើតហេតុលេចមុខក្មេងស្ទាវមួយក្រុមបានយកដុំថ្ម ដុំដី និងដំបង គប់មកលើក្រុមតន្ត្រីដែលកំពុងតែច្រៀងកំដរកម្មវិធីបណ្ដាលឲ្យអ្នកចម្រៀងភ័យលែងហ៊ានច្រៀង ហើយភ្លងក៏លែងហ៊ានប្រគំដែរ ។
ប្រភពបន្តទៀតថា ក្រោយពេលគប់មកលើអ្នកចម្រៀងហើយ ក្រុមក្មេងស្ទាវទាំងនោះបានគប់បំផ្លាញឩបករណ៍ភ្លេង និងវាយបំផ្លាញរថយន្ត ព្រមទាំងសម្ភារផ្សេងៗទៀតជាច្រើន ។
ក្រោយកើតមានអំពើហិង្សាពីសំណាក់ក្រុមបងធំជនបទរួចមក ក្រុមតន្ត្រីបានរាយការណ៍ និងសុំអន្តរាគមន៍ពីសំណាក់នគរបាលប៉ុស្តិ៍ជង្រុកដែលនៅជិតនោះដែរ តែពេលទៅដល់មិនឃើញមានមន្ត្រីនគរបាលណាម្នាក់នៅប្រចាំការឡើយ ក៏ទូរស័ព្ទរកលោកអធិការរងនគរបាលស្រុកគងពិសី ប៉ុន្តែក្រោយពេលទូរស័ព្ទរួចយ៉ាងយូរទើបឃើញមន្ត្រីនគរបាលព្រហ្មទណ្ឌប៉ុស្តិ៍មួយរូបទៅដល់កន្លែងកើតហេតុទាំងអាការៈស្រវឹងជោក ។ វត្តមានរបស់មន្ត្រីនគរបាលប៉ុស្តិ៍រូបនោះមិនត្រូវបានក្រុមបងបធំទាំងនោះខ្លាចញញើតឡើយ ពួកគេថែមទាំងបានសើចចំអកដល់មន្ត្រីនគរបាលនោះថា មិនហ៊ានធ្វើអ្វីគេទៀតផង ។ មួយសន្ទុះធំក្រោយមកទើបពួកបងធំជនបទទាំងនោះបានរត់គេចខ្លួន ខណៈមន្ត្រីនគរបាលរូបនោះស្នើសុំកម្លាំងបន្ថែម ដើម្បីឃាត់ខ្លួនពួកគេ ។
មន្ត្រីនគរបាលមួយរូបដែលអះអាងថា ខ្លួននៅប្រចាំការនៅប៉ុស្តិ៍រដ្ឋបាលជង្រុក បាននិយាយថា ពួកមុខសញ្ញាដែលបានប្រព្រឹត្តអំពើហិង្សាទាំងអស់នោះ គឺគាត់ស្គាល់អត្តសញ្ញាណខ្លះហើយ ដូច្នេះសូមឲ្យខាងភ្លេងរៀបចំទុកដាក់អីវាន់វិលត្រឡប់ទៅផ្ទះវិញសិន ចាំព្រឹកចាំធ្វើកំណត់ហេតុ ។ មុខសញ្ញាបងធំ២នាក់បងប្អូនត្រូវបានស្គាល់ច្បាស់ជាងគេគឺឈ្មោះ ឌឿន និង ឈ្មោះ ដា មានទីលំនៅភូមិ-ឃុំកើតហេតុតែម្តង ។ មុខសញ្ញាបងធំទាំង២នាក់នេះគឺតែងតែបង្កការអុកឡុកនៅតាមកម្មវិធីបុណ្យ ឬការណាដែលមានដាក់អកកេស ឬចាក់ធុងបាស់ មិនដែលខាននោះទេ ។ ជនទាំង២នាក់នេះតែងតែរត់គេខ្លួនក្រោយបង្កហេតុម្តងៗ តែជននេះក៏ធ្លាប់ត្រូវបានសមត្ថកិច្ចចាប់ឃាត់ខ្លួនក្នុងបទប្រព្រឹត្តអំពើហិង្សាយកទៅដាក់គុកដែរកាលពីពេលកន្លងទៅ តែមិនឃើញជាប់យូរនោះទេ ឃើញវិលមកវិញហើយប្រព្រឹត្តលើសដើម ។
ភ្ញៀវ និងសាច់ញាតិម្ចាស់កម្មវិធីឡើងផ្ទះដែលនៅក្នុងកម្មវិធីបានរិះគន់ត្រង់ៗថា នគរបាលប៉ុស្តិ៍ជង្រុកហាក់បីដូចជាខ្លាចញញើតអំណាចក្មេងពាល មិនហ៊ានហៅសួរនាំ ធ្វើកំណត់ហេតុឡើយ ទុកឱកាសឲ្យក្រុមក្មេងពាលទាំងនោះដើរចេញពីកន្លែងបង្កយ៉ាងរំភើយ ។ ពួកគាត់បន្តថា នៅក្នុងភូមិកើតហេតុឲ្យតែមានបុណ្យ ឬការ គឺក្រុមក្មេងពាលទាំងនេះតែងតែបង្កការអុកឡុកមិនដែលខានឡើយ ។
ប្រជាពលរដ្ឋបានរិះគន់លោកនាយប៉ុស្តិ៍ផងដែរពាក់ព័ន្ធនឹងក្រុមក្មេងពាលទាំងនេះ ដោយអ្នកខ្លះលើកឡើងថា លោកនាយប៉ុស្តិ៍ហាក់មិនមានសមត្ថភាពក្នុងការបង្ក្រាបក្រុមបងធំជនបទទាំងនេះឡើយ មិនដឹងថា តើមានមូលហេតុអ្វីនោះទេ បានជាមិនសូវឃើញចាប់ខ្លួននៅពេលប្រព្រឹត្ត ។ ពួកគេប្រព្រឹត្តអំពើហិង្សាកាប់ចាក់១០ដង ឃើញសមត្ថកិច្ចចាប់ម្តង ហើយបើរឿងជាប់គុកវិញក៏ជាប់មិនដែលបានយូរឡើយ មិនដឹងថាយ៉ាងណានោះទេ ឬមួយក្រុមក្មេងពាលទាំងនោះមានខ្នងបង្អែកក្រាស់ទើបសមត្ថកិច្ចញញើតមិនសូវហ៊ានបង្ក្រាប?
ដោយឡែកម្ចាស់ដើមការវិញមិនហ៊ានមាត់កអ្វីទាំងអស់ ដោយសុំទុកឲ្យសមត្ថកិច្ចធ្វើការសិន ។
ម្ចាស់វង់ភ្លេងរង់ចាំមើលថា តើសមត្ថកិច្ចនគរបាលជង្រុក និងជំនាញព្រហ្មទណ្ឌស្រុកគងពីសី អាចចាប់ខ្លួនក្រុមបងធំទាំងនេះយកមកចាត់ការតាមផ្លូវច្បាប់បានដែរឬយ៉ាងណា ដើម្បីឲ្យគាត់ទទួលបានសំណងការខូចខាតមកវិញផងដែរ ។
នៅព្រឹកថ្ងៃទី៩ ខែមករា ឆ្នាំ២០១៧នេះ លោក សម សាមួន ស្នងការនគរបាលខេត្ត បានប្រាប់ថា មិនទាន់ឃើញខាងអធិការស្រុករាយការណ៍មកលោកនៅឡើយទេ ហើយករណីនេះលោកនឹងចាត់ខាងជំនាញព្រហ្មទណ្ឌចុះស្រាវជ្រាវ ដើម្បីចាប់ខ្លួនក្រុមក្មេងស្ទាវទាំងនោះយកមកចាត់ការតាមច្បាប់ ៕
ចែករំលែកព័តមាននេះ