កម្ពុជាបំបែកកំណត់ត្រាឈ្នះមេដាយហួសការកំណត់ពីព្រឹត្តិការណ៍អាស៊ានប៉ារ៉ាហ្គេម
- ភ្នំពេញ
ឥណ្ឌូនេស៊ី ៖ ជារឿងគួរឱ្យមោទនភាពបំផុតខណៈដែលព្រឹត្តិការណ៍កីឡាជនពិការហៅកាត់ថា អាស៊ាន
ឥណ្ឌូនេស៊ី ៖ ជារឿងគួរឱ្យមោទនភាពបំផុតខណៈដែលព្រឹត្តិការណ៍កីឡាជនពិការហៅកាត់ថា អាស៊ានប៉ារ៉ាហ្គេមមិនទាន់ចប់នៅឡើយ កម្ពុជាបែរជាដណ្ដើមបានមេដាយហួសពីការរំពឹងទុកទៅទៀត ។
ឯកឧត្តម យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា និងជានាយបេសកកម្មអត្តពលិកជនពិការកម្ពុជាចូលរួមប្រកួតអាស៊ានប៉ារ៉ាហ្គេម លើកទី១១ នៅឥណ្ឌូនេស៊ី ធ្លាប់បានឲ្យដឹងថា កម្ពុជាបានកំណត់យកមេដាយមាសឲ្យបានចំនួន៣គ្រឿងពីព្រឹត្តិការណ៍កីឡាជនពិការដ៏ធំប្រចាំតំបន់មួយនេះ។ ចំណែកមេដាយប្រាក់ និងសំរឹទ្ធ ត្រូវរកឲ្យបានច្រើនគ្រឿងផងដែរ។
អ្វីដែលស្មានមិនដល់នោះគឺគិតត្រឹមព្រឹកថ្ងៃទី៤ ខែសីហា បន្ទាប់ពីបើកដំណើរការប្រកួតតាំងពីថ្ងៃទី៣០ ខែកក្កដា ក្រុមអត្តពលិកជនពិការកម្ពុជាឈ្នះបានមេដាយមាស៦គ្រឿង មេដាយប្រាក់៨គ្រឿង និងមេដាយសំរឹទ្ធ៨គ្រឿង ។ ដូច្នេះមានន័យថា កម្ពុជាទទួលបានមេដាយមាសលើសចំនួនកំណត់ហើយ ខណៈការប្រកួតនៅមានវិញ្ញាសាជាច្រើនទៀត។
មិនត្រឹមឈ្នះមេដាយមាសលើសគោលដៅកំណត់ប៉ុណ្ណោះទេ ក្រុមអត្តពលិកជនពិការកម្ពុជាឈ្នះបានមេដាយសរុបច្រើនជាងព្រឹត្តិការណ៍អាស៊ានប៉ារ៉ាហ្គេមមុនៗទាំងអស់ ពោលគឺឈ្នះសរុប១៩គ្រឿង ប្រៀបធៀបនឹងកាលឆ្នាំ២០០១ បាន៣គ្រឿង, ឆ្នាំ២០០៣ បាន៩គ្រឿង, ឆ្នាំ២០០៥ បាន៥គ្រឿង, ឆ្នាំ២០០៧ បាន១គ្រឿង,ឆ្នាំ២០០៩ បាន៧គ្រឿង, ឆ្នាំ២០១១ បាន៧គ្រឿង, ឆ្នាំ២០១៣ បាន៩គ្រឿង, ឆ្នាំ២០១៥ បាន ៩គ្រឿង និងឆ្នាំ២០១៧ បាន១០គ្រឿង។ការឈ្នះមេដាយមាសគិតត្រឹមពេលនេះ៦គ្រឿងក៏ជាការឈ្នះមេដាយមាសច្រើនជាងលើកណាៗទាំងអស់គិតចាប់ពីលើកទី១រហូតដល់លើកទី៩។
គួរឱ្យដឹងផងដែរថា ព្រឹត្តិការណ៍កីឡាអាស៊ានប៉ារ៉ាហ្គេម លើកទី១១ នៅឥណ្ឌូនេស៊ី បានចាប់ផ្ដើម
ធ្វើពីថ្ងៃទី៣០ ខែកក្កដា ដល់ថ្ងៃទី០៦ ខែសីហា ឆ្នាំ២០២២ ក្នុងនោះកម្ពុជា បានបញ្ជូនកីឡា១១ប្រភេទចូលរួមប្រកួត គឺកីឡាអត្តពលកម្ម ហែលទឹក បាល់ទះអង្គុយបុរស និងនារី បាល់បោះរទេះបុរស និងនារី បាល់បោះជនពិការភ្នែក បាល់ទាត់ចលករខួរក្បាល (៥ម្ខាង) វាយកូនឃ្លីលើតុ វាយសី លើកទម្ងន់ អុកអន្តរជាតិ និងប៊ូស្យា ៕
ចែករំលែកព័តមាននេះ