តាមការគ្រោងទុកលោក លិ សុខា ចៅក្រមជំនុំជម្រះសាលាដំបូងរាជធានី ភ្នំពេញ នៅព្រឹកថ្ងៃទី៤ ខែសីហា ឆ្នាំ២០២២នេះ បានប្រកាសសាលក្រមផ្តន្ទាទោសលើជនជាប់ចោទអតីតស្នងការរងខេត្តកំពង់ឆ្នាំង ពាក់ព័ន្ធ
រាជធានីភ្នំពេញ ៖ តាមការគ្រោងទុកលោក លិ សុខា ចៅក្រមជំនុំជម្រះសាលាដំបូងរាជធានី ភ្នំពេញ នៅព្រឹកថ្ងៃទី៤ ខែសីហា ឆ្នាំ២០២២នេះ បានប្រកាសសាលក្រមផ្តន្ទាទោសលើជនជាប់ចោទអតីតស្នងការរងខេត្តកំពង់ឆ្នាំង ពាក់ព័ន្ធដីធ្លីនៅតំបន់៣ បឹងទន្លេសាប ខេត្តកំពង់ឆ្នាំង ។
សាលក្រមនេះ បានប្រកាសផ្តន្ទាទោសលើឈ្មោះ ស៊ុ សុជាតិ ហៅឈុយ ភេទប្រុស អាយុ៥១ ឆ្នាំ អតីតជាស្នងការរងខេត្តកំពង់ឆ្នាំង ដាក់ពន្ធនាគារកំណត់៤ឆ្នាំ និងពិន័យជាប្រាក់ចូលថវិការដ្ឋចំនួន៥០លានរៀល ព្រមទាំងដកហូតប្រាក់ជាង៥០ម៉ឺនដុល្លារអាមេរិក ពាក់ព័ន្ធពីបទ បំផ្លិចបំផ្លាញ និងគៃបំបាត់, បទ ហ៊ុមព័ទ្ធកាន់កា.ប់ដីព្រៃលិចទឹក, បទ មិនប្រកាសទ្រព្យសម្បត្តិ និងបំណុល និងបទ សម្អាតប្រាក់ ។
សាលក្រមនេះ ទុកសិទ្ធិឲ្យជនជាប់ចោទប្តឹងឧទ្ធរណ៍តាមកំណត់ច្បាប់ បើសិនមិនសុខចិត្តចំពោះការកាត់ក្តីនេះ ។
សូមជម្រាបថា កាលពីព្រឹកថ្ងៃទី២១ ខែកក្កដា ឆ្នាំ២០២២ បានលើកយកសំណុំរឿងខាងលើនេះ មកបើកសវនាការជំនុំជម្រះក្តីពាក់ព័ន្ធករណីបំផ្លិចបំផ្លាញ ហ៊ុមព័ទ្ធ កាន់កា.ប់ដីព្រៃលិចទឹក នៅចំណុចតំបន់៣ នៃបឹងទន្លេសាប ស្ថិតក្នុងភូមិសាស្ត្រភូមិកង្កែប និងភូមិធ្លក ឃុំច្រណូក ស្រុកកំពង់លែង ខេត្តកំពង់ឆ្នាំង ។ សវនាការបានសាកសួរដេញដោលចប់សព្វ និងបានលើកពេលប្រកាសសាលក្រមផ្តន្ទាទោសលើជនជាប់ចោទ នៅថ្ងៃទី៤ ខែសីហា នេះ ។
សំណុំរឿងនេះ លោក កូយ សៅ អនុប្រធានសាលាដំបូងរាជធានីភ្នំពេញ ជាចៅក្រមស៊ើបសួរនៅព្រឹកថ្ងៃទី១៩ ខែធ្នូ ឆ្នាំ២០២១ បានសម្រេចចេញដីកាឃុំខ្លួនស្នងការរង និងប្រធានការិយាល័យអន្តរាគមន៍ និងតម្រួត បទបញ្ជានៃស្នងការដ្ឋាននគរបាលខេត្តកំពង់ឆ្នាំង ដាក់ពន្ធនាគារជាបណ្តោះអាសន្ន ។
ការសម្រេចឃុំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ ដោយយោងទៅលើស្ថាប័នអយ្យការបានចោទប្រកាន់ឧត្តមសេនីយ៍ត្រី ស៊ុ សុជាតិ ហៅឈុយ ជាស្នងការរងខេត្តកំពង់ឆ្នាំង ពីបទ បំផ្លាញ និងគៃបំបាត់ បទហ៊ុមព័ទ្ធកាន់កា.ប់ដីព្រៃលិចទឹក បទមិនប្រកាសទ្រព្យសម្បត្តិ និងបំណុល និងបទ សម្អាតប្រាក់ ដែលប្រព្រឹត្តនៅចំណុចដែនព្រៃលិចទឹកតំបន់៣ នៃបឹងទន្លេសាប ក្នុងភូមិសាស្ត្រភូមិកង្កែប និងភូមិធ្លក ឃុំច្រណូក ស្រុកកំពង់លែង ខេត្តកំពង់ឆ្នាំង កាលពីអំឡុងឆ្នាំ២០១៧ ដល់ឆ្នាំ២០២១ ជាបទល្មើសព្រហ្មទណ្ឌ និងត្រូវផ្តន្ទាទោស តាមបញ្ញត្តិ មាត្រា៦០៨ នៃក្រមព្រហ្មទណ្ឌ និងមាត្រា៨៨ នៃច្បាប់ស្តីពីជលផល និងមាត្រា៣២, មាត្រា៣៨ នៃច្បាប់ស្តីពីការប្រឆាំងអំពើពុករលួយ និងមាត្រា ៣ ថ្មី មាត្រា ២៨ ថ្មី ១ នៃ ច្បាប់ស្តីពីវិសោធនកម្មច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទាន ភេរវកម្ម ។
សំណុំរឿងនេះ តំណាងអយ្យការ ក៏បានធ្វើការចោទប្រកាន់លោកវរសេនីយ៍ឯក កែវ ណា រុន ភេទប្រុស អាយុ៥៩ឆ្នាំ ជាប្រធានការិយាល័យអន្តរាគមន៍ និងតម្រួតបទបញ្ជានៃស្នងការដ្ឋាននគរបាលខេត្តកំពង់ឆ្នាំង ពីបទបំផ្លាញ និងតៃបំបាត់ បទហ៊ុមព័ទ្ធកាន់កា.ប់ដីព្រៃលិចទឹក និងបទ មិនប្រកាសទ្រព្យសម្បត្តិ និងបំណុល ដែលប្រព្រឹត្តនៅចំណុចដែនព្រៃលិចទឹក នៃតំបន់៣ នៃបឹងទន្លេសាប ស្ថិតក្នុងភូមិសាស្ត្រភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង កាលពីអំឡុងឆ្នាំ២០១៧ ដល់ឆ្នាំ២០២១ ជាបទល្មើសព្រហ្មទណ្ឌ និងត្រូវផ្តន្ទាទោសតាមបញ្ញត្តិ មាត្រា៦០៨ នៃក្រមព្រហ្មទណ្ឌ និងមាត្រា៩៨ នៃច្បាប់ស្តីពីជលផល និង មាត្រា៣២, មាត្រា៣៨ នៃច្បាប់ស្តីពីការប្រឆាំងអំពើពុករលួយ ។
ប៉ុន្តែនៅពេលសវនាការ និងរហូតដល់ថ្ងៃប្រកាសសាលក្រម ជនជាប់ចោទឈ្មោះ កែវ ណា រុន ប្រធានការិយាល័យអន្តរាគមន៍ និងតម្រួតបទបញ្ជា នៃស្នងការដ្ឋាននគរបាលខេត្តកំពង់ឆ្នាំង មិនឃើញមុខទេ បើតាមមន្ត្រីតុលាការបង្ហើបឲ្យដឹងថា អាចបំបែកសំណុំរឿងនេះ ដាច់ដោយឡែកពីគ្នា…៕
ចែករំលែកព័តមាននេះ