ក្រុមបាល់ទះអង្គុយជនពិការកម្ពុជាត្រៀមប៉ះថៃនៅវគ្គផ្ដាច់ព្រ័ត្រដណ្ដើមមេដាយមាស
រាជធានីភ្នំពេញ ៖ ក្រុមកីឡាបាល់ទះអង្គុយជនពិការកម្ពុជា បន្ទាប់ពីបានយកឈ្នះលើក្រុមម្ចាស់ផ្ទះ
រាជធានីភ្នំពេញ ៖ ក្រុមកីឡាបាល់ទះអង្គុយជនពិការកម្ពុជា បន្ទាប់ពីបានយកឈ្នះលើក្រុមម្ចាស់ផ្ទះឥណ្ឌូនេស៊ីនៅវគ្គពាក់កណ្ដាលផ្ដាច់ព្រ័ត្រនៃព្រឹត្តិការណ៍អាស៊ានប៉ារ៉ាហ្គេមលើកទី១១ ឆ្នាំ២០២២ នៅទីក្រុងសូឡូ កាលពីរសៀលថ្ងៃទី២ សីហា ទាំងប្រផិតប្រផើយក្នុងលទ្ធផល៣-២រួចមក បានត្រៀមខ្លួនទៅប៉ះក្រុមថៃនៅវគ្គផ្ដាច់ព្រ័ត្រដណ្ដើមយកមេដាយមាស។
លោក អ៊ូ ផល្លា ប្រធានក្រុមបាល់ទះអង្គុយជនពិការកម្ពុជា បានឱ្យដឹងថា មុនការប្រកួតលោកគិតថាប្រហែលជាមិនអីនោះទេ តែដល់ពេលប្រកួតសិតដំបូងទើបដឹងថាយើងធ្វើមិនបានល្អទាល់តែសោះដោយសារតែយើងប្រឹងពេក ។ យើងព្យាយាមលេងទម្លាក់ដោយមើលងាយគូប្រកួតព្រោះយើងធ្លាប់មើលគេលេងកន្លងមកឃើញថាគេជាក្រុមអន់ ។ យើងគប់បាល់ល្អដល់ពេលទម្លាក់ពេកទៅជាជាប់សំណាញ់ជាច្រើនលើកនិងចាញ់ម្ចាស់ផ្ទះក្នុងលទ្ធផល២១-២៥នៅក្នុងសិតទី១ ។សិតទី២យើងឈ្នះក្នុងលទ្ធផល២៥-១៥ សិតទី៣យើងចាញ់ក្នុងលទ្ធផល២១-២៥ សិតទី៤យើងឈ្នះក្នុងលទ្ធផល២៥-១៣ និងសិតចុងក្រោយយើងឈ្នះក្នុងលទ្ធផល១៥-១១។ តាមរយៈជ័យជម្នះនេះ ធ្វើឱ្យកម្ពុជាមានឱកាសឡើងទៅកាន់វគ្គផ្ដាច់ព្រ័ត្រដណ្ដើមយកមេដាយមាសជាមួយក្រុមថៃ។
ទោះបីយ៉ាងណា លោកអ៊ូ ផល្លា បង្ហាញការបារម្ភខ្លាំងពេលឡើងទៅប៉ះក្រុមថៃ នៅថ្ងៃទី៤សីហា នេះ ។
ការប្រកួតលើកចុងក្រោយនេះត្រូវបានគេចាត់ទុកថាជាការប្រកួតដ៏លំបាកមួយ ដែលមិនអាចធ្វេសប្រហែសបានឡើយដោយសារទាំងសងខាងសុទ្ធតែបានដាក់ក្ដីរំពឹងខ្ពស់ដើម្បីឈានទៅដណ្ដើមយកមេដាយមាសដូចគ្នា ។ ខណៈក្រុមឥណ្ឌូនេស៊ី ត្រូវប្រជែងយកមេដាយសំរឹទ្ធជាមួយក្រុមមីយ៉ាន់ម៉ាដែលចាញ់ក្រុមថៃ នៅថ្ងៃជាមួយគ្នានេះ ដែរ ៕
ចែករំលែកព័តមាននេះ