រាជធានីភ្នំពេញ ៖ នៅយប់ថ្ងៃអាទិត្យទី៨ មករា ខានស្អែកនេះ ប្រដាល់«កំពូលជើងឯកស្រាបៀរប្លេកខេត» នឹងដល់ថ្ងៃកំណត់ត្រូវប្រកួតអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និងថៃ២រូបប៉ះគ្នា ។
ការប្រកួតដែលនឹងចាប់ផ្ដើមឡើងពីម៉ោង៨យប់នៅលើសង្វៀនទូរទស្សន៍អាស៊ីអាគ្នេយ៍នេះ នៅតែមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ បើទោះជាបរិយាកាសដែលគ្រោងប្រកួតឡើងអាចនឹងចំពលរដ្ឋមួយចំនួនមិនទាន់ត្រឡប់មកពីដើរកម្សាន្តតាមខេត្ត ព្រោះតែបានសម្រាកតាំងពីថ្ងៃ៧ មករានៅឡើយ ។ អ្នករៀបចំកម្មវិធីបានអះអាងថា អ្នកទស្សនានឹងនៅតែមកដោយសារតែក្នុងចំណោមអ្នកដើរលេងនាថ្ងៃបុណ្យចំថ្ងៃសៅរ៍ភ្ជាប់នឹងថ្ងៃអាទិត្យនោះ ក៏មិនច្រើនដូចថ្ងៃឆ្លងឆ្នាំ និងបុណ្យសាកលកន្លងទៅដែរ ។ កីឡាករកម្ពុជា២រូបគឺ វៀត ប៊ុនឌឿន និង សូត្រ ប៊ុនធី នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅយប់ថ្ងៃអាទិត្យខានស្អែក ។
អ្នករៀបចំការប្រកួតបានអះអាងថា កីឡាករទាំង៤រូបមានបំណងប៉ះគ្នាយូរហើយ ជាក់ស្ដែងកីឡាករកម្ពុជាគ្រាន់តែបានដឹងថា នឹងត្រូវឡើងប្រកួតជាមួយកីឡាករថៃទាំង២រូបក៏ទទួលយកដោយការពេញចិត្តហើយក៏បានត្រៀមខ្លួនក្នុងការប៉ះគ្នាផងដែរ ។ លោកថា កីឡាករកម្ពុជាទាំងពីរសុទ្ធតែបានត្រៀមខ្លួនមុនពេលប៉ះគ្នា ដោយបានចំណាយពេលច្រើនជាងមួយសប្ដាហ៍ក្នុងការហ្វឹកហាត់នោះផង ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ វៀត ប៊ុនឌឿន មកពីក្លិបក្រសួងការពារជាតិ ឱ្យឡើងប៉ះប្រកួតជាមួយកីឡាកថៃឈ្មោះYorth Mongkul ក្នុងនាមជាគូបើកឆាកអន្តរជាតិនៅយប់ថ្ងៃអាទិត្យនោះ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់ឱ្យគេប៉ះគ្នាជាមួយគូបរទេសនៅក្នុងព្រឹត្តិការណ៍នេះតែម្ដង ។ លោកថា កីឡាករ វៀត ប៊ុនឌឿន អាចចាត់ទុកថាជាជើងខ្លាំងម្នាក់ នៅលើសង្វៀនប្រដាល់អន្តរជាតិ Black Cat ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។ លោកជឿជាក់ថា កីឡាកររូបនេះនឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថាជំនួបរវាងវៀត ប៊ុនឌឿន ជាមួយកីឡាករថៃក៏នឹងមិនធម្មតាសម្រាប់ការប្រកួតទាំងមូល ។
លោកថា កីឡាករកម្ពុជារូបនេះ មានការឈានឡើងសមត្ថភាព ហើយការប្រកួតប៉ុន្មានលើកចុងក្រោយ គឺមានសមត្ថភាព ទើបលោកសម្រេចចិត្តឱ្យគេឡើងប្រកួតជាមួយកីឡាករថៃខាងលើ បើទោះជាកីឡាករថៃជាគូប្រកួតរបស់គេក៏មានសមត្ថភាពមិនអាចមើលស្រាលបានក្ដី ។
លោកនិយាយថា វៀត ប៊ុនឌឿន ដ្បិតថាមិនមែនជាម្ចាស់ជើងឯកប៉ុន្តែការប្រកួតកន្លងមករបស់គេ ក៏មានលទ្ធផលជាវិជ្ជមានច្រើនដែរ ទើបលោកសម្រេចចិត្តដាក់ឱ្យប្រកួតជាមួយកីឡាករ Yorth Mongkul ដែលជាជើងខ្លាំងម្នាក់ ។ កីឡាករថៃ ទើបតែធ្លាប់ប្រកួត៥៩លើក ឈ្នះ៥១លើក និងចាញ់៨លើក ប៉ុន្តែបើមើលលើសមត្ថភាពរបស់កីឡាកររូបនេះមិនអាចមើលស្រាលបានឡើយ ។ ដោយឡែក សម្រាប់កីឡាករកម្ពុជាធ្លាប់ប្រកួត៧២លើក ឈ្នះ៥៧លើក ចាញ់១៣លើក និងស្មើ២លើក ។
សម្រាប់កីឡាករ សូត្រ ប៊ុនធី មកពីក្លិបបក្សាស្លាបដែក លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងមកពីប្រទេសថៃដូចគ្នាឈ្មោះ Phik Rabkhav នៅក្នុងព្រឹត្តិការណ៍ប្រដាល់អន្តរជាតិរបស់ស្រាបៀរ Black Cat នៅយប់ថ្ងៃអាទិត្យនោះដែរ។
លោកថា ការប្រកួតរបស់គូនេះនៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែល សូត្រ ប៊ុនធី ដ្បិតថាល្បីឈ្មោះតែការប្រកួតពេលខ្លះក៏ល្អ ហើយពេលខ្លះក៏ធ្លាក់ដៃដែលធ្វើឱ្យអ្នកគាំទ្រពិបាកស្ទង់សម្រាប់សមត្ថភាពចុងក្រោយរបស់គេ ។ លោកថា កីឡាករថៃធ្លាប់ប្រកួត៦៥លើក ឈ្នះ៥២លើក និងចាញ់១៣លើក រីឯកីឡាករកម្ពុជាធ្លាប់ប្រកួត៨៤លើក ឈ្នះ៦៨លើក ចាញ់១៣លើក និងស្មើ៤លើកនៅលើសង្វៀន ។ នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនអាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិផងដែរ ។
ដោយឡែកនៅលើសង្វៀនទូរទស្សន៍ប៉ុស្ដិ៍លេខ៥ជ្រោយចង្វាឯណោះវិញ ក៏មានការប្រកួតដ៏សំខាន់ផងដែរនៅក្នុងព្រឹត្តិការណ៍ TV5 Knock Out Series ក្នុងវគ្គ៣២នាក់យក១៦នាក់សម្រាប់វគ្គបន្តនៅថ្ងៃសៅរ៍នេះចាប់ពីម៉ោង៥ល្ងាចតទៅ៕
ចែករំលែកព័តមាននេះ