ADផ្ទាំងផ្សព្វផ្សាយពាណិជ្ជកម្ម

Picture

សមាជិក CONMEBOL ចំនួន​៤​ចូលរួម​ដេញថ្លៃ​រួម​គ្នា​ធ្វើ​ម្ចាស់ផ្ទះ World Cup 2030

1 អាទិត្យ មុន

បរទេស ៖ សមាជិកសមាគម​បាល់ទាត់​អា​មេ​រិ​ក​ខាងត្បូង (CONMEBOL) ចំនួន​៤​រួម​មាន អា​ហ្ស​ង់​ទី​

បរទេស ៖ សមាជិកសមាគម​បាល់ទាត់​អា​មេ​រិ​ក​ខាងត្បូង (CONMEBOL) ចំនួន​៤​រួម​មាន អា​ហ្ស​ង់​ទី​ន ឈី​លី អ៊ុយ​រ៉ា​ហ្គា​យ និង​ប៉ា​រ៉ា​ហ្គា​យ បាន​ប្រកាស​ដាក់​ដេញថ្លៃ​រួម​គ្នា ដើម្បី​ធ្វើ​ជា​ម្ចាស់ផ្ទះ​ព្រឹត្តិការណ៍ World Cup ឆ្នាំ ២០៣០​។ នេះ​បើ​យោង​តាម​ប្រភព​ពី BBC ចេញផ្សាយ​នៅ​ថ្ងៃ​ទី​៣ ខែសីហា ឆ្នាំ​២០២២ នេះ​។

ព្រឹត្តិការណ៍ World Cup បាន​ប្រសូត​ឡើងជា​លើក​ដំបូង​នៅ​ក្នុង​ឆ្នាំ ១៩៣០​។ ហើយ​ឆ្នាំ​នោះ អ៊ុយ​រ៉ា​ហ្គា​យ​គឺជា​ម្ចាស់ផ្ទះ​លើក​ដំបូង​បំផុត​របស់​ប្រវត្តិសាស្ត្រ​។ ហើយ​អ្វី​កាន់តែ​ពិសេស​ទៅ​ទៀត​នោះ ពួក​គេ​ក៏​ជា​ម្ចាស់​ជើងឯក​ផង​ដែរ ក្រោយ​យកឈ្នះ​លើ​អា​ហ្ស​ង់​ទី​ន​ដោយ​លទ្ធផល ៤-២​។ ដូច្នេះ​អ៊ុយ​រ៉ា​ហ្គា​យ​ចង់​នាំ​យក​ការ​ប្រកួតប្រជែង​បាល់ទាត់​ដ៏​អស្ចារ្យ និង​ធំ​បំផុត​របស់​ពិភពលោក​មួយ​នេះ ត្រឡប់​មក​វិញ​ម្តងទៀត ចំ​ពេល​នៃ​ការ​ប្រារព្ធ​ខួប​១០០​ឆ្នាំ​របស់​ខ្លួន​។

ប្រទេស​ឈី​លី ក៏​ធ្លាប់​ធ្វើ​ជា​ម្ចាស់​ព្រឹត្តិការណ៍​ជា​ប្រវត្តិសាស្ត្រ​នេះ​ម្តង​ផង​ដែរ នៅ​ក្នុង​ឆ្នាំ ១៩៦២​។ ដោយ​គ្រានោះ ពួក​គេ​បញ្ចប់​ទៅ​ត្រឹម​ចំណាត់ថ្នាក់​លេខ​៣ តាម​រយៈ​ការ​ឈ្នះ​យូ​ហ្គោ​ស្លា​វី​លទ្ធផល ១-០​។ ចំណែកឯ​អា​ហ្ស​ង់​ទី​ន ក៏​ធ្លាប់​ធ្វើ​ម្ចាស់ផ្ទះ​ម្តង​ផង​ដែរ នៅ​ក្នុង​ឆ្នាំ ១៩៧៨​។ ហើយ​ក៏​ជា​ឆ្នាំ​ដែល​ពួក​គេ​ឈ្នះ​ជើងឯក​ផង​ដែរ ក្រោយ​យកឈ្នះ​លើ​ហូ​ឡង់​ដោយ​លទ្ធផល ៣-១​។ ខណៈ​ដែល​ប៉ា​រ៉ា​ហ្គា​យ មិន​ធ្លាប់​ធ្វើ​ជា​ម្ចាស់ផ្ទះ​ម្តងណា​ឡើយ​។

លោក Alejandro Dominguez ប្រធាន​សហព័ន្ធ​បាល់ទាត់​អា​មេ​រិ​ក​ខាងត្បូង (CONMEBOL) បាន​និយាយ​ថា នេះ​គឺជា​សុបិន​នៃ​ទ្វីប​មួយ​នេះ​។ ខណៈ​ដែល​ប្រទេស​អេ​ស្ប៉ា​ញ និង​ព័រ​ទុ​យ​ហ្គា​ល់​ក៏​បាន​ប្រកាស​ពី​ការ​ដេញថ្លៃ​ធ្វើ​ជា​ម្ចាស់ផ្ទះ​រួម​គ្នា​ផង​ដែរ​។

គួរ​បញ្ជាក់​ថា ការ​ប្រកួត World Cup ឆ្នាំ ២០២២ នឹង​ត្រូវធ្វើ​ឡើង​នៅ​ប្រទេស​កា​តា ចាប់ពី​ថ្ងៃ​ទី​២១ ខែវិច្ឆិកា រហូត​ដល់​ថ្ងៃ​ទី​១៨ ខែធ្នូ ឆ្នាំ​២០២២​។ ខណៈ​ដែល​កា​ណា​ដា ម៉ិ​ក​ស៊ិ​ក និង​សហរដ្ឋអាមេរិក​នឹង​ក្លាយជា​ម្ចាស់ផ្ទះ​រួម​គ្នា​នៅ​ឆ្នាំ ២០២៦​។ ចំណែកឯ​នៅ​ឆ្នាំ ២០២៤ សហព័ន្ធ​បាល់ទាត់​ពិភពលោក (FIFA) គ្រោង​នឹង​ជ្រើសរើស​ម្ចាស់ផ្ទះ​សម្រាប់​ព្រឹត្តិការណ៍​នៅ​ឆ្នាំ ២០៣០៕

Picture
Picture
Picture
Picture