អ្នក​អប់​រំពី​គ្រោះ​ថ្នាក់​តចរន្ត ភ្លើង​ឆក់​កណ្តុរ​នៅ​ក្នុង​ស្រែ ភ្លាត់​ស្នៀត​ឆក់​ខ្លួន​ឯង​ស្លាប់


ខេត្ត​បាត់​ដំបង​​ ៖ សមត្ថ​កិច្ច​មូល​ដ្ឋាន​បាន​រាយ​ការណ៍​ថា​ ​អ្នកប្រកប​រប​រ​ពង្រាយ​ខ្សែ​ចរន្ត​អគ្គិសនី«ឆក់​សត្វ​កណ្ដុរ»​ក្នុ​ង​ស្រែម្នាក់​​បាន​ភ្លាត់​​ស្នៀត​​ឆក់​ខ្លួន​​ឯង​​ស្លាប់​​កាល​ពីវេលា​ម៉ោង​៤​ទៀប​ភ្លឺ​ថ្ងៃ​ទី២៤​ មករា​ ឆ្នាំ២០១៣​ ​នៅកណ្ដាល​វាល​ស្រែ​ចំណុច​«អន្លង់​តាអ៊ួ»​ក្នុង​ភូមិ​ប៉ោយ​តាសេក ​ឃុំបឹង​ព្រីង​ ស្រុកថ្មគោល ។

លោក​សេង​ សុងហ៊ា​ ​​នាយប៉ុស្ដិ៍នគរ​បាល​បឹង​ព្រីង​បាន​ប្រាប់​ថា​ ​បុរស​ដែល​ស្លាប់​ដោយ​សារ​តម្រិះ​​ជិះ​កឯង​នោះ​ឈ្មោះ​រឿន​ យេត​ អាយុ​៥៤​ឆ្នាំ​ នៅ​ភូមិ​អូរ​អណ្ដូង ឃុំ​បន្ទាយ​នាង​ ​ស្រុក​មង្គល​បុរី​ ខេត្ត​បន្ទាយ​មាន​ជ័យ ។ លោក​មេប៉ុស្ដិ៍​បញ្ជាក់​ថា​ ​គាត់ជា​អ្នក​ប្រកបរបរ​ពង្រាយ​ខ្សែ​ចរន្ត​អគ្គិសនី​តាម​វាល​ស្រែ​ដើម្បី​«ឆក់​សត្វ​កណ្ដុរ»​យក​ទៅ​លក់ ។​ ​ប៉ុន្តែ​នៅ​ព្រឹក​កើត​ហេតុ​នោះ​ពេល​គាត់ដើរ​រើស​សត្វ​កណ្ដុរ​ងាប់​នៅ​តាម​ខ្សែ​​ចរន្ត ​​ស្រាប់​តែគាត់​ជំពប់​ជើង​ដួលទៅ​​លើ​ខ្សែ​ភ្លើង​បណ្ដាល​ឲ្យ​ឆក់​គាត់​ស្លាប់​ភ្លាមៗ​តែ​ម្ដង ​ដោយ​មិន​អាច​ជួយ​សង្គ្រោះ​បាន ។

តាម​ការ​បំភ្លឺ​ពីអ្នក​ភូមិ​ថា​ ​បច្ចុប្បន្ន​នៅ​តំបន់​«អន្លង់​តាអ៊ួ»​ក្នុង​ភូមិ​-​ឃុំខាង​លើនេះ​មាន​អ្នក​ប្រកប​របររ​កកណ្ដុរ​លក់​​ដើម្បី​ចិញ្ចឹម​ជីវ​ភាព​ច្រើន​ណាស់​​ដោយ​ខ្លះ​ប្រើប្រាស់​ម៉ាស៊ីន​ភ្លើង​ ​និង​ខ្លះ​​ប្រើអាគុយ​​ដែលមាន​អាំង​វែរ​ទ័រ​កម្លាំង​ខ្លាំង​បំបែក​ចរន្ត​ភ្លើង​ដើម្បី​ឆក់​សត្វ​កណ្ដុរ​ ​រីឯខ្លះ​ទៀត​ប្រើ​អន្ទាក់​ដាក់​សត្វ​កណ្ដុរដែរ​។ អ្នក​ភូមិ​និយាយ​ថា​ ការ​ប្រើប្រាស់​ខ្សែ​ចរន្ត​អគ្គិសនី​​​សម្រាប់​ឆក់​សត្វ​កណ្ដុរ​នេះ​គឺ​ប្រឈម​នឹង​​គ្រោះ​ថ្នាក់​បំផុត ។​​ តែ​ដោយ​សារ​ការ​ប្រើវិធី​នេះ​កាក់​កប​គ្រាន់​បើ​ ​ទើប​ពួក​គេប្រើប្រាស់​មធ្យោ​បាយ​ប្រថុយ​នឹង​គ្រោះ​ថ្នាក់​បែប​នេះ​ ​ហើយកន្លង​មក ក៏មាន​មនុស្ស​ស្លាប់​ដោយ​សារ​ឆក់ខ្សែ​ចរន្ត​​របស់​​​ខ្លួន​ឯង​ដូច​គ្នាដែរ ។

លោកសេង​ សុងហ៊ា​ មេប៉ុស្ដិ៍បឹង​ព្រីង ​ក៏បាន​​បញ្ជាក់​ដែរ​ថា ​សមត្ថកិច្ច​របស់​លោក​តែង​តែ​ចុះពន្យល់​ដល់​កសិករ​ដែល​ប្រកប​របរ​​នេះ​​ជា​ញឹក​ញ៉ាប់​ណាស់​​ ​ដើម្បីឲ្យ​ពួកគាត់​បាន​យល់​អំពី​គ្រោះ​ថ្នាក់​​ដោយសារ​ខ្សែ​ចរន្ត​ឆក់​សត្វ​កណ្ដុរ​តាម​ស្រែ​ ​ប៉ុន្តែ​នៅតែចៀស​មិន​ផុត​ពី​គ្រោះ​ថ្នាក់​ដដែល ។ ​លោក​មេប៉ុស្ដិ៍បានបញ្ជាក់ថា​ ចំពោះ​ជន​រង​គ្រោះ​ឈ្មោះ​រឿន​ យេត​ ​នេះការ​ពិត​គាត់​ក៏ជា​អ្នក​អប់រំ​ណែ​នាំ​គេ​ពី​បញ្ហាគ្រោះ​ថ្នាក់​នេះ ​​ក្នុង​ចំណោម​បក្សពួក​គាត់ដែរ​ ​តែមិន​ដឹង​យ៉ាង​ម៉េច​បាន​ជា​នៅ​ព្រឹក​កើត​ហេតុ​នោះ ​បែរ​ជា​ភ្លាត់​ស្នៀត​ឆក់​ខ្លួន​ឯង​ស្លាប់​ទៅ​វិញ ។​ លោក​បាន​រំឭក​ថា​ កាល​ពី​អំ​ឡុង​ខែធ្នូ​ ឆ្នាំ២០១២ ក៏មាន​បុរស​ម្នាក់​ភ្លាត់​ស្នៀត​ឆក់​ខ្សែ​​ចរន្ត​អគ្គិសនី​ខ្លួន​ឯង ​ដែល​ពង្រាយ​ឆក់សត្វ​កណ្ដុរ​ក្នុង​ស្រែស្លាប់​ដូច​គ្នាដែរ ។

ដូច្នេះ​តាមរយៈ​កោះសន្តិ​ភាព​ លោក​សូម​ផ្ដាំ​ផ្ញើ​ដល់​ប្រជា​កសិករ​ទាំង​អស់​​ដែល​ប្រកបរបរ​ប្រមាញ់​«សត្វកណ្ដុរ» សូម​មេត្តា​ប្រុង​ប្រយ័ត្ន​ខ្លួន​ឯង​ឲ្យ​បាន​ខ្ពស់ ​ព្រោះការ​ប្រើប្រាស់​ខ្សែ​ចរន្ត​អគ្គិ​សនី​ពង្រាយ​តាម​ស្រែ​ដើម្បីឆក់​កណ្ដុរ​នេះ​​ងាយ​នឹង​ធ្វើឲ្យ​ម្ចាស់​គ្រោះ​ថ្នាក់​ ​ដូច​សត្វ​កណ្ដុរ​អីុចឹង​ដែរ ៕

ព្រឹត្តិការណ៍សង្គម

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ