អង់គ្លេស ៖ ក្រុមបាល់ទាត់​ជម្រើសជាតិ​នារី​អង់គ្លេស បាន​បង្កើត​ប្រវត្តិសាស្ត្រ​ដ៏​ថ្មីស្រឡាង​តាម​រយៈ​ការ​ឈ្នះ​ជើងឯក UEFA Women’s Euro ឆ្នាំ ២០២២ ដែល​ជា​ការ​ឈ្នះ​ពានរង្វាន់​កម្រិត​កំពូល​លំដាប់​អន្តរជាតិ​ជា​លើក​ដំបូង​បំផុត​របស់​ពួក​គេ​។ បន្ទាប់​ពី​បាន​យកឈ្នះ​លើ​ក្រុម​ជើង​ខ្លាំង និង​ជា​ម្ចាស់​ជើងឯក​៨​សម័យកាល អា​ល្លឺ​ម៉​ង់ ដោយ​លទ្ធផល ២-១ កាលពី​ថ្ងៃ​ទី​៣១ ខែកក្កដា ឆ្នាំ​២០២២ កន្លង​ទៅ​។

ជំនួប​វគ្គ​ផ្តាច់ព្រ័ត្រ ដែល​ធ្វើ​ឡើង​នៅ​ក្នុង​កីឡដ្ឋាន​ជាតិ Wembley ក្រោម​ក្រសែភ្នែក​អ្នក​ទស្សនា​ប្រមាណ​ជាង​៨៧,០០០​នាក់ ម្ចាស់ផ្ទះ​អង់គ្លេស​បាន​បើក​ការ​នាំមុខ​មុន​នៅ​នាទី​៦២ ដែល​រកបាន​ដោយ​ខ្សែប្រយុទ្ធ Ella Toone​។ មុន​ពេល​អា​ល្លឺ​ម៉​ង់​តាម​ស្មើ​មក​វិញ ដែល​សម្រេច​បាន​ដោយ​ខ្សែបម្រើ Lina Magull នៅ​នាទី​៧៩​។

ការ​ប្រកួត​តានតឹង​កាន់តែ​ខ្លាំង​ឡើង​រវាង​ក្រុម​ទាំង​២ ដែល​ឈាន​ដល់​ម៉ោង​បន្ថែម​១៥​នាទី ២​ដង​។ ប៉ុន្តែ​អ្វី​ៗ​បាន​ចប់​សព្វគ្រប់ ក្រោយ​ពេល​ខ្សែប្រយុទ្ធ Chloe Kelly រក​គ្រាប់​ជ័យជម្នះ​សម្រាប់​អង់គ្លេស​នៅ​នាទី​១១០​។ ហើយ​លទ្ធផល ២-១ នេះ បាន​រក្សា​រហូត​បញ្ចប់​ការ​ប្រកួត​ជា​ផ្លូវការ​។

ខ្សែប្រយុទ្ធ​អង់គ្លេស Beth Mead បាន​ឈ្នះ​ពានរង្វាន់​កីឡាការិនី​ល្អ​បំផុត រួម​និង​ស្បែកជើង​មាស​ប្រចាំ​ព្រឹត្តិការណ៍​ឆ្នាំ ២០២២ នេះ​។ ដោយ​មាន​គ្រាប់​បាល់​សរុប​៦​គ្រាប់​ស្មើ​ជាមួយ​ខ្សែប្រយុទ្ធ​អា​ល្លឺ​ម៉​ង់ Alexandra Popp​។ ប៉ុន្តែ Beth Mead ធ្វើ​បាន​ល្អ​ជាង​ដោយ​បញ្ជូន​បាល់​ឱ្យ​មិត្ត​រួម​ក្រុម​ស៊ុត​បញ្ចូល​ទី (Assists) បាន​ចំនួន​៥​ដង​។

ក្រ​ឡែក​មក​កាន់​អា​ល្លឺ​ម៉​ង់​វិញ បើ​ទោះជា​បរាជ័យ​សម្រាប់​ឆ្នាំ ២០២២ នេះ យ៉ាងណា​ក៏​ដោយ ប៉ុន្តែ​ពួក​គេ​នៅ​តែ​ឈរ​ជា​ក្រុម​ឈ្នះ​ពានរង្វាន់ UEFA Women’s Euro ច្រើន​ជាងគេ​បំផុត​ក្នុង​ប្រវត្តិសាស្ត្រ ពោល​ចំនួន​៨​ដង តាម​ពីក្រោយ​ដោយ​ន័​រ​វែ​ស ដែល​ឈ្នះ​ចំនួន​២​ដង​៕