រាជធានីភ្នំពេញ ៖ ក្រសួងការពារជាតិបានប្រជុំផ្សព្វផ្សាយរបាយការណ៍បូកសរុបការងារឆ្នាំ២០១៦ និងលើកទិសដៅអនុវត្តឆ្នាំ២០១៧ ដែលកិច្ចប្រជុំនេះបានប្រព្រឹតទៅនៅព្រឹកថ្ងៃទី០២ ខែមករានេះ ស្ថិតក្រោមអធិបតីភាពលោកនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងមានការអញ្ជើញចូលរួមពីលោកនាយឧត្តមសេនីយ៍ ប៉ុល សារឿន អគ្គមេបញ្ជាការនៃ កងយោធពលខេមរភូមិន្ទ ព្រមទាំងឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ក្រសួងការពារជាតិ អគ្គមេបញ្ជាការរងនៃ កងយោធពលខេមរភូមិន្ទ អគ្គនាយក អគ្គនាយករង អគ្គនាយកដ្ឋាន នាយកនាយករង នាយកដ្ឋាន និងស្ថាប័នចំណុះក្រសួងការពារជាតិ អគ្គបញ្ជាការដ្ឋាននៃកងយោធពលខេមរភូមិន្ទ ជាច្រើនរូបទៀត។
នៅក្នុងក្នុងឱកាសបើកកិច្ចប្រជុំនោះលោកនាយឧត្តមសេនីយ៍ ទៀបាញ់បានធ្វើការវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ កងយោធពលខេមរភូមិន្ទ ក្នុងរយៈពេលពេញ១ឆ្នាំ នៃឆ្នាំ២០១៦កន្លងទៅ ហើយនៅក្នុងឱកាសចូលឆ្នាំថ្មី ឆ្នាំសកល២០១៧នេះ បានជូនពរឲ្យនាយទាហាន និងពលទាហាននៃ កងយោធពលខេមរភូមិន្ទ ទាំងអស់ទទួលបានជោគជ័យនៅគ្រប់ការបំពេញការងារ។ លោកឧបនាយករដ្ឋមន្ត្រី បានបញ្ជាក់ថា កិច្ចប្រជុំនេះនឹងត្រិះរិះពិចារណាលើការកែទម្រង់ថ្មីៗ ក្នុងការអនុវត្តនៅឆ្នាំ២០១៧ និងជាឆ្នាំមួយឈានចូលទៅឆ្នាំ២០១៨ ដែលជាឆ្នាំមួយមានសារៈសំខាន់ដ៏ខ្លាំងសម្រាប់មាតុភូមិកម្ពុជា ជាពិសេសសម្រាប់ កងយោធពលខេមរភូមិន្ទ កងកម្លាំងប្រដាប់អាវុធ និងមន្ត្រីរាជការគ្រប់លំដាប់ថ្នាក់ដែលមានតួនាទីភារកិច្ចចូលរួមទ្រទ្រង់ និងអនុវត្តនូវនយោបាយរបស់ជាតិ នៅក្នុងព្រឹត្តិការណ៍ នៃការបោះឆ្នោតក្រុមប្រឹក្សាឃុំសង្កាត់ អាណត្តិទី៤ និងកិច្ចដំណើរការការបោះឆ្នោតជ្រើសរើសតំណាងរាស្ត្រនីតិកាលទី៦ នៅឆ្នាំ២០១៨ ឲ្យបានរលូនត្រឹមត្រូវ និងយុត្តិធម៌ពេញលេញតាមផ្លូវច្បាប់។
សមាជិកនៃកិច្ចប្រជុំក៏បានតាមស្តាប់ដោយការយកចិត្តទុកដាក់លើរបាយការណ៍បូកសរុបដែលអានដោយលោកនាយឧត្តមសេនីយ៍ សំ វណ្ណថន អគ្គលេខាធិការក្រសួងការពារជាតិ ដែលបានគូសបញ្ជាក់ថា ក្នុងឆ្នាំ២០១៦កន្លងទៅនេះ កងយោធពលខេមរភូមិន្ទ បានយកចិត្តទុកដាក់ប្រមូលផ្តុំអនុវត្តសកម្មភាពការងាររបស់ខ្លួន ក្នុងវិស័យការពារជាតិតាមកម្មវិធីនយោបាយយុទ្ធសាស្ត្រចតុកោណដំណាក់កាលទី៣បទបញ្ជាអនុសាសន៍របស់ប្រមុខរាជរដ្ឋាភិបាល។ លោកនាយឧត្តមសេនីយ៍បន្តថា យកចិត្តទុកដាក់ពង្រឹងខឿនការពារជាតិនៅតាមតំបន់ព្រំដែន និងបណ្តាកោះមួយចំនួន កែសម្រួលកម្លាំងការពារព្រំដែនធ្វើការតាមដានក្តាប់នូវរាល់សភាពការណ៍ប្រែប្រួល និងធ្វើការល្បាតត្រួតពិនិត្យការពារភូមិសាស្ត្រទទួលខុសត្រូវរបស់ខ្លួនជាប់ជាប្រចាំព្រមទាំងបានបន្តកិច្ចសហប្រតិបត្តិការល្អជាមួយប្រទេសជិតខាង ដោះស្រាយបញ្ហាផ្សេងៗដែលកើតឡើងដោយសន្តិវិធី។
ទន្ទឹមនឹងនេះ បានបន្តបញ្ជូនកម្លាំងទៅបំពេញបេសកកម្មរក្សាសន្តិភាពក្រោមឆ័ត្ររបស់អង្គការសហប្រជាជាតិបច្ចុប្បន្នមាន៨៩២នាក់ នៅសាធារណរដ្ឋស៊ូដង់ខាងត្បូង លីបង់ ម៉ាលី នៅសាធារណរដ្ឋអាហ្វ្រិកកណ្តាល។ កម្ពុជាត្រូវបានអង្គការសហប្រជាជាតិវាយតម្លៃជាប្រទេសជាប់លំដាប់ថ្នាក់លេខ៣៥ក្នុងចំណោម១២១ប្រទេស និងជាប់លំដាប់ថ្នាក់លេខ៣ក្នុងចំណោមប្រទេសក្នុងអាស៊ាន។ ក្រៅពីនេះបានម្ចាស់ការ និងសហការចូលរួមពង្រឹងការអនុវត្តច្បាប់កសាងភូមិ-ឃុំមានសុវត្ថិភាព ធ្វើការបង្ការ និងបង្ក្រាបនូវរាល់បទល្មើសគ្រប់ប្រភេទ ភាពអនាធិបតេយ្យនានាការពារសន្តិសុខសណ្តាប់ធ្នាប់សាធារណៈ ការពារគណៈប្រតិភូជាតិ និងអន្តរជាតិនានាព្រះរាជពិធីបុណ្យអំទូកបានល្អប្រសើរ។
អង្គប្រជុំបានពិភាក្សាផ្លាស់ប្តូរយោបល់ដោយមានយកចិត្តទុកដាក់ខ្ពស់ទៅលើផែនការទិសដៅអនុវត្តឆ្នាំ២០១៧ ដោយផ្តោតសំខាន់លើការពង្រឹងខឿនការពារជាតិនៅតាមតំបន់ព្រំដែនបន្តកិច្ចសហប្រតិបត្តិការល្អជាមួយប្រទេសជាតិខាងចូលរួមពង្រឹងសន្តិសុខសុវត្ថិភាពសណ្តាប់ធ្នាប់សាធារណៈសង្គម និងត្រៀមលក្ខណៈសម្បត្តិ ចូលរួមការពារសន្តិសុខសុវត្ថិភាពឲ្យយុទ្ធនាការឃោសនា និងបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤៕
ចែករំលែកព័តមាននេះ