ជិះម៉ូតូចេញពីភ្នំពេញ ទៅទាក់ឆ្កែអ្នកស្រុកនៅខេត្តកណ្តាល ត្រូវអស់លក្ខណ៍
- កណ្តាល
ខេត្តកណ្ដាល ៖ ជនសង្ស័យជាមុខសញ្ញាដើរទាក់ឆ្កែអ្នកស្រុករាល់ថ្ងៃ ម្នាក់ ក្នុងចំណោមបក្ខពួក៤នាក់
ខេត្តកណ្ដាល ៖ ជនសង្ស័យជាមុខសញ្ញាដើរទាក់ឆ្កែអ្នកស្រុករាល់ថ្ងៃ ម្នាក់ ក្នុងចំណោមបក្ខពួក៤នាក់ចូលអន្ទាក់របស់សមត្ថកិច្ច កាលពីវេលាម៉ោង៤ទៀបភ្លឺឈានចូលថ្ងៃទី៣១ ខែកក្កដា ឆ្នាំ២០២២ នៅចំណុចផ្លូវកៅស៊ូគល់ស្ពានទី១៣ ភូមិព្រែកថ្មី ឃុំព្រែកអញ្ចាញ ស្រុកមុខកំពូល ខេត្តកណ្ដាល ។
ជនសង្ស័យម្នាក់ខាងលើឈ្មោះ ជួន លាងហេង ភេទប្រុស អាយុ២៤ឆ្នាំ មុខរបរមិនពិតប្រាកដ ស្នាក់នៅផ្ទះជួល សង្កាត់គីឡូម៉ែត្រលេខ៦ ខណ្ឌឫ ស្សីកែវ រាជធានីភ្នំពេញ ។ វត្ថុតាងចាប់យកម៉ូតូ១គ្រឿង ម៉ាកហុងដា RSX ពណ៌ក្រហមលាយខ្មៅ ពាក់ផ្លាកលេខ ព្រៃវែង 1D-៣៣៩១ សត្វឆ្កែចំនួន២ក្បាល និងសម្ភារៈសម្រាប់ទាក់សត្វឆ្កែមួយចំនួនទៀត ។
តាមសេក្តីរាយការណ៍ឲ្យដឹងថា កន្លងមកជនសង្ស័យ និងបក្ខពួកធ្លាប់ដើរធ្វើសកម្មភាពលួចទាក់សត្វឆ្កែរបស់ប្រជាពលរដ្ឋតាមផ្លូវសាធារណៈក្នុងភូមិសាស្ត្រស្រុកមុខកំពូល ញឹកញាប់ណាស់មកហើយ។ លុះនៅថ្ងៃទី៣០ ខែកក្កដា វេលារំលងអាធ្រាត្រ ជនសង្ស័យ និងបក្ខពួកបាននាំគ្នាជិះម៉ូតូចំនួន
២គ្រឿង មានគ្នា៤នាក់ ចេញពីផ្ទះជួលស្ថិតនៅសង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ក្នុងគោលបំណងដើរលួចទាក់សត្វឆ្កែរបស់ប្រជាពលរដ្ឋ នៅក្នុងស្រុកមុខកំពូលនេះ ។
តាមសេចក្តីរាយការណ៍បានបន្តថា លុះទៅដល់ចំណុចផ្លូវកៅស៊ូស្ពានទី១៣ ភូមិព្រែកថ្មី ឃុំព្រែកអញ្ចាញ នៅវេលាម៉ោង៤ទៀបភ្លឺឈានចូលព្រឹកថ្ងៃទី៣១ ខែកក្កដា ក្រុមជនសង្ស័យបាននាំគ្នាធ្វើសកម្មភាពលួចទាក់សត្វឆ្កែរបស់ប្រជាពលរដ្ឋបាន២ក្បាល ហើយក៏បានជួបកម្លាំងអន្តរាគមន៍ស្រុក និងកម្លាំងប៉ុស្តិ៍នគរបាលរដ្ឋបាលព្រែកអញ្ចាញ រួមសហការជាមួយប្រជាការពារ ដែលកំពុងដើរល្បាតក្នុងភូមិសាស្ត្រ ឃើញដូច្នោះជនសង្ស័យនិងបក្ខពួកមួយក្រុមបាននាំគ្នាជិះម៉ូតូគេចខ្លួនដែរ តែត្រូវបានកម្លាំងសមត្ថកិច្ចដេញតាមចាប់បានម្នាក់ ខណៈបក្ខពួកម្នាក់ដែលជិះជាមួយគ្នាបានផ្ដួលម៉ូតូហើយរត់ចោលបាត់ ។ ជនសង្ស័យ និងវត្ថុតាងដូចបានរៀបរាប់ខាងលើនេះ សមត្ថកិច្ចក៏បានបញ្ជូនទៅកាន់អធិការដ្ឋាននគរបាលស្រុកមុខកំពូល ដើម្បីសាកសួរយកចម្លើយ ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួននិងបក្ខពួកចំនួន៣ទៀត ពិតជាបានធ្វើសកម្មភាពលួចទាក់សត្វឆ្កែ របស់ប្រជាពលរដ្ឋតាមផ្លូវសាធារណៈពិតប្រាកដមែន ក្រោយពីធ្វើសកម្មភាពទាក់ឆ្កែបានម្តងៗ ពួកខ្លួនបានយកទៅលក់ចែកប្រាក់គ្នាក្នុងម្នាក់បានចំនួន១២ម៉ឺនរៀល ក្នុងមួយយប់ ។
បច្ចុប្បន្ន ជនសង្ស័យ និងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តតាមនីតិវិធី ៕
ចែករំលែកព័តមាននេះ