គ្រោះស្មានមិនដល់! ចិន៦នាក់ជួបគ្រោះពេលជិះម៉ូតូទឹកបុកគ្នានៅសមុទ្រឆ្នេរឯករាជ្យ
- ព្រះសីហនុ
ភ្ញៀវទេសចរជនជាតិចិនចំនួន៦នាក់ បាននាំគ្នាជួលម៉ូតូទឹកចំនួន៣គ្រឿងជិះលេងនៅឆ្នេរឯករាជ្យ ក្រុងព្រះសីហនុ ក៏ស្រាប់តែជួបនឹង
ខេត្តព្រះសីហនុ ៖ បើតាមសេចក្តីរាយការណ៍បានឱ្យដឹងថា ភ្ញៀវទេសចរជនជាតិចិនចំនួន៦នាក់ បាននាំគ្នាជួលម៉ូតូទឹកចំនួន៣គ្រឿងជិះលេងនៅឆ្នេរឯករាជ្យ ក្រុងព្រះសីហនុ ក៏ស្រាប់តែជួបនឹងឧបទ្ទវហេតុបុកគ្នា បណ្តាលឲ្យម្នាក់លង់ទឹកស្លា.ប់ ខណៈពេលបញ្ជូនទៅសង្គ្រោះដល់មន្ទីរពេទ្យបង្អែកខេត្ត ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៤និង៣០នាទីរសៀលថ្ងៃទី២៩ ខែកក្កដា ឆ្នាំ២០២២ នៅចំណុចឆ្នេរឯករាជ្យ ស្ថិតក្នុងភូមិ១ សង្កាត់៣ ក្រុង-ខេត្តព្រះសីហនុ ។
សេចក្តីរាយការណ៍បន្តថា ជនរងគ្រោះដល់ជីវិតខាងលើមានឈ្មោះ YI CHENGFU ភេទប្រុស អាយុ២៨ឆ្នាំ ជាជនជាតិចិន កាន់លិខិតឆ្លងដែន EH ៨១១៦១៨៧ ។
សេចក្តីរាយការណ៍បានឲ្យដឹងបន្តថា នៅវេលាម៉ោង៤និង៣០នាទីរសៀលថ្ងៃខែខាងលើ មានភ្ញៀវទេសចរជនជាតិចិន១ក្រុមមានគ្នាចំនួន៦នាក់ បាននាំគ្នាទៅអង្គុយលេងនៅឆ្នេរឯករាជ្យ ស្ថិតក្នុងភូមិ១ សង្កាត់៣ ក្រុង-ខេត្តព្រះសីហនុ ។ បន្ទាប់មក ភ្ញៀវទាំង៦នាក់នោះ បាននាំគ្នាជួលម៉ូតូទឹកចំនួន៣គ្រឿង (ម៉ូតូ១គ្រឿងជិះគ្នា២នាក់) ដើម្បីកំសាន្តលេងក្នុងលំហសមុទ្រ ។
ប្រភពដដែលបន្តថា លុះពេលពួកគេជិះចេញពីចំណតម៉ូតូ ដោយនាំគ្នាជិះដង្ហែមុខក្រោយ ចូលទៅក្នុងលំហសមុទ្របានចម្ងាយប្រហែល៣០ម៉ែត្រពីមាត់ឆ្នេរនោះ ក៏មាន២នាក់ជិះម៉ូតូ១គ្រឿងនៅកណ្តាលគេ ស្រាប់តែក្រឡាប់ម៉ូតូធ្លាក់មនុស្សចូលទៅក្នុងទឹកទាំង២នាក់តែម្តង ធ្វើឲ្យអ្នកជិះម៉ូតូ១គ្រឿងពីក្រោយ គេចមិនទាន់ក៏បុកជនជាតិចិនម្នាក់ដែលកំពុងតែស្រវេស្រវ៉ាតោងឡើងម៉ូតូទឹក និងបន្តទៅបុកម៉ូតូទឹក១គ្រឿងទៀតខាងមុខ ធ្វើឲ្យមនុស្សធ្លាក់ចូលទឹកទាំងអស់គ្នា ។
ប្រភពដដែលបន្តទៀតថា ភ្លាមៗនោះ ក៏មានបុគ្គលិកម៉ូតូទឹក និងសមត្ថកិច្ចនគរបាលដែលប្រចាំការ បាននាំគ្នាចេញម៉ូតូទឹកទៅជួយសង្គ្រោះ ហើយបានស្រង់អ្នករបួសចំនួន២នាក់ចេញពីក្នុងទឹកសមុទ្រឡើងទៅលើគោកវិញ និងដឹកយកទៅសង្រោះ្គនៅមន្ទីរពេទ្យបង្អែកខេត្ត ប៉ុន្តែការសង្គ្រោះមិនអាចជួយបាន ដោយជនរងគ្រោះម្នាក់បានបាត់បង់អាយុជីវិតបាត់ទៅហើយ ចំណែកម្នាក់ទៀតរងរបួសស្រាល សង្គ្រោះទាន់ពេលវេលា ។
ក្រោយពីកើតហេតុ សមត្ថកិច្ចនជំនាញបានហៅមនុស្សចំនួន៦នាក់ ក្នុងនោះមានខ្មែរម្នាក់ជាបុគ្គលិកម៉ូតូទឹក និងចិនចំនួន៥នាក់ យកទៅអធិការដ្ឋាននគរបាលក្រុងព្រះសីហនុ ដើម្បីធ្វើការសាកសួរតាមនីតិវិធី ។ ដែលនេះជាហេតុការណ៍សប្បាយក្លាយជាទុក្ខ ធ្វើឱ្យចិន៦នាក់ជិះម៉ូតូទឹកសមុទ្រឆ្នេរឯករាជ្យ បុកគ្នាស្លា.ប់ម្នាក់នោះ ៕
ចែករំលែកព័តមាននេះ