រាជធានីភ្នំពេញ ៖ ក្រុមបឹងកេតអង្គរកម្ពុជា ត្រូវជួបស្វាគមន៍ក្រុមLanexang United របស់ឡាវនាល្ងាចស្អែកថ្ងៃទី៣១ ធ្នូ ក្នុងវគ្គពាក់កណ្ដាលផ្ដាច់ព្រ័ត្រនៃព្រឹត្តិការណ៍បាល់ទាត់Toyota Mekong Club Championship2016
រាជធានីភ្នំពេញ ៖ ក្រុមបឹងកេតអង្គរកម្ពុជា ត្រូវជួបស្វាគមន៍ក្រុមLanexang United របស់ឡាវនាល្ងាចស្អែកថ្ងៃទី៣១ ធ្នូ ក្នុងវគ្គពាក់កណ្ដាលផ្ដាច់ព្រ័ត្រនៃព្រឹត្តិការណ៍បាល់ទាត់Toyota Mekong Club Championship2016 នៅលើទីលានពហុកីឡដ្ឋានជាតិ ។
ក្រុមLanexang United ឡាវដែលមានឱកាសឡើងមកជួបក្រុមបឹងកេតអង្គរកម្ពុជា នាល្ងាចស្អែកនេះបន្ទាប់ពីយកឈ្នះក្រុមវៀតណាមនៅវគ្គប្រកួតជម្រុះក្នុងលទ្ធផល២-១និងស្មើជាមួយក្រុមមីយ៉ាន់ម៉ា៣-៣ ។ លោក ប្រាក់ សុវណ្ណារ៉ា គ្រូបង្វឹកក្រុមបឹងកេតអង្គរ បានមានប្រសាសន៍ក្នុងសន្និសីទសារព័ត៌មានមួយនៅសណ្ឋាគារភ្នំពេញ កាលពីថ្ងៃទី៣០ ធ្នូ នេះថា ក្រុមបឹងកេតអង្គរពិតជាមានសំណាងខ្លាំងណាស់ដែលតំណាងឱ្យកម្ពុជាចូលរួមប្រកួតជើងឯកតូយ៉ូតាមេគង្គក្លិប២ឆ្នាំជាប់គ្នា ។ សម្រាប់ការមកជួបក្រុមLanexang របស់ឡាវក្នុងពេលនេះលោកមិនហ៊ានអះអាងទុកមុនថា យ៉ាងណានោះទេ ដោយលោកគិតថា ក្រុមឡាវមួយនេះគឺជាក្រុមខ្លាំងមានទម្រង់លេងល្អ តែលោកគិតថា ក្រុមរបស់លោកមានសំណាងទៅវិញទេដែលបានជួបក្រុមខ្លាំងបែបនេះ ។
ចំណែកលោកLeonardo Vitorono ដែលជាគ្រូបង្ហាត់របស់ក្រុមLanexang វិញបានមានប្រសាសន៍ថា ក្រុមបឹងកេតអង្គរអាចមានប្រៀបជាងក្រុមលោក ព្រោះក្រុមកម្ពុជាមួយនេះមានខ្សែប្រយុទ្ធល្អ ខ្សែការពារល្អ អ្នកចាំទីល្អឯគ្រូបង្វឹកក៏ល្អទៀត ។ ប៉ុន្តែលោកគិតថា ក្រុមរបស់លោកបានត្រៀមគ្រប់យ៉ាងអស់ហើយ ដើម្បីអ្នកគាំទ្រ ឯលទ្ធផលបែបណានោះគឺស្ថិតលើការប្រកួតជាក់ស្ដែងនៅល្ងាចនេះប៉ុណ្ណោះ។
គួរបញ្ជាក់ថា ការប្រកួតរវាងក្រុមទាំងពីរនឹងចាប់ផ្ដើមឡើងនៅវេលាម៉ោង៦និង៣០នាទីល្ងាចស្អែក រីឯសំបុត្រចូលទស្សនាកន្លែងមានដំបូលតម្លៃ៨ពាន់រៀល និងកន្លែងអត់ដំបូល៤ពាន់រៀល ៕
ចែករំលែកព័តមាននេះ