ខេត្តប៉ៃលិន៖​ ក្មេងស្រី ៣នាក់ រងរបួសធ្ងន់ស្រាល ត្រូវបានក្រុមគ្រួសារ បញ្ជូនទៅសង្គ្រោះ​នៅមន្ទីរពេទ្យបង្អែកខេត្តប៉ៃលិន ខណ:ពេលបើកបរម៉ូតូស្របទិសគ្នាជាមួយនឹងរថយន្តដឹកដី លុះពួកគេបើកម៉ូតូវ៉ាជែងត្រង់ផ្លូវបំបែកជាបី មិនដឹងថា រថយន្តស៊ីញ៉ូបត់ឆ្វេង ខណ:ពេលទៅដល់​ខាងមុខក្លោងទ្វាវត្តអូររអិល ក៏ជាន់ហ្រ្វាំងមិនជាប់ បណ្តាលឱ្យជ្រុលចង្កូតទៅបុករថយន្ដអូសដួល រងរបួសតែម្ដង។

ហេតុការណ៍គ្រោះថ្នាក់ចរាចរណ៍នេះ បានកើតឡើង កាលពីវេលាម៉ោង ០៥ និង ១០នាទី ល្ងាចថ្ងៃទី២៥ ខែកក្កដា ឆ្នាំ២០២២ នៅចំណុចក្លោងទ្វារផ្លូវចូលវត្តអូររអិល ស្ថិតក្នុងភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន បណ្ដាលឱ្យរងរបួសចំនួន ០៣នាក់ គឺ​រងរបួសធ្ងន់ ០២នាក់ និងរបួសស្រាល ម្នាក់។ រីឯម៉ូតូ ត្រូវខូចខាត កម្រិតស្រាល។

ប្រភពព័ត៌មានពីនគរបាល បានឱ្យដឹងថា ​អ្នកបើកបរម៉ូតូ មាន​ឈ្មោះ ពុត ធីតា ភេទស្រី អាយុ ១៥ឆ្នាំ (រងរបួសចំមុខ និងក្បាលមធ្យម) បើកបរម៉ូតូម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ 1CS-5040 ពាក់មួកសុវត្ថិភាព។ រីឯអ្នករួមដំណើរទី១. ឈ្មោះ វ៉ាន់ ម៉ារីយ៉ា ភេទស្រី អាយុ ១៥ឆ្នាំ (របួសក្បាលធ្ងន់ធ្ងរ) មិនពាក់មួកសុវត្ថិភាព ទី២. ឈ្មោះ លឹម លីណា ភេទស្រី អាយុ ១៥ឆ្នាំ ពាក់មួកសុវត្ថិភាព រងរបួសបាក់ភ្លៅ។ ជនរងគ្រោះទាំងបីនាក់ រស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន​។

ចំណែកអ្នកបើកបររថយន្តមានឈ្មោះ យឹម វឌ្ឍនា ភេទប្រុស អាយុ២២ឆ្នាំ មានទីលំនៅរស់នៅភូមិលាវ ឃុំសាលាក្រៅ ស្រុកសាលាក្រៅ ខេត្តប៉ៃលិន ដោយបើកបររថយន្ដដឹកដី ពាក់ស្លាកលេខ បន្ទាយមានជ័យ 3A-6042។

នពេលកើតហេតុ គេឃើញរថយន្តដឹកដី ១គ្រឿង បើកបរ ក្នុងទិសដៅពីលិចទៅកើត ហើយក៏មានម៉ូតូ ១គ្រឿង បើកបរក្នុងទិសដៅស្របគ្នា លុះដល់កន្លែងកើតហេតុ ស្រាប់តែរថយន្តស៊ីញ៉ូបត់ឆ្វេង រីឯម៉ូតូក្មេងស្រីរងគ្រោះ ក៏បើកបរបម្រុងវ៉ាជែង លុះចាប់ហ្វ្រាំង មិន​ទាន់ ក៏បុកឡាន បណ្តាលឱ្យដួល រងរបួសធ្ងន់ស្រាល។

ជនរងគ្រោះទាំង ០៣នាក់ ត្រូវបានបញ្ជូនទៅ​សម្រាកព្យាបាលនៅមន្ទីរពេទ្យបង្អែកខេត្តប៉ៃលិន។ ចំណែកឯ​ម៉ូតូ និងរថយន្ដខាងលើ ត្រូវបានដកហូត យកទៅរក្សាទុកនៅអធិការដ្ឋាននគរបាល​ស្រុកសាលាក្រៅ ដើម្បីរង់ចាំដោះស្រាយតាមនីតិវិធី៕ នីយ៉ា