ទីក្រុងវ៉ាស៊ីនតោន៖ ក្រុមហ៊ុនយូធូបដែលជាបុត្រសម្ព័ន្ធរបស់ហ្គូហ្កលបានឯកភាពផ្ដល់ប្រាក់សំណងជំងឺចិត្តទៅលោកត្រាំចំនួន២៤,៥លានដុល្លារដើម្បីប៉ះប៉ូវការខូចខាតមុខមាត់របស់លោក។ ការសុខចិត្តសម្រុះសម្រួលគ្នានេះបន្ទាប់ពីលោកត្រាំដាក់ពាក្យប្ដឹងពីការកើតទុក្ខមិនសុខចិត្តដែលនៅសុខៗយូធូបផ្អាកដំណើរការគណនីរបស់លោក (suspend account) ក្រោយព្រឹត្តិការណ៍ខែមករា ឆ្នាំ២០២១។ កាលនោះ ក្រុមអ្នកគាំទ្ររបស់លោកសម្រុកចូលវិមានរដ្ឋសភា និងកើតជាការប្រតាយប្រតប់គ្នាស្លាប់អស់មួយចំនួន។
លោកត្រាំបានបញ្ចេញប្រតិកម្មតបចំពោះដំណឹងផ្ដល់ប្រាក់សំណងនេះ។ លោកចាត់ទុកថានេះជាជោគជ័យដ៏ធំ១សម្រាប់រូបលោក ហើយវាជាការបង្ហាញថាការប្រើប្រាស់ប្រព័ន្ធត្រួតពិនិត្យ (censor) ពីសំណាក់ក្រុមហ៊ុនបច្ចេកវិទ្យាធំៗនឹងទទួលរងផលវិបាកដូចករណីនេះអីចឹង។ លោកបង្ហោះសារដូចខាងលើនេះនៅលើទ្រូសសូសល (Truth Social) ជាបណ្ដាញសង្គមដែលលោកបង្កើតឡើងដោយផ្ទាល់ដៃ។
ការព្រមព្រៀងផ្ដល់ប្រាក់សំណងពីសំណាក់ក្រុមហ៊ុនហ្គូហ្កលលើកនេះជាករណីថ្មីបំផុតដែលក្រុមហ៊ុនបច្ចេកវិទ្យាធំៗយល់ព្រមដោះស្រាយបញ្ចប់វិវាទតបតាមពាក្យបណ្ដឹងរបស់លោកត្រាំកាលពីខែកក្កដា ឆ្នាំ២០២១។ នៅក្នុងពាក្យបណ្ដឹងនោះ លោកត្រាំចោទថាក្រុមហ៊ុនទាំងនោះចង់បំបិទមាត់សំឡេងអ្នកអភិរក្សនិយម (ក្រុមខាងស្ដាំ)។
កាលពីពេលកន្លងមក លោកត្រាំធ្លាប់ដាក់ពាក្យប្ដឹងក្រុមហ៊ុនទ្វីតថឺ (ដែលក្រោយមកទៀតដូរទៅជាក្រុមហ៊ុនអ៊ិចនៅពេលលោកអ៊ីឡន ម៉ាស់សេងយក) និងក្រុមហ៊ុនមេត្តា (Meta) ដែលជាម្ចាស់ហ្វេសប៊ុក និងក្រុមហ៊ុនអាល់ហ្វាបែត (Alphabet) ដែលជាមេរបស់ហ្គូហ្កល និងប្ដឹងនាយកប្រតិបត្តិ (CEO) របស់ក្រុមហ៊ុននេះកាលពីខែកក្កដា ឆ្នាំ២០២១។
ក្រុមហ៊ុនមេត្តា និងអ៊ិចយល់ព្រមបញ្ចប់វិវាទដោយទូទាត់ប្រាក់ប្រាក់សំណងជំងឺចិត្តមួយចំនួនទៅលោកត្រាំ។ ដោយឡែកនៅថ្ងៃនេះតាមរយៈកិច្ចព្រមព្រៀងគ្នា យូធូបយល់ព្រមប្រគល់ប្រាក់២២លានដុល្លារទៅឲ្យអង្គការមិនរកប្រាក់កម្រៃមួយក្នុងនាមជំនួសមុខឲ្យលោកត្រាំ។ តាមពិត លោកត្រាំអាចប្រើគណនីយូធូបបានដូចធម្មតាឡើងវិញតាំងពីឆ្នាំ២០២១។ ប៉ុន្តែលោកមិនអាចបង្ហោះវីឌីអូថ្មីៗជាបន្តទៀតទេចាប់តាំងពីមានអំពើបះបោររបស់ក្រុមអ្នកគាំទ្រលោកកាលពីថ្ងៃទី៦ ខែមករា។
រហូតដល់ឆ្នាំ២០២៣ទើបគណនីយូធូបរបស់លោកត្រូវបានអនុញ្ញាតឱ្យបើកដំណើរការពេញលេញឡើងវិញ។ កាលពីខែមករា ឆ្នាំ២០២៥ ក្រុមហ៊ុនមេត្តាយល់ព្រមផ្ដល់ប្រាក់សំណង២៥លានដុល្លារទៅឱ្យលោកត្រាំ។ ក្រោយមកនៅខែកុម្ភៈឆ្នាំដដែលនេះ ក្រុមហ៊ុនអ៊ិចយល់ព្រមផ្ដល់ប្រាក់សំណង១០លានដុល្លារដើម្បីបញ្ចប់វិវាទ។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ