មិនមានករណីចាប់ឃុំឃាំង និងបង្ខាំងដោយ​ខុសច្បាប់លើជនជាតិចិន ១៣នាក់ នៅក្រុងព្រះសីហនុទេ​

ខេត្តព្រះសីហនុ៖ នៅល្ងាចថ្ងៃទី២៥ ខែកក្កដា ឆ្នាំ២០២២ នេះ នៅស្នងការដ្ឋាននគរបាល​ខេត្តព្រះសីហនុ លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ និងលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានបំភ្លឺជូនសាធារណជន លើករណីបណ្តឹង ស្នើសុំអន្តរាគមន៍ ពាក់ព័ន្ធនឹងករណីថា មានការចាប់ឃុំឃាំង និងបង្ខាំងដោយខុសច្បាប់លើជនជាតិចិនចំនួន ១៣នាក់ នៅក្នុងកាស៊ីណូមួយ នៅទីក្រុងព្រះសីហនុ។

ជុំវិញបញ្ហានេះ លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ និងលោកឧត្តមសេនីយ៍​ទោ ជួន ណារិន្ទ ស្នងការនគរបាលខេត្តព្រះសីហនុ បាន​បញ្ជាក់ថា ក្រោយការស្រាវជ្រាវ មិនមានករណីបែបនេះកើតឡើងនោះទេ។

លោកឧត្តមសេនីយ៍ទោ ជួន ណារិន្ទ បានបញ្ជាក់ថា ករណីថា មានការចាប់ឃុំឃាំង និងបង្ខាំងដោយ​ខុសច្បាប់​លើជនជាតិចិន ១៣នាក់នេះ គឺប្តឹង​ដោយជនជាតិចិន កាលពីថ្ងៃទី២៥ ខែមិថុនា តាមប្រព័ន្ធ Hotline ហើយ​នៅថ្ងៃទី១៨ ខែកក្កដា ឆ្នាំ២០២២ ជនដដែលនោះ បានប្តឹងផ្ទាល់នៅសាលាដំបូងរាជធានីភ្នំពេញ។​

លោកឧត្តមសេនីយ៍ទោ ជួន ណារិន្ទ បានបន្ថែមថា ក្រោយពេលស្រាវជ្រាវ គឺ​ករណីនេះ មិនមែនជារឿងឃុំឃាំង និងបង្ខាំងដោយខុសច្បាប់ទេ។ ក្នុងនោះ ក្រោយជួបជនជាតិចិនទាំង ១៣នាក់នោះ គឺមាន ១០នាក់ ព្រមចាកចេញពីកាស៊ីណូនោះ ហើយ ៣នាក់ សុខចិត្ត​នៅបន្តធ្វើការងារ​។ មកដល់ពេលនេះ យើងនាំជនជាតិចិន ១០នាក់នោះ ចេញពីកាស៊ីណូនោះ ហើយរង់ចាំដើមបណ្តឹង ដើម្បី​មកធានា និង​ទទួល​យកជនជាតិចិន ទាំង ១០នាក់នោះ។ តែដើមបណ្តឹង មិនទាន់ចេញមុខ មកជួបសមត្ថកិច្ច នៅឡើយទេ​៕