រាជធានីភ្នំពេញ ៖ ដោយមានការគាំទ្រពីសហពន្ធ័កីឡាប្រដាល់កម្ពុជា និងនាយកដ្ឋានជំរុញវប្បធម៌នៃក្រសួងវប្បធម៌ ព្រះរាជាណាចក្រថៃ ព្រមទាំងក្រុមសម្ពន្ធ័ប្រដាល់ថៃ ក្រុមហ៊ុន Bridge Marketing Services និង ក្រុមហ៊ុន Mauy Thai Alliance បាន
រាជធានីភ្នំពេញ ៖ ដោយមានការគាំទ្រពីសហពន្ធ័កីឡាប្រដាល់កម្ពុជា និងនាយកដ្ឋានជំរុញវប្បធម៌នៃក្រសួងវប្បធម៌ ព្រះរាជាណាចក្រថៃ ព្រមទាំងក្រុមសម្ពន្ធ័ប្រដាល់ថៃ ក្រុមហ៊ុន Bridge Marketing Services និង ក្រុមហ៊ុន Mauy Thai Alliance បានសហការគ្នារៀបចំព្រឹត្តិការណ៍ប្រកួតប្រជែងដណ្ដើមជើងឯក ដោយមានកីឡាករពីព្រះរាជាណាចក្រកម្ពុជា ព្រះរាជាណាចក្រថៃ និងកីឡាករមកពីបណ្ដាប្រទេសនានាជាសមាជិកនៃសមាគមប្រជាជាតិអាស៊ាន ។
ព្រឹត្តិការណ៍នេះគឺជាការប្រកួតលក្ខណៈពិសេស មិនធ្លាប់មាននោះ គឺប្រកួតតែ១ទឹកយកឈ្នះចាញ់តែម្ដង ដែលខុសពីការប្រកួតរាល់ដងត្រូវការដល់ទៅ៥ទឹកទើបសម្រេចឈ្នះចាញ់ ។
ថ្លែងនៅក្នុងពិធីចុះហត្ថលេខាយោគយល់រវាងក្រុមហ៊ុន Bridge Marketing Services Co.,Ltd របស់ព្រះរាជាណាចក្រកម្ពុជា និងក្រុមហ៊ុន Mauy Thai Alliance របស់ថៃ កាលពីថ្ងៃទី ២៧ ធ្នូ ២០១៦ នៅសណ្ឋាគារ Sun & Moon តែម ម៉ឺន ប្រធានសហពន្ធ័ប្រដាល់កម្ពុជា បានមានប្រសាសន៍ថា នេះគឺជាទម្រង់ប្រដាល់មួយដែលមិនធ្លាប់មានពីមុន ដែលសហពន្ធ័បានរៀបចំការប្រកួត ដោយបានធ្វើកិច្ចសហប្រតិបត្តិការបែបអន្តរជាតិ ជាមួយនឹងការលើកស្ទួយកីឡាករចាស់ៗ របស់កម្ពុជា ដើម្បីរកប្រាក់ចំណូលបន្ថែម ដែលជារឿងដ៏សំខាន់ណាស់ ។
លោកថា៖« លក្ខខន្តិកៈ នៃការជ្រើសរើសកីឡាករទៅប្រកួតត្រូវមានអាយុចាប់ពី ៣៦ ដល់៤០ឆ្នាំ ហើយមួយប្រភេទទៀត គឺកីឡាករត្រូវមានអាយុចាប់ពី ៤១ឆ្នាំដល់៤៥ឆ្នាំ ដែលកម្ពុជាយើងមានកីឡាច្រើនដូចជា អេភូថង សេន ប៊ុនថេន នួន ភីរម្យជាដើម» ។
លោកហង្ស សូរិយា ប្រធានក្រុមហ៊ុន Bridge Marketing Services Co.,Ltd ដែលជាក្រុមហ៊ុនក្នុងស្រុករបស់កម្ពុជា និងជាក្រុមហ៊ុនរៀបចំព្រឹត្តិការណ៍ប្រដាល់នេះ បានអោយដឹងថា ព្រឹត្តិការណ៍នេះ នឹងធ្វើអោយកីឡាករកម្ពុជា មានឱកាសបង្ហាញសមត្ថភាព នៅលើឆាកអន្តរជាតិ តាមរយៈ ការប្រកួតជាមួយកីឡាករថៃ ហើយនឹងមានការផ្សាយផ្ទាល់នៅទូរទស្សន៍របស់ថៃ និងផ្សាយបន្តផ្ទាល់នៅទូរទស្សន៍នៅកម្ពុជាយើងផងរៀងរាល់ថ្ងៃពុធ ពេលរាត្រី ។
តាមសេចក្តីប្រកាសព័ត៌មានរបស់ក្រុមហ៊ុន Bridge Marketing Services ថា គោលបំណងនៃការរៀបចំព្រឹតិ្តការណ៍ប្រដាល់ជាលក្ខណៈអន្តរជាតិនេះ នឹងជួយពង្រឹងកិច្ចសហប្រតិបត្តិការរវាងបណ្ដាប្រទេសជាមិត្ត នៅក្នុងសហគមន៍អាស៊ានឱ្យកាន់តែជិតស្និទ្ធនិងសាមគ្គីគ្នា ជាប្រជាជាតិតែមួយដោយមានទស្សនៈកិច្ចវិស័យតែមួយ អត្តសញ្ញាណតែមួយ និងសហគមន៍តែមួយ គឺដើម្បីការរីកចម្រើនខាងវិស័យសេដ្ឋកិច្ច និងសុខសន្តិភាពនៅក្នុងប្រជាជាតិអាស៊ានទាំងមូល ។
ក្នុងនោះដែរ វាបានជួយដល់កីឡាករប្រដាល់វ័យក្មេងជំនាន់ក្រោយ ដោយផ្ដល់ឱកាសដល់ពួកគេបានមកបង្ហាញសមត្ថភាពនៅលើសង្វៀនប្រដាល់ជាខ្នាតអន្តរជាតិដើម្បី ដណ្ដើមជើងឯកនិងប្រាក់រង្វាន់ ។ ម្យ៉ាងទៀតវាក៏អាចជួយលើកស្ទួយដល់កីឡាករប្រដាល់ចាស់ៗ ដែលបានចូលនិវត្តន៍ទៅហើយ ដែលពួកគាត់ស្ទើរតែគ្មានឱកាសបានវិលមកកាន់សង្វៀនប្រដាល់សោះនោះ ឱ្យពួកគាត់បានមានឱកាសដ៏ប្រពៃវិលមកប្រកួតប្រជែងដណ្ដើមជើងឯករវាងកីឡាករ ដែលមានលក្ខណៈដូចគ្នានេះដែរ មកពីបណ្ដាប្រទេសដទៃទៀតនៅក្នុងលោក ។
មិនតែប៉ុណ្ណោះក៏ជួយលើកស្ទួយវិស័យកីឡាប្រដាល់ខ្មែរ និងកីឡាករទាំងអស់នៅលើឆាកអន្តរជាតិ ដើម្បីអោយមានការរីកចម្រើនទាំងសមត្ថភាពកិត្តិយស និងជីវភាពរស់នៅរបស់កីឡាករ ៕
ចែករំលែកព័តមាននេះ