រាជធានីភ្នំពេញ ៖ ឡុង សុភី មកពីក្លិបសាលវ័ន្តកីឡា និងសរ រាជសីហ៍ មកពីក្លិបមោងឫស្សីមរតកគុនខ្មែរ ត្រូវបានគេរៀបចំឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ទី៣១ ធ្នូ ខាងមុខនេះ ។ ឡុង សុភី ត្រូវជួបប្រកួតជាមួយកីឡាករថៃឈ្មោះ ស៊ុម៉ាអិុ ស.វីរ៉ាវ៉ាន់ ក្នុងប្រភេទទម្ងន់៦៧គីឡូក្រាម រីឯសរ រាជសីហ៍ ជួបប្រកួតជាមួយកីឡាករថៃឈ្មោះ ដាគី ស.វីរ៉ាវ៉ាន់ ក្នុងប្រភេទទម្ងន់៦៩គីឡូក្រាម ។
ឡុង សុភី មានប្រវត្តិប្រកួត១១៩ដង ឈ្នះ៩០ដង ចាញ់២៦ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន៤៣ដង ក្នុងពេលកីឡាករថៃធ្លាប់ប្រកួត៩៣ដង ឈ្នះ៦៨ដងចាញ់២៣ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន១៨ដង ។ ចាំមើល ឡុង សុភី ដែលមានប្រវត្តិប្រកួតច្រើនជាងអាចផ្ដួលកីឡាករថៃរូបនេះបានដោយរបៀបណា?
សរ រាជសីហ៍ មានប្រវត្តិប្រកួត៦១ដង ឈ្នះ៤៥ដង ចាញ់១៥ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន៨ដងក្នុងពេលកីឡាករថៃធ្លាប់ប្រកួត៨៦ដង ឈ្នះ៦២ដង ចាញ់១៩ដង និងស្មើ៥ដង ។ សរ រាជសីហ៍ ទោះបីជាមានប្រវត្តិប្រកួតតិចជាង កីឡាករថៃបន្តិចមែនប៉ុន្តែថ្វីដៃប្រកួតរបស់គេអាចជឿទុកចិត្តបាន ។ ម្យ៉ាងវិញទៀត សរ រាជសីហ៍មានចិត្តសឿងខ្លាំងតែមិនចេះក្អេងក្អាងឡើយ ។ សម្រាប់អ្នកធ្លាប់តាមដានការប្រកួតភាគច្រើនគេគិតថា គូនេះអាចស៊ីសងគ្នាបានព្រោះកីឡាករថៃរូបនេះធ្លាប់មកប្រកួតនៅលើសង្វៀនស្រុកខ្មែរច្រើនលើកច្រើនសារួចមកហើយ ដូច្នេះគេអាចប៉ាន់ស្មានពីកម្រិតវិជ្ជាគុនរបស់កីឡាករថៃរូបនេះបានច្បាស់លាស់ ។
រីឯគូប្រកូតមិត្តភាពធម្មតាវិញនោះមានកីឡាករ ហ៊ឹម សារ៉ាន់ មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ ជឹម ចិត្រា មកពីក្លិខ្លារខិនមានរិទ្ធ និងគូចុងក្រោយកីឡាករ រិន សារ័ត្ន មកពីក្លិបបញ្ជាការដ្ឋានកងទ័ពជើងទឹក ប្រកួតជាមួយកីឡាករ រិទ្ធ មុន្នី មកពីក្លិបមកុដរាជសីហ៍ ។
ដោយឡែកនៅលើសង្វៀនទូរទស្សន៍ស៊ីធីអិននៅថ្ងៃសៅរ៍នេះដែរ ក៏មានការប្រកួតប្រដាល់មិត្តភាពអន្តរជាតិរវាងកីឡាករកម្ពុជានិងកីឡាករថៃដែលសុទ្ធតែជាជើងខ្លាំងលំដាប់
ជួរមុខក្នុងពិភពប្រដាល់នៃប្រទេសទាំង២ ផងដែរ ។ សម្រាប់គូអន្តរជាតិមានចំនួន២គូ គឺកីឡាករ ចាន់ គង់រាជ មកពីក្លិបតាព្រហ្មមានជ័យ ប្រកួតជាមួយកីឡាករថៃឈ្មោះ
វីហ្គោ សរ.ដានឆ័យ ក្នុងប្រភេទទម្ងន់៥៧គីឡូក្រាម និងកីឡាករ លាង ស៊ីពេជ្រ មកពីក្លិបអេភូថងកីឡា ប្រកួតជាមួយកីឡាករថៃឈ្មោះ ឃុំស្នេហ៍ ស.វីរ៉ាវ៉ាន់ ក្នុងប្រភេទទម្ងន់៦៣,៥គីឡូក្រាម ។
ចាន់ គង់រាជ ធ្លាប់ប្រកួត៤៤ដង ឈ្នះ៣១ដង ចាញ់១១ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៨ដង ក្នុងពេលកីឡាករ វីហ្គោ សរ.ដានឆ័យ ធ្លាប់ប្រកួត៥៤ដង ឈ្នះ៤៤ដង ចាញ់១០ដង និងធ្លាប់ផ្ដួលគូប្រកួតឱ្យសន្លប់បាន៦ដង ។ គូនេះមិនធ្លាប់ជួបគ្នាពីមុនមកទេដូច្នេះមិនអាចប៉ាន់ស្មានពីលទ្ធផលទុកមុនបានឡើយ ។
លាង ស៊ីពេជ្រ ធ្លាប់ប្រកួត៨១ដង ឈ្នះ៦៣ដង ចាញ់១៧ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន១៦ដង ក្នុងពេលកីឡាករឃុំស្នេហ៍ ស.វីរ៉ាវ៉ាន់ ធ្លាប់ប្រកួត៦៥ដង ឈ្នះ៤៩ដង ចាញ់១២ដង ស្មើ៤ដង ។ លាង ស៊ីពេជ្រ បើទោះជាមានប្រវត្តិប្រកួតច្រើនជាងគូប្រកួតបន្តិចមែនក៏មិនប្រាកដថាឈ្នះនោះដែរព្រោះកីឡាករថៃរូបនេះក៏មានសមត្ថភាពមិនធម្មតា ដូច្នេះមានតែរង់ចាំមើលការប្រកួតជាក់ស្ដែងប៉ុណ្ណោះនរណាខ្លាំងជាងនរណាគង់តែដឹងទេ ។
ចំណែកគូប្រកួតមិត្តភាពធម្មតាវិញមានកីឡាករសៅ ប៊ុនធឿន មកពីក្លិបតាព្រហ្មមានជ័យ ត្រូវប្រកួតជាមួយកីឡាករផាត សូដា មកពីក្លិបអេភូថងកីឡា ។ កីឡាករ ចាន់ រតនៈ មកពីក្លិបបញ្ជាការដ្ឋានកងទ័ពជើងទឹក ប្រកួតជាមួយកីឡាករ ឃន គឹមហេង មកពីក្លិបតាព្រហ្មមានជ័យ និងគូចុងក្រោយកីឡាករ ជ័យ ស៊ីនេត មកពីក្លិបឃ្លាំងមឿងកីឡា ប្រកួតជាមួយកីឡាករ ណាម ម៉ូរ៉ាក់ មកពីក្លិបពន្លឺសាមគ្គីខេត្តបាត់ដំបង ៕
ចែករំលែកព័តមាននេះ