​ភ្នំពេញ៖ ការិយាល័យទី៤ នៃកងទ័ពជើងគោកកម្ពុជា បានស្នើសុំជំនួយជាសម្ភារៈ និងរថយន្ត​ពីការិយាល័យ​កងទ័ពជើងគោក​ នៃសាធារណរដ្ឋកូរ៉េ។ ចំពោះ​ការស្នើសុំ​នេះ ត្រូវបានកងទ័ពកូរ៉េ សន្យាថា នឹងយកទៅជម្រាបជូន​ថ្នាក់លើ​។

 ​ការស្នើសុំជំនួយយោធានេះ បានធ្វើឡើង នៅថ្ងៃទី២០ ខែកក្កដា ឆ្នាំ២០២២ ក្នុងជំនួបរវាង​លោក​​ឧត្តមសេនីយ៍ទោ ជ វណ្ណរិទ្ធ នាយសេនាធិការរង នាយការិយាល័យទី៤ កងទ័ពជើងគោកកម្ពុជា​ ជាមួយ​ឧត្តមសេនីយ៍ត្រី HA, HEON CHEOL​ នាយរង ការិយាល័យទី៤ ទទួលបន្ទុកផែនការ​ភស្តុភារ​កងទ័ពជើងគោក នៃសាធារណរដ្ឋកូរ៉េ​។ ក្នុងជំនួបនោះ ​បានធ្វើឡើង ខណៈលោក​ឧត្តមសេនីយ៍ត្រី ​HA, HEON CHEOL បានដឹកនាំប្រតិភូ អញ្ជើញមកធ្វើទស្សនកិច្ច និង បំពេញការងារ នៅកម្ពុជា។

នៅក្នុងជំនួបនោះ លោក​ឧត្តមសេនីយ៍ទោ ជ វណ្ណរិទ្ធ បានលើកឡើងពីដំណើរទស្សនកិច្ច របស់ការិយាល័យទី ៤ កងទ័ពជើងគោក កងយោធពលខេមរភូមិន្ទ នៅប្រទេសកូរ៉េ នាខែ កញ្ញា ខាងមុខនេះ តបតាមការអញ្ជើញរបស់ភាគីកូរ៉េ ក្នុងគោលដៅធ្វើយ៉ាងណា អោយនាយទាហាន ជំនាញការិយាល័យទី ៤ កងទ័ពជើងគោកក ម្ពុជា បានទទួលនូវ​ចំណេះដឹងថ្មី និង​បទពិសោធន៍​ការងារ ដើម្បី​នាំយកនូវចំណេះដឹងមកធ្វើការ អភិវឌ្ឍអង្គភាព របស់ខ្លូនអោយទទួលបាន​លទ្ធផលល្អ​។

មានមតិឆ្លើយតបវិញ ឧត្តមសេនីយ៍ត្រី (HA, HEON CHEOL) បានទទួលយកនូវសំណើរបស់ ការិយាល័យទី៤ កងទ័ពជើងគោក កងយោធពលខេមរភូមិន្ទ ដើម្បីយកទៅពិក្សាជាមួយថ្នាក់លើ​របស់ខ្លួន ក្នុងនោះ រួមមាន ទាំងការស្នើសុំ​ការជួយឧបត្ថម្ភ ទៅលើសំភារៈ និង​រថយន្ត ជូនការិយាល័យ ទី​៤ កងទ័ពជើងគោកផងដែរ​។

ឆ្លៀតក្នុងឱកាសនោះដែរ លោក​ឧត្តមសេនីយ៍ទោ ជ វណ្ណរិទ្ធ បានលើកឡើងពីការផ្លាស់ប្ដូរ​បទពិសោធន៍​គ្នាទៅវិញទៅមក តាមរយៈការចុះកម្មសិក្សារយៈពេលខ្លី និងការធ្វើផ្លាស់ប្តូរ​ទស្សនកិច្ច រវាងជំនាញការិយាល័យទី៤ កងទ័ពទាំងពីរ កម្ពុជា -កូរ៉េ តាមរយៈអនុសារណៈយោគ​យល់ ( MOU) ដើម្បីធ្វើយ៉ាងណា អោយកិច្ចសហប្រតិបត្តិការ រវាងកងទ័ពប្រទេសទាំងពីរ មានការរីកចំរើនទៅថ្ងៃអនាគត។

ក្នុងឱកាសនោះដែរ លោក​ឧត្តមសេនីយ៍ត្រី (HA, HEON CHEOL) បានថ្លែងអំណរគុណដល់ ការិយាល័យទី៤ កងទ័ពជើងគោក កម្ពុជា ដែលបានទទួលស្វាគមន៍ ចំពោះ​ប្រតិភូ ភស្តុភារកងទ័ពជើងគោក នៃសាធារណរដ្ឋកូរ៉េ ដែលបានមកធ្វើទស្សនៈកិច្ច និងបំពេញការងារនៅកម្ពុ​ជា៕ សុខ សារ៉ាយ