រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់គោជល់រដូវកាលទី៦ក្នុងប្រភេទទម្ងន់៦៥គីឡូក្រាមនៅលើសង្វៀនទូរទស្សន៍ CNC បានឈានចូលដល់វគ្គផ្តាច់ព្រ័ត្រហើយនៅថ្ងៃសៅរ៍ ទី២៤ ធ្នូ ស្អែកនេះ ។
រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់គោជល់រដូវកាលទី៦ក្នុងប្រភេទទម្ងន់៦៥គីឡូក្រាមនៅលើសង្វៀនទូរទស្សន៍ CNC បានឈានចូលដល់វគ្គផ្តាច់ព្រ័ត្រហើយនៅថ្ងៃសៅរ៍ ទី២៤ ធ្នូ ស្អែកនេះ ។ បេក្ខភាពដែលត្រូវឡើងមកដល់វគ្គផ្តាច់ព្រ័ត្រនេះមាន មឿន សុខហ៊ុច មកពីក្លិបពុទ្ធសិរីវង្សព្រែកតាទែន ជួបប្រកួតជាមួយកីឡាករថៃ ឈ្មោះ ចមភព ស.វីរ៉ាវ៉ាន់ ដណ្ដើមចំណាត់ថ្នាក់លេខ១ ខណៈឃុន សំខាន់ មកពីក្លិបកងពលតូចលេខ៧០ ប្រកួតជាមួយកីឡាករថៃឈ្មោះ នឹងត្រាកាន ក.កាមមន្តវ៉ាត ដណ្តើមចំណាត់ថ្នាក់លេខ៣ ។
ការជួបគ្នារវាងមឿន សុខហ៊ុច និង ចមភពស.វិរ៉ាវ៉ាន់ នៅវគ្គផ្ដាច់ព្រ័ត្រនេះបានធ្វើឱ្យអ្នកតាមដានការប្រកួតភាគច្រើនពិបាកវាយតម្លៃខ្លាំងណាស់ ព្រោះកាលប្រកួតវគ្គជម្រុះពួកគេទាំង២សុទ្ធតែមិនធ្លាប់ស្គាល់ចាញ់ដូចគ្នា ។ មឿន សុខហ៊ុច មានប្រវត្តិប្រកួត១០១ដង ឈ្នះ៧២ដង ចាញ់២៤ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់១៥ដង ក្នុងពេលកីឡាករថៃចមភព ស.វីរ៉ាវ៉ាន់ ធ្លាប់ប្រកួត៨៩ដង ឈ្នះ៧៧ដង ចាញ់១០ដង ស្មើ២ដង និងធ្លាប់ផ្ដួលគូប្រកួតឱ្យសន្លប់១៦ដង ។ សំអាងទៅលើប្រវត្តិប្រកួតនិងភាពប៉ិនប្រសប់ក្នុងការប្រើកែង និងជង្គង់របស់មឿន សុខហ៊ុច តំណែងជាម្ចាស់ខ្សែក្រវាត់គោជល់រដូវកាលទី៦នេះប្រហែលជាគេចមិនផុតពីធ្លាក់ក្នុងកណ្ដាប់ដៃកីឡាករកម្ពុជារូបនេះទេមើលទៅ។
ចំណែកការប្រកួតដណ្ដើមយកចំណាត់ថ្នាក់លេខ៣រវាង ឃុន សំខាន់ ជាមួយនឹងត្រាកាន ក.កាមន្តវ៉ាត វិញនោះ គេមិនសូវជាមានជំនឿចិត្តលើកីឡាករកម្ពុជារូបនេះប៉ុន្មានឡើយ ព្រោះឃុន សំខាន់ មុននឹងបានឡើងមកដល់វគ្គនេះជួបការលំបាកយ៉ាងខ្លាំង ។ លោក ទេស សារិន ដែលជាគ្រូបង្ហាត់កីឡាករឃុន សំខាន់ ប្រាប់ថា សិស្សរបស់គាត់ធ្លាប់ជួបកីឡាករថៃរូបនេះ២លើកចាញ់ទាំង២លើកទើបលោកពិបាកនិយាយកាន់ជើងកូនសិស្សម្នាក់នេះណាស់ ។
ក្រៅពីគូដណ្ដើមខ្សែក្រវាត់ទាំង២គូនេះទៅ នៅមានគូប្រកួតមិត្តភាពអន្តរជាតិកម្ពុជា-ថៃមួយគូទៀតគឺ ឃឹម ឌីម៉ា មកពីក្លិបរស្មីភូមិគាប ដែលធ្លាប់ប្រកួត៦៤ដង ឈ្នះ៥៥ដង ចាញ់៦ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់២០ដង នឹងជួបប្រកួតជាមួយកីឡាករថៃឈ្មោះ កីនុក ណយលូកឈុនប្រាថាន ដែលធ្លាប់ប្រកួត១៣០ដង ឈ្នះ១០៥ដង ចាញ់២០ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់១៥ដង ។ ដូច្នេះសម្រាប់ការប្រកួតលើកនេះ ឃឹម ឌីម៉ា មិនអាចធ្វេសប្រហែសបានឡើយ ។
ក្រឡេកមើលការប្រកួតមិត្តភាពអន្តរជាតិកម្ពុជា-ថៃនៅលើសង្វៀនទូរទស្សន៍CTNថ្ងៃសៅរ៍នេះដែរពោរពេញដោយកីឡាករខ្លាំងៗ ដូចជា វី សេរីចាន់ឌីន មកពីក្លិបខ្លារខិនមាន
រិទ្ធ ប្រកួតជាមួយកីឡាករថៃឈ្មោះ អិនស៊ី ឌែង វិរិយៈហ្វាម ក្នុងប្រភេទទម្ងន់៦៧គីឡូក្រាម រីឯផង់ សុភាព មកពីក្លិបរាជសីហ៍ខេត្តរតនគិរី ប្រកួតជាមួយកីឡាករថៃឈ្មោះកុងម៉េធី ស៊ីតប៉ុម ពឺន ក្នុងប្រភេទទម្ងន់៦៥គីឡូក្រាម ។
វី សេរីចាន់ឌីន ធ្លាប់ប្រកួត៦៧ដង ឈ្នះ៥២ដង ចាញ់១២ដង ស្មើ៤ដង និងធ្លាប់ផ្ដួលគូប្រកួតឱ្យសន្លប់១៥ដង ក្នុងពេលកីឡាករថៃជាគូប្រកួត ធ្លាប់ប្រកួតបាន៦៤ដង ឈ្នះ៥១ដង ចាញ់១២ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន១ដង ។ រីឯផុង សុភាព ធ្លាប់ប្រកួតបាន៧៩ដង ឈ្នះ៦២ដង ចាញ់១៥ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន១៣ដង ក្នុងពេលកីឡាករថៃដែលជាគូប្រកួតធ្លាប់ប្រកួតបាន១០៥ដង ឈ្នះ៨១ដង ចាញ់២១ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១០ដង ។
នៅលើសង្វៀនដដែលសម្រាប់គូប្រកួតមិត្តភាពធម្មតាវិញមានកីឡាករ ព្រំ វី មកពីក្លិបទីបញ្ជាការកងទ័ពជើងទឹក ប្រកួតជាមួយកីឡាករ ហ៊ែល វ៉ា មកពីក្លិបឃ្លាំងមឿង កីឡា និងកីឡាករផាន ចំណាន មកពីក្លិបរាជសីហ៍ខេត្តរតនគិរី ប្រកួតជាមួយកីឡាករ រៀវ ចំណាប់ មកពីសមាគមកីឡាប្រដាល់ក្រសួងការពារជាតិ ។
ដោយឡែកសម្រាប់កម្មវិធីប្រកួតប្រដាល់នៅលើសង្វៀនទូរទស្សន៍CNCថ្ងៃអាទិត្យទី២៥ធ្នូ ប្រជុំដោយកីឡាករខ្លាំងៗជាច្រើនគូដែលត្រូវចូលខ្លួនសាកវិជ្ជាគុនជូនទស្សនិកជនទស្សនាកម្សាន្តនៅថ្ងៃសម្រាកចុងសប្តាហ៍ ។ កីឡាករ សិទ្ធ លីដា មកពីក្លិបសាមគ្គីកូនខ្មែរ ប្រកួតជាមួយកីឡាករ សុខ កាន មកពីក្លិបឃ្លាំងមឿងកីឡា ។ កីឡាករ លីន ជី មកពីក្លិបបុរីរាជសីហ៍ ប្រកួតជាមួយ កីឡាករ ហេង ពៅ មកពីក្លិបកងពលតូចលេខ៧០ ។ កីឡាករ ង៉ែត្រ វុធ មកពីក្លិបកងពលតូចលេខ៧០ ប្រកួតជាមួយកីឡាករ ឌុម កែវដប មកពីក្លិបសុភានូមានជ័យ ។ កីឡាករ ឡុង ឡា មកពីក្លិបអប់រំកាយស្រុកអន្លង់វែងប្រកួតជាមួយកីឡាករ ចេង គា មកពីក្លិបសាលវ័ន្តកីឡា និងគូចុងក្រោយកីឡាករ វី រ៉ាកុង មកពីក្លិបខ្លារខិនមានរិទ្ធ ប្រកួតជាមួយកីឡាករ សូ ស៊ីន មកពីក្លិបអេភូថងកីឡា ៕
ចែករំលែកព័តមាននេះ