ខេត្តកំពត ៖ ក្រុមគ្រួសារសាច់ញាតិបាននិងកំពុងនាំគ្នាចុះមុជទឹករាវរកស.ពស្ត្រីដែលមានសតិមិនគ្រប់ម្នាក់ ក្រោយធ្វើសកម្មភាពយកពូថៅទៅកាប់គេរងរបួស ហើយភិតភ័យក៏ចុះទឹកប្រឡាយបាត់ខ្លួនតែម្តង ដែលគិតត្រឹមរសៀលថ្ងៃទី១៩ កក្កដា នេះ នៅតែមិនទាន់រកឃើញវិញ ។ ស្ត្រីរូបនោះ ឈ្មោះពេជ្រ សូរិយា អាយុ៣៨ឆ្នាំ មានប្ដីមានកូនស្រីម្នាក់ អាយុ១២ឆ្នាំ រស់នៅភូមក្រាំងដូង ឃុំសំរោងក្រោម ស្រុកបន្ទាយមាស ខេត្តកំពត ។
ប្រភពឱ្យដឹងថា កាលពីវេលាម៉ោង០៥ល្ងាចថ្ងៃទី១៨ កក្កដា ស្ត្រីខាងលើបានកា.ប់បុរសម្នាក់ត្រូវមួយពូថៅ បណ្ដាលឱ្យរងរបួសត្រង់ដៃ ហើយត្រូវបានគេបញ្ជូនទៅកាន់មន្ទីរពេទ្យឯកជនមួយផ្សារទូកមាស ក្នុងស្រុកបន្ទាយមាស ។ តែដោយឡែក ស្ត្រីដែលកា.ប់គេ (ឈ្មោះពេជ្រសូរិយា) ត្រូវបានអ្នកភូមិនាំគ្នាដេញរត់ចេញពីភូមិ ទៅទិសខាងលិច ហើយលោតទឹកប្រឡាយបាត់ខ្លួនតែម្តងទៅ ។
បើតាមការអោយដឹងពីស្ត្រីឈ្មោះពេជ្រ ស្រីពៅ អាយុ៤៩ឆាំ្ន ត្រូវជាបងស្រីបង្កើតបានឱ្យដឹងថាប្អូនស្រីគាត់ មានកូនមានប្ដី បន្ទាប់ពីការហើយប្អូនស្រីទៅរកសុីនៅខេត្តសៀមរាប តែក្រោយមកបានត្រឡប់មកនៅស្រុកកំណើតវិញ គឺភូមិក្រាំងដូង។ គាត់និយាយថា ប្អូនស្រីគាត់បន្ទាប់ពីបានឆ្លងទន្លេហើយ ស្រាប់តែមានសុខភាពមិនល្អ (បើចាស់ៗបុរាណច្រើនតែនិយាយថា ក្រឡាភ្លើង ឬឬថាព្រាយចូលសន្ធិត) ធ្វើឱ្យប្អូនស្រីវង្វេងមុខក្រោយមិនគ្រប់តែម្ដងទៅ ។
ពេជ្រ ស្រីពៅ និយាយថា បន្ទាប់ពីបានកា.ប់បុរសអ្នកភូមិម្នាក់របួស ក៏ត្រូវអ្នកភូមិដេញ រហូតមានការភិតភ័យលោតទឹកប្រឡាយបាត់ខ្លួនតាំងពីល្ងាចថ្ងៃទី១៨ កក្កដា ។ ទោះបីជាប្អូនមានចរិតមិនគ្រប់ក៏ដោយ គ្រួសារបានចុះប្រឡាយរាវរកស.ពបន្តនៅព្រឹកថ្ងៃទី១៩ កក្កដា នេះ ដើម្បីយកទៅធ្វើបុណ្យ។
លោកអ៊ុក សំអុល ប្រធាននគរបាលប៉ុស្តិ៍សំរោងក្រោមនិយាយថា នគរបាលប៉ុស្តិ៍ សហការជាមួយនិងប្រជាការពារ បានខំស្វែងរកស្ត្រីបាត់ខ្លួនរយៈពេលពីរថ្ងៃហើយ នៅតែរកសាកសពមិនឃើញរសៀលថ្ងៃទី១៩ កក្កដា ។
ចែករំលែកព័តមាននេះ