បញ្ជូនជនសង្ស័យ៣នាក់ ពាក់ព័ន្ធលួច និងទទួលផលចោរកម្មទៅសាលាដំបូង
រាជធានីភ្នំពេញ ៖ សមត្ថកិច្ចនគរបាលការិយាល័យអន្តរាគមន៍ នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃកាលពីថ្ងៃទី១៩ ធ្នូ បានបញ្ជូនជនសង្ស័យ៣នាក់ពាក់ពន្ធពីបទលួច
រាជធានីភ្នំពេញ ៖ សមត្ថកិច្ចនគរបាលការិយាល័យអន្តរាគមន៍ នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃកាលពីថ្ងៃទី១៩ ធ្នូ បានបញ្ជូនជនសង្ស័យ៣នាក់ពាក់ពន្ធពីបទលួច និងទទួលផលចោរកម្មទៅកាន់សាលាដំបូងរាជធានីភ្នំពេញ។ ជនសង្ស័យ៣នាក់ ទី១.ឈ្មោះ ម៉ៅ សុខុម ហៅតាបេ អាយុ៦១ឆ្នាំ រស់នៅក្នុងសង្កាត់ទួលសង្កែ ខណ្ឌឬស្សីកែវ ទើបតែចេញពីពន្ធនាគារខេត្តតាកែវ ទី២.ឈ្មោះ ហូន ម៉េងហ៊ាង អាយុ២៤ឆ្នាំ រស់នៅសង្កាត់ទួលសង្កែ ខណ្ឌឬស្សីកែវ ជាជាងផ្សារដែកផង ធ្វើចោរលួចផង និង ទី៣.ឈ្មោះ សាំង ភារុណ អាយុ២៧ឆ្នាំ រស់នៅសង្កាត់ទួលសង្កែ ខណ្ឌឬស្សកែវ។ សម្ភារដកហូតមានម៉ូតូហុងដាឌ្រីម ពណ៌ខ្មៅ ស៊េរី២០១១ ពាក់ស្លាកលេខ កណ្ដាល ១O-៥០៩៧ មួយគ្រឿង។
លោកវរៈសេនីយឯក ជាវ វិបុល ប្រធានការិយាល័យអន្តរាគមន៍ នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានឲ្យដឹងថា កាលពីថ្ងៃទី០៧ ខែធ្នូ និងថ្ងៃទី១៦ ខែធ្នូ ឆ្នាំ២០១៦ មានករណីចោរលួចកាច់សោកម៉ូតូ ជាបន្តបន្ទាប់នៅក្នុងរាជធានីភ្នំពេញ ។ អំពើចោរកម្មដែលបានកើតឡើងនោះ ត្រូវបានជនរងគ្រោះដាក់ពាក្យបណ្ដឹងចូលសមត្ថកិច្ច ។ ក្រោយពីបានទទួលពាក្យបណ្ដឹង លោកវរៈសេនីយឯក ជាវ វិបុល បានប្រើប្រាស់កម្លាំងជំនាញធ្វើការស្រាវជ្រាវ និងឈានដល់ការកំណត់មុខសញ្ញាលួចនោះ លុះថ្ងៃទី១៦ ខែធ្នូ ឆ្នាំ២០១៦ ក៏បានឃាត់ខ្លួនមុខសញ្ញាប្រព្រឹត្តបទល្មើសជាក់ស្ដែងនៅក្នុងសង្កាត់វាលវង់ ខណ្ឌ៧មករា ម្នាក់ និងដកហូតម៉ូតូដែលជនសង្ស័យទើបតែលួចបានពីជនរងគ្រោះឈ្មោះ សេក ផល្លី អាយុ៣៣ឆ្នាំ រស់នៅក្នុងភូមិទួលសង្កែ ខណ្ឌឬស្សីកែវ ។
ក្រោយពីឃាត់ខ្លួនជន សង្ស័យបានសារភាពថា ក្នុងសកម្មភាពលួចម៉ូតូរាល់លើក គឺមានបក្ខពួកចូលរួម និងមានអ្នកចាំទទួលទិញ។ យោងលើចម្លើយសារភាពនោះ សមត្ថកិច្ចបន្តទៅឃាត់ខ្លួនជនសង្ស័យ២នាក់ទៀត និងបានកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញ តាមនិតិវិធី ។ រហូតដល់រសៀលថ្ងៃទី២០ ធ្នូ នេះ ចៅក្រមស៊ើបសួរបានសម្រេចចេញដីកាឃុំខ្លួន ជនសង្ស័យទាំង៣នាក់ដាក់ពន្ធនាគារព្រៃសជាបណ្តោះអាសន្ន៕
ចែករំលែកព័តមាននេះ