កីឡា៣៩ប្រភេទ និងកីឡាសម្ដែង១ ត្រូវបានអនុម័តសម្រាប់ស៊ីហ្គេមនៅកម្ពុជា
- ភ្នំពេញ
រាជធានីភ្នំពេញ ៖ កីឡាចំនួន៣៩ប្រភេទ និងកីឡាសម្ដែង១ប្រភេទ ត្រូវបានអនុម័តដោយក្រុម
រាជធានីភ្នំពេញ ៖ កីឡាចំនួន៣៩ប្រភេទ និងកីឡាសម្ដែង១ប្រភេទ ត្រូវបានអនុម័តដោយក្រុមប្រឹក្សាសហព័ន្ធកីឡាអាស៊ីអាគ្នេយ៍ សម្រាប់ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជា ដែលទទួលរៀបចំធ្វើម្ចាស់ផ្ទះជាលើកដំបូងក្នុងប្រវត្តិសាស្ត្រ ។ ការអនុម័តត្រូវបានធ្វើឡើងនៅក្នុងកិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍លើកទី២ នៅសណ្ឋាគាររ៉េស៊ីដង់សុខាភ្នំពេញរយៈពេល៣ថ្ងៃ ពីថ្ងៃទី១១-១៣ ខែកក្កដា ឆ្នាំ២០២២។
ជាបទដ្ឋានកីឡាកាតព្វកិច្ច រួមមានអត្តពលកម្ម និងកីឡាក្នុងទឹក នឹងស្ថិតនៅជាប្រភេទកីឡាចំណាត់ថ្នាក់ទី១ ដែលបានបញ្ជាក់សម្រាប់ស៊ីហ្គេមនៅកម្ពុជា ឆ្នាំ២០២៣ ។ កីឡាសរុបចំនួន៣១ ត្រូវបានសម្រេចនៅក្នុងប្រភេទកីឡាចំណាត់ថ្នាក់ទី២ ដែលនឹងឃើញមានការរួមបញ្ចូលគ្នានៃប្រភេទ
កីឡាអូឡាំពិក និងកីឡាអាស៊ី ។ ចំណែកប្រភេទកីឡាចំណាត់ថ្នាក់ទី៣ ដែលជាកីឡាក្នុងតំបន់ និងកីឡាប្រពែណី ត្រូវបានដឹងថា មានកីឡាចំនួន ៦ប្រភេទ និងចុងក្រោយកីឡាសម្ដែងដែលជាកីឡាមិនស្ថិតក្នុការប្រកួតប្រជែងដណ្ដើមមេដាយ មាន១ប្រភេទត្រូវបានដាក់បញ្ចូលផងដែរ ។ កីឡាដែលត្រូវបានអនុម័តរួមមាន៖
ប្រភេទកីឡាចំណាត់ថ្នាក់ទី១៖ ១.អត្តពលកម្ម (Track&Field និង ម៉ារ៉ាតុង), ២.កីឡាលើទឹក (ហែលទឹក, លោតទឹក និងបាល់ទឹក)។
ប្រភេទកីឡាចំណាត់ថ្នាក់ទី២៖ ៣.វាយសី, ៤.បាល់បោះ (៥×៥ និង ៣×៣), ៥.ប៊ីយ៉ា ស្នូកឃ័រ, ៦.ប្រដាល់សកល, ៧.ប្រណាំងទូកប្រពៃណី, ៨.អុក (អុកចត្រង្គ និងអុកចិន), ៩. គ្រីឃីត, ១០.ទោចក្រយាន (កង់គួក និងកង់ភ្នំ), ១១.កីឡារាំ, ១២.បាល់ទាត់, ១៣.គុនដាវ, ១៤. ហែលទឹកជើងទា, ១៥.វាយកូនគោល, ១៦. កាយសម្ព័ន្ធ (Aerobic and Artistic), ១៧.ហុកគី(រួមបញ្ចូលក្នុងសាល និងក្រៅសាល), ១៨. យូដូ, ១៩.ការ៉ាតេ, ២០.គុនខ្មែរ (មួយ), ២១. ប៉េតង់, ២២.ទូកក្ដោង, ២៣.សីដក់ (រួមបញ្ជូលសីឈិនឡូន), ២៤.បញ្ចសីលា, ២៥.សូហ្វតេន្នីស,២៦.វាយកូនឃ្លីលើតុ, ២៧.តេក្វាន់ដូ WT, ២៨. វាយកូនបាល់, ២៩.ទ្រីយ៉ាត្លុង (រួមទាំងអាគ័រត្លុង និងឌូអាត្លុង), ៣០.បាល់ទះ (ក្នុងសាល និងលើឆ្នេរខ្សាច់), ៣១.លើកទម្ងន់, ៣២.ចំបាប់, ៣៣.វ៉ូស៊ូ។
ប្រភេទកីឡាចំណាត់ថ្នាក់ទី៣៖ ៣៤. កាយវប្បកម្ម, ៣៥.កីឡាអេឡិចត្រូនិក, ៣៦.កីឡា Floorball, ៣៧.ម៉ូតូទឹក, ៣៨.យុទ្ធគុនចម្រុះ(គុនល្បុក្កតោ, Arnis គុនដំបងរបស់ហ្វីលីពីន, ជឺជីតស៊ូ, ឃីកបុកសីង, យុទ្ធគុនចម្រុះកូរ៉េ ITF, វ៉ូវីណាម និង៣៩. កីឡាឧបសគ្គ។
ដោយឡែក កីឡាសម្ដែងដែលមានជាលើកដំបូងនោះគឺកីឡា Teqball ជាកីឡាបាល់មួយដែលត្រូវបានលេងនៅលើតុកោង ដោយរួមបញ្ចូលគ្នានូវរបៀបលេងកីឡាបាល់ទាត់ និងវាយកូនឃ្លីលើតុ។ ជាមួយគ្នានេះផងដែរនៅមានកីឡាចំនួន ៥ប្រភេទផ្សេងទៀត ក៏ត្រូវបានស្នើសុំដាក់ពិចារណាផងដែរ រួមមាន កីឡាបាញ់កាំភ្លើង, កីឡា Kurash, កីឡាកាយសម្ព័ន្ធ វិញ្ញាសា (Rythmic), អុកអន្តរជាតិ និងកីឡាបាញ់ធ្នូ។
ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាស៊ីហ្គេម
លើកទី៣២ ឆ្នាំ២០២៣ បានមានប្រសាសន៍ថា ៖«ចំពោះចំណុចសំខាន់ៗដែលកម្ពុជាទទួលបានក្នុងកិច្ចប្រជុំ គឺកម្ពុជាទទួលបានការអនុម័តលើ ៣៩ប្រភេទកីឡា និងប្រភេទកីឡាសម្ដែងមាន១។ ប្រភេទកីឡាដែលយើងបានធ្វើការកំណត់មាន ៣៩ប្រភេទកីឡា និងមានកីឡាសម្ដែង១ប្រភេទ ហើយយើងទុក ៥ ប្រភេទទៀតដែលគេសំណូមពរឲ្យយើងទុកជាការពិចារណា។ បើអាចយើងដាក់ បើមិនអាច យើងអត់ដាក់ឡើយ។
អ៊ីចឹងក្នុង៣៩ប្រភេទកីឡានេះ ដោយសារយើងបង្រួមចូលគ្នា លើប្រភេទកីឡាមួយចំនួន ៦ប្រភេទកីឡាឲ្យចូលទៅក្នុងក្រុមកីឡាយុទ្ធគុនចម្រុះ ដូចជាល្បុក្កតោ, Arnis, វ៉ូវីណាម ជាដើមយើងច្របាច់ចូលមួយក្រុម អ៊ីចឹងយើងទទួលបានចំនួនមួយច្បាស់លាស់ ។ ប្រភេទកីឡាទាំងអស់ ប្រទេសទាំងអស់សប្បាយចិត្តដោយសារយើងបានដាក់សឹងតែទាំងអស់នៃប្រភេទកីឡារបស់គេទៅហើយ ។ អ៊ីចឹងគេសប្បាយចិត្ត គេថាលើកទី១ កម្ពុជាធ្វើ ប៉ុន្តែកម្ពុជាមានបេះដូងធំ អាចផ្ដល់ឲ្យគេនូវទំនុកចិត្តក្នុងការដាក់បញ្ចូលប្រភេទកីឡាទាំងអស់បាន ៕
ចែករំលែកព័តមាននេះ