រាជធានីភ្នំពេញ ៖ ការប្រកួតបាល់ទះលីកកំពូលកម្ពុជា ដែលត្រូវបានគេប្រសិទ្ធនាមថា The 1st Cambodia Beer Volleyball League នឹងចាប់ផ្ដើមធ្វើនៅដើមខែមករា ឆ្នាំ២០១៧ ខាងមុខនេះ ។
លោក បឹង គឹមតោ អគ្គលេខាធិការសហព័ន្ធកីឡាបាល់ទះកម្ពុជាបានឱ្យដឹងថា ការប្រកួតនេះមានកិច្ចសហការឧបត្ថម្ភធំដោយក្រុមហ៊ុនស្រាបៀរកម្ពុជា និងជាការប្រកួតលើកទី១ដែលពុំធ្លាប់មានពីមុនមកថែមទៀត ។ គិតរហូតមកទល់នឹងពេលនេះ លោកនៅមិនទាន់ដឹងថា មានក្រុមប៉ុន្មានដែលបានមកចុះឈ្មោះចូលរួមប្រកួតនៅឡើយ ខណៈសហព័ន្ធកំពុងផ្សព្វផ្សាយជាសាធារណៈដល់បណ្ដាក្លិបកំពូលៗនៅក្នុងប្រទេសដើម្បីឱ្យបានជ្រាបជាដំណឹង ប្រញាប់មកចុះឈ្មោះចូលរួមប្រកួត ។
បច្ចុប្បន្ន គេដឹងហើយថា កម្ពុជាមានក្រុមបាល់ទះកំពូលៗចំនួន៧ គឺក្រុមបាល់ទះវិសាខា ក្រុមកងពលធំអន្តរាគមន៍លេខ៣ ក្រុមខេត្តកំពង់ចាម ក្រុមក្រសួងមហាផ្ទៃ ក្រុមសហភាពសហព័ន្ធយុវជនកម្ពុជាខេត្តព្រៃវែង ក្រុមស្នងការដ្ឋាននគរបាលខេត្តកំពង់ចាម និងក្រុមបញ្ជាការដ្ឋានអង្គរក្ស ។ ដូច្នេះចំពោះក្រុមដែលមានបំណង ចូលរួមប្រកួតអាចមកចុះឈ្មោះចាប់ពីថ្ងៃនេះរហូតដល់ថ្ងៃទី២៦ ធ្នូ ខាងមុខនេះ ។ ការប្រកួតចាប់ផ្ដើមពីថ្ងៃទី៨ មករា ដល់ថ្ងៃទី១៨ កុម្ភៈ ឆ្នាំ២០១៧ នៅរៀងរាល់ថ្ងៃសៅរ៍ និងថ្ងៃអាទិត្យ នៅលើទីលានចំនួន៥ គឺទីលានពហុកីឡដ្ឋានជាតិ ទីលានខេត្តព្រៃវែង ទីលានខេត្តកំពង់ចាម ទីលានខេត្តព្រះវិហារ និងទីលានខេត្តបាត់ដំបង ។
គួររំលឹកផងដែរថា សហព័ន្ធកីឡាបាល់ទះកម្ពុជារៀបចំឱ្យមានព្រឹត្តិការណ៍ប្រកួតនេះឡើង គឺដើម្បីជំរុញដល់វិស័យកីឡាបាល់ទះកម្ពុជាឱ្យកាន់តែមានសកម្មភាពផុលផុសខ្លាំងឡើងថែមទៀត ហើយក៏ដើម្បីស្វែងរកកីឡាករ ល្អៗមានបទពិសោធន៍ខ្ពស់សម្រាប់ត្រៀមប្រកួតកីឡាស៊ីហ្គេមលើកទី៣២ដែលកម្ពុជាទទួលធ្វើជាម្ចាស់ផ្ទះនៅឆ្នាំ២០២៣ខាងមុខនេះ ។ បច្ចុប្បន្ន វិស័យកីឡាបាល់ទះនៅកម្ពុជាហាក់បីដូចជានៅមានកម្រិតនៅឡើយបើធ្វើការប្រៀបធៀបជាមួយបណ្ដាប្រទេសជិតខាង ប៉ុន្តែសហព័ន្ធកីឡាបាល់ទះកម្ពុជា បាននិងកំពុងតែយកចិត្តទុកដាក់យ៉ាងខ្លាំងក្នុងការជំរុញឱ្យវិស័យកីឡាមួយនេះមានសកម្មភាពប្រកួតជាញឹកញាប់ទាំងនៅក្នុងប្រទេស និងក្រៅប្រទេស ៕
ចែករំលែកព័តមាននេះ