ឯកអគ្គរដ្ឋទូតរុស្ស៊ីប្រចាំប្រទេសតួកគីត្រូវបា.ញ់សម្លា.ប់កាលពីថ្ងៃទី១៩ ធ្នូ នៅទីក្រុងអង់ការ៉ា ដោយប៉ូលិសតួកគីម្នាក់ ដែលអះអាងថា ជាការសងសឹកចំពោះសោកនាដកម្មនៅទីក្រុងអាឡែប ស៊ីរី ដែលកំពុងធ្លាក់ក្នុង
ឯកអគ្គរដ្ឋទូតរុស្ស៊ីប្រចាំប្រទេសតួកគីត្រូវបាញ់សម្លាប់កាលពីថ្ងៃទី១៩ ធ្នូ នៅទីក្រុងអង់ការ៉ា ដោយប៉ូលិសតួកគីម្នាក់ ដែលអះអាងថា ជាការសងសឹកចំពោះសោកនាដកម្មនៅទីក្រុងអាឡែប ស៊ីរី ដែលកំពុងធ្លាក់ក្នុងកណ្តាប់ដៃរបបស៊ីរីទាំងស្រុងក្រោមការជួយទ្រទ្រង់របស់ក្រុងមូស្គូ ។
ឯកអគ្គរដ្ឋទូតរុស្ស៊ីរូបនេះ លោកអានដ្រេកា ឡូវ ត្រូវបាញ់សម្លាប់ជាច្រើនគ្រាប់ពេលលោកកំពុងថ្លែងសុន្ទរកថាមួយនាឱកាសបើកពិព័រណ៍សិល្បៈមួយនៅរដ្ឋធានីតួកគី ។
ប្រធានាធិបតីតួកគី លោករីស៊ីបតៃយីប អ័រដូហ្គាន និងប្រធានាធិបតីរុស្ស៊ី លោកវ្ល៉ាឌីមៀរ ពូទីន ក្នុងសេចក្តីថ្លែងការណ៍ដាច់ដោយឡែកពីគ្នាបានចាត់ទុកការធ្វើឃាតនេះជាការបង្កហេតុ ដែលសំដៅបំផ្លាញការធ្វើឱ្យមានប្រក្រតីភាពឡើងវិញនៃទំនាក់ទំនងរវាងប្រទេសទាំង២ ដែលចាប់ផ្តើមពីខែសីហាមក ក្រោយវិបត្តិការទូតធ្ងន់ធ្ងរមួយមក ។ មេដឹកនាំទាំង២បានទាក់ទងគ្នាតាមទូរស័ព្ទ ក្រោមការវាយប្រហារនេះបន្តិច ។ លោក ពូទីន មិនអត់ឱនអោយអ្នកនៅពីក្រោយខ្នងនៃខ្មាន់កាំភ្លើងបាញ់សម្លាប់អគ្គរដ្ឋទូតរុស្សី(វីដេអូ)
តាមវីដេអូអំពីឆាកវាយប្រហារផ្សាយតាមបណ្តាញសង្គម គេឃើញឃាតករស្រែកគ្រហឹមដំបូងជាភាសាអារ៉ាប់ បន្ទាប់មកជាភាសាតួកគី ខណៈឯកអគ្គរដ្ឋទូតរូបនេះដេកដួលលើដីក្បែររូបគេ ។ បុរសរូបនេះស្លៀកពាក់ខ្មៅ ហើយកាន់កាំភ្លើងខ្លីមួយដើម បានស្រែកពាក្យថា ព្រះអាល់ឡាហ៍ជាធំ ហើយស្រែកជាភាសាអារ៉ាប់ថា បណ្តាអ្នកគាំទ្រជីហាដ ចូរកុំភ្លេចស៊ីរី ចូរកុំភ្លេចអាឡែប ។ បន្ទាប់មកទៀត គេស្រែកជាភាសាតួកគី២ដងថា ពួកអ្នកចួលរួមក្នុងអំពើបិសាចនឹងត្រូវទទួលបាបកម្មម្តងមួយៗ ។
លោក HASIM KILIC អ្នកយកព័ត៌មានរបស់កាសែត HURRIYET ប្រចាំរដ្ឋធានីតួកគីហើយមានវត្តមាននៅកន្លែងកើតហេតុរៀបរាប់ប្រាប់ AFP ថា ពេលឯកអគ្គរដ្ឋទូតរូបនេះឡើងថ្លែងសុន្ទរកថា បុរសម្នាក់ស្លៀកពាក់ពណ៌ខ្មៅដំបូងបាញ់ទៅលើអាកាស បន្ទាប់មកបាញ់សំដៅឯកអគ្គរដ្ឋទូត ។
យោងតាមបណ្តាសារព័ត៌មានតួកគីថា មនុស្ស៣នាក់ទៀតក៏រងរបួសដែរក្នុងការបាញ់ប្រហារ ។
ឃាតករដែលត្រូវគេបាញ់សម្លាប់ត្រូវបានអាជ្ញាធរតួួកគីប្រាប់ថា មានឈ្មោះ MEVLUT MERT ALTINTAS ជាប៉ូលិសវ័យក្មេងអាយុ២២ឆ្នាំ ។ គេពុំទាន់ច្បាស់ក្នុងពេលភ្លាមៗថាតើប៉ូលិសរូបនេះជាអ្នកចូលរួមក្នុងកិច្ចការពារការបើកពិព័រណ៍នេះដែរឬយ៉ាងណាឡើយ ។
តាមទីភ្នាក់ងារព័ត៌មានតួួកគី DOGAN ថា ការឆែកឆេរត្រូវបានធ្វើនៅផ្ទះប៉ូលិសរូបនេះ ។ ឪពុកម្តាយ ព្រមទាំងប្អូនស្រីគេត្រូវចាប់ខ្លួន ។
ដោយបរិហារថា ជាអំពើភេរវកម្មមួយ អ្នកនាំពាក្យក្រសួងការបរទេសរុស្ស៊ី លោកស្រីម៉ារីយ៉ា ហ្សាខារ៉ូវ៉ា អះអាងថា ពួកឃាតករនឹងត្រូវទទួលការដាក់ទោស ។
កើតឆ្នាំ១៩៥៤ លោកអានដ្រេ កាឡូវ ត្រូវបានតែងតាំងជាឯកអគ្គរដ្ឋទូតប្រចាំតួកគីកាលពីខែកក្កដា ឆ្នាំ២០១៣ ។ លោកមានប្រពន្ធ និងកូនម្នាក់ ។ លោកធ្លាប់ធ្វើឯកអគ្គរដ្ឋទូតប្រចាំប្រទេសកូរ៉េទាំង២ ពិសេសធ្វើឯកអគ្គរដ្ឋទូតប្រចាំក្រុងព្យុងយ៉ាងពីឆ្នាំ២០០១ដល់២០០៦ ។
យោងតាមក្រសួងមហាផ្ទៃតួកគី ឃាតករត្រូវសម្លាប់ ។ រូបភាពនានាបង្ហាញជននេះដេកដួលលើដីពិតជាស្លាប់ ។
សហរដ្ឋអាមេរិកបានថ្កោលទោសថានេះជាអំពើហិង្សា ទោះជាមានប្រភពមកពីណាក្តី ។ ប្រមុខការទូតអឺរ៉ុប លោកស្រី FEDERICA MOGHERINI សម្តែងការក្តុកក្តួលយ៉ាងខ្លាំងចំពោះការធ្វើឃាតនេះ ចំណែកប្រធានាធិបតីបារាំង លោកហ្វ្រង់ស្វ័រហូឡង់ បានធ្វើការថ្កោលទោសយ៉ាងខ្លាំងក្លា ៕
ចែករំលែកព័តមាននេះ