លោក ពូទីន មិនអត់ឱនអោយអ្នកនៅពីក្រោយខ្នងនៃខ្មាន់កាំភ្លើងបា.ញ់សម្លា.ប់អគ្គរដ្ឋទូតរុស្សី(វីដេអូ)
យោងតាមសារព័ត៌មាន RT បានចេញផ្សាយអោយដឹងថា បន្ទាប់ពីការធ្វើឃាតលើលោកអគ្គរដ្ឋទូតរុស្សីប្រចាំតួកគី
យោងតាមសារព័ត៌មាន RT បានចេញផ្សាយអោយដឹងថា បន្ទាប់ពីការធ្វើឃាតលើលោកអគ្គរដ្ឋទូតរុស្សីប្រចាំតួកគី ដែលខ្មាន់កាំភ្លើងបាញ់សម្លាប់នៅថ្ងៃទី១៩ ខែធ្នូ ២០១៦ ប្រធានាធិបតីរុស្សី វ្ល៉ាឌីមៀ ពូទីន បានសន្យាបង្កើនយុទ្ធនាការកម្ទេចក្រុមភេរវករជ្រុលនិយម ហើយក៏ប្រកាសស្វែងរកអ្នកនៅពីក្រោយខ្នងនៃខ្មាន់កាំភ្លើង ដែលលោកមិនអត់ឱនអោយដាច់ខាត ព្រោះមានបំណងធ្វើឲ្យខូចខាតទំនាក់ទំនងរវាងរុស្សី និងតួកគី ក៏ដូចជាដំណើរការស្វែងរកសន្តិភាពនៅស៊ីរី ផងដែរ ។
នៅក្នុងកិច្ចប្រជុំបន្ទាន់មួយ លោក ពូទីន បានថ្លែងថា ឃាតកម្មនេះ គឺជាសកម្មភាពបង្កហេតុ ក្នុងគោលដៅបង្អាក់ទំនាក់ទំនងទ្វេភាគីរុស្សី-តួកគី ក្នុងការស្វែងរកដំណោះស្រាយសម្រាប់ស៊ីរី ដែលរុស្សី តួកគី អ៊ីរ៉ង់ ព្រមទាំងប្រទេសដទៃទៀត កំពុងព្យាយាមដោះស្រាយ ។ លោកបន្តថា ការឆ្លើយតបរបស់រុស្សីលើសកម្មភាពនេះ គឺការបង្កើនការប្រយុទ្ធប្រឆាំងភេរវកម្ម ។
ប្រធានាធិបតីរុស្សីលោក ពូទីន បញ្ជាក់ច្បាស់ថា «យើងត្រូវស្វែងរកអ្នករៀបចំឃាតកម្មនេះ និងអ្នកបញ្ជាជនដៃដល់ផងដែរ» គណៈកម្មាធិការស៊ើបអង្កេតរបស់រុស្សី បានចាប់ផ្ដើមការងាររបស់ខ្លួនហើយលើរឿងឃាតកម្មមួយនេះ ហើយតួកគីនឹងសហការជាមួយរុស្សីដើម្បីស៊ើបអង្កេតករណីនេះផងដែរ ។
សូមបញ្ជាក់ថា ឯកអគ្គរដ្ឋទូតរុស្ស៊ីប្រចាំប្រទេសតួកគីត្រូវបាញ់សម្លាប់កាលពីថ្ងៃទី១៩ ធ្នូ នៅទីក្រុងអង់ការ៉ា លោកអានដ្រេកា ឡូវ ត្រូវខ្មាន់កាំភ្លើងដែលជាប៉ូលិសតួកគីម្នាក់ បានបាញ់ជាច្រើនគ្រាប់ ពេលលោកកំពុងថ្លែងសុន្ទរកថាមួយនាឱកាសបើកពិព័រណ៍សិល្បៈមួយនៅរដ្ឋធានីតួកគី ។ ខ្មាន់កាំភ្លើងនោះស្រែកអះអាងថា ជាការសងសឹកចំពោះសោកនាដកម្មនៅទីក្រុងអាឡែប ស៊ីរី ដែលកំពុងធ្លាក់ក្នុងកណ្តាប់ដៃរបបស៊ីរីទាំងស្រុងក្រោមការជួយទ្រទ្រង់របស់ក្រុងមូស្គូ ។
តាមវីដេអូអំពីឆាកវាយប្រហារផ្សាយតាមបណ្តាញសង្គម គេឃើញឃាតករស្រែកគ្រហឹមដំបូងជាភាសាអារ៉ាប់ បន្ទាប់មកជាភាសាតួកគី ខណៈឯកអគ្គរដ្ឋទូតរូបនេះដេកដួលលើដីក្បែររូបគេ ។ លោក HASIM KILIC អ្នកយកព័ត៌មានរបស់កាសែត HURRIYET ប្រចាំរដ្ឋធានីតួកគីហើយមានវត្តមាននៅកន្លែងកើតហេតុរៀបរាប់ប្រាប់ AFP ថា បុរសរូបនេះស្លៀកពាក់ខ្មៅ ហើយកាន់កាំភ្លើងខ្លីមួយដើមដំបូងបាញ់ទៅលើអាកាស បន្ទាប់មកបាញ់សំដៅឯកអគ្គរដ្ឋទូត បានស្រែកពាក្យថា ព្រះអាល់ឡាហ៍ជាធំ ហើយស្រែកជាភាសាអារ៉ាប់ថា បណ្តាអ្នកគាំទ្រជីហាដ ចូរកុំភ្លេចស៊ីរី ចូរកុំភ្លេចអាឡែប ។ បន្ទាប់មកទៀត គេស្រែកជាភាសាតួកគី២ដងថា ពួកអ្នកចួលរួមក្នុងអំពើបិសាចនឹងត្រូវទទួលបាបកម្មម្តងមួយៗ ។ យោងតាមបណ្តាសារព័ត៌មានតួកគីថា មនុស្ស៣នាក់ទៀតក៏រងរបួសដែរក្នុងការបាញ់ប្រហារ ៕
ចែករំលែកព័តមាននេះ