ខេត្តកំពង់ឆ្នាំង ៖ ស្ត្រីហើមថ្គាមដោយសារដកធ្មេញដោយគ្រូពេទ្យគ្មានជំនាញនោះ កាលពីថ្ងៃទី១៤ ខែមីនា បាននាំគ្នាពីរនាក់បងប្អូនទៅកាន់មន្ទីរកិច្ចការនារីខេត្តដើម្បីថ្លែងអំណរគុណដល់លោកស្រីប្រធានមន្ទីរ ក៏ដូចជាលោកជំទាវ កែវ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង លោកជំទាវស៊ឹង ស៊ីយុត ពិសេសបំផុត គឺលោកជំទាវ ប៊ុន រ៉ានី ហ៊ុន សែន ដែលបានឧបត្ថម្ភ និងចេញថ្លៃព្យាបាលវះកាត់យកឆ្អឹងថ្គាមចេញ និងមកដល់ថ្ងៃនេះបានជាសះស្បើយហើយ។
ស្ត្រីក្រមុំចាស់ឈ្មោះអៀវ លន អាយុ៣៩ឆ្នាំ រស់នៅភូមិកោះក្របី សង្កាត់ផ្សារឆ្នាំងក្រោយពីការដកធ្មេញថ្គាមបានហើមថ្គាមយ៉ាងធំប៉ុនផ្លែត្នោត រយៈពេលជិត១០ឆ្នាំ ។ សារព័ត៌មានកោះសន្តិភាពបានចុះផ្សាយពីទុក្ខលំបាករបស់ស្ត្រីរូបនោះដែលមានជីវភាពក្រលំបាករស់នៅជាមួយបងស្រីឈ្មោះអៀវ លឹម អាយុ៤២ឆ្នាំ ។ ឆ្អឹងថ្គាមរបស់គាត់ចេះតែរីកធំជាលំដាប់ ពិសាអាហារមិនកើតទេ គឺពេលបរិភោគអាហារម្តងៗ លុះត្រាតែដេកផ្អៀង ហើយបងស្រីបញ្ចុកទើបចូលមាត់បានខ្លះ។ តាមរយៈសារព័ត៌មានកោះសន្តិភាពដែលបានចុះផ្សាយ មានសប្បុរសជនជាច្រើនបានឧបត្ថម្ភ និងខ្លះទៀតសុំនាំទៅព្យាបាល។
ព័ត៌មាននេះលេចឮដល់លោកជំទាវប៊ុន រ៉ានី ហ៊ុន សែន ហើយលោកជំទាវចាត់ឱ្យគេនាំយកស្ត្រីរូបនោះទៅព្យាបាល។ លោកជំទាវចេញសោហ៊ុយថែមទាំងឧបត្ថម្ភជាសំភារ និងថវិកា។ រហូតមកដល់ពេលនេះស្ត្រីឈ្មោះអៀវ លន បានជាសះស្បើយវិញហើយ គឺទាស់តែអត់ថ្គាមម្ខាងដែលដកចេញប៉ុណ្ណោះ។
ស្ត្រីឈ្មោះអៀវ លន បាននិយាយក្នុងឱកាសដែលទៅថ្លែងអំណរគុណដល់លោកជំទាវ កែវ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង និងលោកស្រីប៉ាល់ យឿន ប្រធានមន្ទីរកិច្ចការនារីខេត្តថា ពួកគាត់ពីរនាក់បងប្អូនមកទីនេះដើម្បីថ្លែងអំណរគុណចំពោះលោកជំទាវ លោកស្រីដែលបានជួយឱ្យគាត់បានធ្វើដំណើរទៅព្យាបាលនៅភ្នំពេញ ខណៈដែលលោកជំទាវប៊ុន រ៉ានី ហ៊ុន សែន ឱ្យនាំគាត់ទៅព្យាបាលនៅទីនោះ ។ ជាពិសេសគាត់ថ្លែងអំណរគុណយ៉ាងជ្រាលជ្រៅចំពោះទឹកចិត្តករុណារបស់លោកជំទាវប៊ុន រ៉ានី ហ៊ុន សែន ដែលជួយសង្គ្រោះរូបគាត់ឱ្យផុតពីសេចក្តីស្លាប់ ព្រោះថា បើមិនមានការព្យាបាលទេ គាត់រស់យ៉ាងយូរកន្លះខែទៀតនឹងស្លាប់ជាពុំខាន។
ស្ត្រីទាំងពីរនាក់បងប្អូនលើកដៃបួងសួងដល់វត្ថុស័ក្តិសិទ្ធិក្នុងលោកសូមជួយថែរក្សាដល់លោកជំទាវប៊ុន រ៉ានី ហ៊ុន សែន និងសម្តេចតេជោហ៊ុន សែន ព្រមទាំងក្រុមគ្រួសារឱ្យជួបតែសេចក្តីសុខ និងពុទ្ធពរទាំង៤ប្រការកុំបីឃ្លាងឃ្លាតឡើយ។ ក្នុងឱកាសនោះ លោកជំទាវ កែវ ច័ន្ទមុនី បានឧបត្ថម្ភស្ត្រីពីរនាក់បងប្អូននូវឃីត១កញ្ចប់ និងប្រាក់មួយចំនួន ៕
ចែករំលែកព័តមាននេះ