លោកស្រី ពុធ ធីតា សរសើរដល់ការលះបង់ និងឆន្ទៈកីឡាការិនីកម្ពុជា កំពុងប្រកួតពាន AFF
- ភ្នំពេញ
រាជធានីភ្នំពេញ ៖ លោកស្រី ពុធ ធីតា ប្រធានក្លិបបឹងកេត និងជាប្រធានគណៈកម្មការបាល់ទាត់
រាជធានីភ្នំពេញ ៖ លោកស្រី ពុធ ធីតា ប្រធានក្លិបបឹងកេត និងជាប្រធានគណៈកម្មការបាល់ទាត់នារីនៃសហព័ន្ធកីឡាបាល់ទាត់កម្ពុជាបានសរសើរដល់កីឡាការិនីកម្ពុជាមានឆន្ទៈខ្ពស់ ក្រោយការប្រកួតដែលក្រុមនេះបាន និងកំពុងប្រកួតក្នុងព្រឹត្តិការណ៍ AFF Women’s Championship នៅប្រទេសហ្វីលីពីន។
ក្រុមកីឡាការិនីជម្រើសជាតិកម្ពុជា នៅសល់ការប្រកួតមួយប្រកួតចុងក្រោយទល់នឹងក្រុមជម្រើសជាតិនារី ទីម័រខាងកើត នាថ្ងៃទី១៣ ខែកក្កដា ឆ្នាំ២០២២ វេលាម៉ោង៦:០០នាទីល្ងាច។
ខណៈការប្រកួតចំនួន ៣លើកកន្លងមក កម្ពុជាមាន១ពិន្ទុ ដោយចាញ់វៀតណាម ៣-០ ចាញ់មីយ៉ាន់
ម៉ា ៣-០ និងស្មើឡាវ ១-១។ ទោះយ៉ាងណា ក្រោយការប្រកួតចំនួន ៣លើកនេះ លោកស្រី ពុធ ធីតា ក្នុងនាមថ្នាក់ដឹកនាំក្រុមកីឡាការិនីទៅចូលរួមប្រកួតក្នុងពានខាងលើ បានឃើញពីការពុះពារប្រកួតទល់ប្រទេសផ្សេងៗ បើទោះដឹងថា កម្រិតបាល់ទាត់នារីកម្ពុជា ហាក់នៅមានកម្រិត ប៉ុន្តែលោកស្រីសរសើរទឹកចិត្តប្រយុទ្ធរបស់គ្រប់កីឡាការិនីក្នុងក្រុម មានខ្ពស់មែនទែន។
ថ្នាក់ដឹកនាំក្នុងក្រុមបឹងកេតរូបនេះ បាននិយាយថា ម្សិលមិញនេះ អាណិតកីឡាការិនីយើងខ្លោចចិត្ត ម្សិលមិញ២នាក់ទៅពេទ្យ ម្នាក់ប៉ះឆ្អឹងដងកាំបិត ម្នាក់ទៀតរបួសឆ្អឹងត្រគាក។ និយាយទៅ យើងមានឆន្ទៈខ្ពស់ តែកម្លាំងយើងមិនដល់គេទេ ។ កម្រិតបាល់ទាត់នារីយើង៣-៤ឆ្នាំទៀត ដឹងតែប្រហាក់ប្រហែលក្រុមខ្លាំងក្នុងតំបន់គ្រាន់តែយើងត្រូវការគាំទ្រពីមហាជនឲ្យបានខ្លាំង។ ដូចយើងដឹងស្រាប់ហើយ ពីមុនមកបាល់ទាត់នារីមិនសូវមានអ្នកចាប់អារម្មណ៍ប៉ុន្មានទេ។
លោកស្រីបន្ថែមថា «បាល់ទាត់នារីយើងត្រូវការចាំបាច់មែនទែន ការលើកទឹកចិត្តពីឪពុក-ម្ដាយរបស់កីឡាការិនី ។ ពេលយើងចេញមកប្រកួតនៅក្រៅអ៊ីចឹង យើងឃើញកីឡាការិនីគេដូចប្រុសមែនទែន ។ តែសូមសរសើរ។ ពួកគាត់ស៊ូហ្មង។ ម៉េចក៏ដោយ ចាញ់កម្លាំងគេក៏ដោយ អីក៏ដោយគាត់ប្រឹងណាស់។ ខ្ញុំពិតជាចង់នៅគាំទ្រពួកគាត់បន្តទៀត ។ និយាយដោយត្រង់ចុះ ខ្ញុំដំបូងគិតថា មកលើកទឹកចិត្តពួកគាត់តែ២ប្រកួតដំបូងទេ ព្រោះការងារច្រើន ណាមួយកូនៗនៅផ្ទះទៀត ហើយនៅនេះ មានគ្រូៗគេគ្រប់គ្រងហើយ តែដល់ពេលឃើញពួកគាត់ស៊ូអ៊ីចឹង មិនដាច់ចិត្តពីពួកគាត់ទេ។ ដូចយប់មិញ នៅពេទ្យជាមួយពួកគាត់ដល់ម៉ោង ១ ម៉ោង ២ យប់»។
ជាចុងក្រោយ លោកស្រី បានអំពាវនាវដល់សាធារណជនដែលមានកូនស្រីៗ ដែលបានស្រឡាញ់វិស័យកីឡាជួយផ្ដល់កម្លាំងចិត្ត លើកទឹកចិត្តដល់កូនរបស់ខ្លួនឲ្យបន្តប្រឹងប្រែង។ លោកស្រីដឹងថា សម្រាប់នារីដែលលះបង់មកលេងកីឡាបាន គឺប្រឈមបញ្ហាច្រើនណាស់ ពិសេសគឺគ្រួសារតែម្ដង ព្រោះលោកស្រីយល់ថា គ្រប់ក្រុមគ្រួសារមិនសូវចង់ប៉ុន្មានទេក្នុងការឲ្យកូនស្រីរបស់ខ្លួនមកលេងបាល់ទាត់នោះ ៕
ចែករំលែកព័តមាននេះ