បង្គោលព្រំដែនមួយដើម កំពុងប្រឈមធ្លាក់ចូលទឹកអូរ ក្រោយភ្លៀងធ្លាក់ជាច្រើនថ្ងៃ
- មណ្ឌលគិរី
បង្គោលព្រំដែនមួយដើម កំពុងប្រឈមធ្លាក់ចូលទឹកអូរ ក្រោយពេលមានភ្លៀងធ្លាក់ជោកជាំអស់ជាច្រើនថ្ងៃនៅស្រុកកែវសីមា ខេត្តមណ្ឌលគិរី
ខេត្តមណ្ឌលគិរី ៖ បង្គោលព្រំដែនមួយដើម កំពុងប្រឈមធ្លាក់ចូលទឹកអូរ ក្រោយពេលមានភ្លៀងធ្លាក់ជោកជាំអស់ជាច្រើនថ្ងៃនៅស្រុកកែវសីមា ខេត្តមណ្ឌលគិរី ។
បើតាមលោក នួន សារ៉ន អភិបាលស្រុកកែវសីមា បានប្រាប់អ្នកយកព័ត៌មាននាល្ងាចថ្ងៃទី១០ ខែកក្កដា ឆ្នាំ២០២២ ថា ក្រោយពីទទួលព័ត៌មាននេះ លោកបានដឹកនាំក្រុមការងារស្រុក ចុះទៅពិនិត្យ ឃើញថា ទឹកអូរបានជន់ឡើងខ្លាំង បណ្តាលឲ្យបាក់ដីមាត់ច្រាំងខាងកម្ពុជាយើង ហើយជិតដល់បង្គោលព្រំដែនដែលបានបោះរួច។
លោកអភិបាលស្រុកបន្តថា បច្ចុប្បន្នលោកបានរាយការណ៍ជូនដល់អាជ្ញាធរខេត្ត ក្នុងករណីនេះរួចរាល់ ហើយជាប៉ុណ្ណោះអាសន្ន លោកបានចាត់ក្រុមការងារ ដើម្បីយកខ្សែទាក់ចងបង្គោលកុំឲ្យធ្លាក់ចូលទឹកអូរ។ ប៉ុន្តែរហូតដល់ពេលនេះ ក្រុមការងារមិនទាន់អាចចូលទៅតំបន់នោះបានទេ ព្រោះមេឃនៅធ្លាក់ភ្លៀងខ្លាំង ម្យ៉ាងទីតាំងនោះស្ថិតនៅចំណោតភ្នំខ្ពស់ៗ ព្រៃ គ្មានផ្លូវចូលដល់នោះទេ។
សូមបញ្ជាក់ថា អភិបាលស្រុកកែវសីមា បានដឹកនាំកងកម្លាំងការពារព្រំដែន ចុះពិនិត្យភ្លាមៗនៅចំណុចបង្គោលលេខ ៦០/៣៨(១) ចំណុច UTM72079,1340735 ស្ថិតលើព្រំដែនគោកអូរហ៊ុច ព្រំប្រទល់ប្រទេសកម្ពុជា-វៀតណាម។ ក្រោយចុះទៅដល់ពិនិត្យ ឃើញថា បង្គោលលេខ៦០នេះ កំពុងរងផលប៉ះពាល់ខ្លាំង ដោយសារជំនន់ទឹកភ្លៀង ធ្វើឲ្យបាក់ដីហូរច្រោះ ខ្វះតែ ០,៤០ម៉ែត្រទៀតនឹងដល់បង្គោលហើយ៕
ចែករំលែកព័តមាននេះ