ជនសង្ស័យ៣នាក់បានធ្វើសកម្មភាពឆក់ទូរស័ព្ទពីស្ត្រីអ្នកដំណើរបានសម្រេច២លើក កាលពីពេលកន្លងទៅនេះ ហើយគេចខ្លួនរួចដោយសុវត្ថិភាពទាំង២លើក ។ ក្រោយពេលកើតហេតុភ្លាមៗនោះ នគរបាលពុំបានដឹងថា
រាជធានីភ្នំពេញ ៖ ជនសង្ស័យ៣នាក់បានធ្វើសកម្មភាពឆក់ទូរស័ព្ទពីស្ត្រីអ្នកដំណើរបានសម្រេច២លើក កាលពីពេលកន្លងទៅនេះ ហើយគេចខ្លួនរួចដោយសុវត្ថិភាពទាំង២លើក ។ ក្រោយពេលកើតហេតុភ្លាមៗនោះ នគរបាលពុំបានដឹងថាមានហេតុការណ៍នេះកើតឡើងទេ ព្រោះជនរងគ្រោះអត់បានដាក់ពាក្យបណ្តឹងឡើយ ។ ប៉ុន្តែថ្មីៗនេះ ខណៈកម្លាំងនគរបាលកំពុងល្បាត ហើយប្រទះឃើញជនម្នាក់កំពុងអង្គុយនៅហាងកាហ្វេមួយគួរឲ្យសង្ស័យ ក៏ឃាត់ខ្លួនសួរនាំ ទើបដឹងថាជាមុខសញ្ញាឆក់ទូរស័ព្ទខាងលើ និងឈានទៅឃាត់ខ្លួនបក្ខពួក២នាក់ទៀតជាបន្តបន្ទាប់ ។
នគរបាលបានឲ្យដឹងថា ការចាប់ខ្លួនជនសង្ស័យទាំង៣នាក់ បានធ្វើឡើងកាលពីថ្ងៃទី៣ ខែកក្កដា ឆ្នាំ២០២២កន្លងទៅ នៅតាមផ្លូវបេតុង ក្នុងភូមិលិចវត្ត សង្កាត់កំបូល ខណ្ឌកំបូល ៖ ១-ឈ្មោះ សុខ សុខា ហៅ ឆេះ អាយុ២២ឆ្នាំ មានទីលំនៅក្នុងភូមិតាកេរិ៍្ត សង្កាត់កំបូល ខណ្ឌកំបូល មានសារធាតុញៀននៅក្នុងខ្លួន ។ ២-ឈ្មោះ មឿន សុពិន ភេទប្រុស អាយុ១៨ឆ្នាំ មានទីលំនៅក្នុងភូមិអង្គស្នួល ឃុំពើក ស្រុកអង្គស្នួល ខេត្តកណ្ដាល មានសារធាតុញៀនក្នុងខ្លួន ។ ៣-ឈ្មោះ ប៉ោ លីហ៊ាង អាយុ១៨ឆ្នាំ មានទីលំនៅក្នុងភូមិត្រពាំងក្រសាំង ឃុំបែកចាន ស្រុកអង្គស្នួល គ្មានសារធាតុញៀនក្នុងខ្លួនទេ ។
ប្រភពដដែលឲ្យដឹងទៀតថា មុនពេលឈានដល់ការចាប់ខ្លួនជនសង្ស័យខាងលើ កម្លាំងនគរបាលខណ្ឌកំបូលបានល្បាតពួនស្ទាក់បទល្មើសនៅក្នុងមូលដ្ឋាន ។ លុះពេលទៅដល់ភូមិលិចវត្ត សង្កាត់កំបូល ខណ្ឌកំបូល បានប្រទះឃើញឈ្មោះ សុខ សុខា ហៅ ឆេះ កំពុងអង្គុយនៅក្នុងតូបលក់កាហ្វេមួយកន្លែង ។
ពេលនោះដោយមានការសង្ស័យ នគរបាលបានចូលទៅឃាត់ខ្លួននាំយកមកសាកសួរ ហើយជននេះសារភាពថា កាលពីវេលាម៉ោងប្រហែល៤និង៣០នាទីល្ងាចថ្ងៃទី៨ ខែឧសភា ឆ្នាំ២០២២ កន្លងទៅ ខ្លួននិងបក្ខពួកម្នាក់ឈ្មោះ ប៉ោ លីហ៊ាង បានធ្វើសកម្មភាពឆក់យកទូរស័ព្ទម៉ាកអុបប៉ូ១គ្រឿងពីស្ត្រី២នាក់ ដែលកំពុងជិះម៉ូតូតាមផ្លូវជាតិលេខ៤ នៅមុខតំបន់សេដ្ឋកិច្ចពិសេសភ្នំពេញ ស្ថិតក្នុងភូមិត្រពាំងគល់ សង្កាត់កន្ទោក ខណ្ឌកំបូល ។
ប្រភពដដែលឲ្យដឹងបន្តទៀតថា បន្ទាប់មកនៅវេលាម៉ោងប្រហែល១និង២០នាទីរសៀល នៅថ្ងៃទី៤ ខែកក្កដា ឆ្នាំ២០២២ កម្លាំងសមត្ថកិច្ចក៏បាននាំជនសង្ស័យខាងលើទៅស្វែងរកចាប់ខ្លួនឈ្មោះ ប៉ោ លីហ៊ាង ដែលជាបក្ខពួកបន្តទៀត ។ ពេលនោះបានប្រទះឃើញជនសង្ស័យរូបនោះកំពុងឈរនៅលើផ្លូវមុខតូបលក់សាច់ក្រកអាំង ស្ថិតក្នុងភូមិគល់ សង្កាត់កន្ទោក ក៏ឃាត់ខ្លួន រួចនាំយកទៅសាកសួរនៅអធិការដ្ឋាននគរបាលខណ្ឌកំបូល ។
ជនសង្ស័យទី២នាក់នេះបានឆ្លើយសារភាពថា កាលពីវេលាម៉ោងប្រមាណ៤និង២០នាទីរសៀលថ្ងៃទី១៥ ខែមិថុនា ឆ្នាំ២០២២ ពួកខ្លួននិងបក្ខពួកម្នាក់ទៀតឈ្មោះ មឿន សុពិន បានធ្វើសកម្មភាពឆក់យកទូរស័ព្ទម៉ាកអុបប៉ូ១គ្រឿងពីស្ត្រី២នាក់ នៅមុខខ្លោងទ្វារវត្តស្ងួនពេជ្រ ស្ថិតក្នុងភូមិស្ងួនពេជ្រ សង្កាត់កន្ទោក ។
ប្រភពពីនគរបាលបន្តថា ចំពោះស្ត្រីរងគ្រោះ ដោយការឆក់ទូរស័ព្ទទាំង២លើកខាងលើពុំត្រូវបានស្គាល់អត្តសញ្ញាណទេ ព្រោះក្រោយពេលកើតហេតុ ពួកគាត់ពុំបានដាក់ពាក្យបណ្ដឹងឡើយ ។ ក្រោយពីទទួលបានចម្លើយសារភាពរបស់ជនសង្ស័យទាំង២នាក់នេះហើយ នៅថ្ងៃទី៤ ខែកក្កដា ឆ្នាំ២០២២ នគរបាលខណ្ឌកំបូល បានទៅសហការជាមួយនឹងនគរបាលស្រុកអង្គស្នួលឃាត់ខ្លួនជនសង្ស័យឈ្មោះ មឿន សុពិន ទៀត ខណៈជននេះកំពុងស្ថិតនៅចំណុចផ្ទះសំណាក់«ហេង សំណាង» ក្នុងភូមិចុងបង្គោល ឃុំបែកចាន ស្រុកអង្គស្នួល ខេត្តកណ្ដាល ។
ក្រុមជនសង្ស័យ ត្រូវបាននាំយកទៅសាកសួរនៅអធិការដ្ឋាននគរបាលខណ្ឌកំបូល ហើយក្រោយទទួលបានចម្លើយសារភាពហើយ ក៏បានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ៕
ចែករំលែកព័តមាននេះ