រាជធានីភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន កាលពីរសៀលថ្ងៃទី៩ ធ្នូ បានសរសេរលើគណនីហ្វេសប៊ុកផ្ទាល់ខ្លួនថា ក្នុងដំណើរទស្សនកិច្ចផ្លូវការរបស់លោកប្រធានាធិបតីហ្វ៊ីលីពីន Rodrigo Duterte
រាជធានីភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន កាលពីរសៀលថ្ងៃទី៩ ធ្នូ បានសរសេរលើគណនីហ្វេសប៊ុកផ្ទាល់ខ្លួនថា ក្នុងដំណើរទស្សនកិច្ចផ្លូវការរបស់លោកប្រធានាធិបតីហ្វ៊ីលីពីន Rodrigo Duterte នៅព្រះរាជាណាចក្រកម្ពុជា រយៈពេល២ថ្ងៃ ចាប់ពីថ្ងៃទី១៣ដល់១៤ ធ្នូ ក៏នឹងមានវត្តមានកំពូលអ្នកប្រដាល់ Manny Pacquiao ផងដែរ ។
ទាក់ទងទៅនឹងដំណើរទស្សនកិច្ចនេះ លោក តែម ម៉ឺន ប្រធានសហព័ន្ធកីឡាប្រដាល់កម្ពុជា និងជាអគ្គលេខាធិការរងនៃគណៈកម្មាធិការជាតិអូឡាំពិកកម្ពុជាបានឲ្យអ្នកសារព័ត៌មានដឹងថា ស្ថាប័នកីឡាទាំង២ គឺគណៈកម្មាធិការជាតិអូឡាំពិកកម្ពុជា(NOCC) និងសហព័ន្ធកីឡាប្រដាល់ក៏នឹងរៀបចំជំនួបដាច់ដោយឡែកជាមួយនឹងកំពូលអ្នកប្រដាល់ហ្វ៊ីលីពីនរូបនេះផងដែរ ។
លោក តែម ម៉ឺន បញ្ជាក់ថា សម្ដេចតេជោនាយករដ្ឋមន្ត្រី ហ៊ុន សែន បានផ្ដល់អនុសាសន៍ដល់គណៈកម្មាធិការជាតិអូឡាំពិកកម្ពុជា និងសហព័ន្ធកីឡាប្រដាល់កម្ពុជាត្រូវរៀបចំការជួបសំណេះសំណាលជាមួយនឹងអ្នកប្រដាល់ Manny Pacquiao ។ ដូច្នេះទាំងគណៈកម្មាធិការជាតិអូឡាំពិកកម្ពុជា និងសហព័ន្ធកីឡាប្រដាល់ នឹងសហការជាមួយក្រសួងការបរទេស និងសហប្រតិបត្តិការអន្តរជាតិ ដើម្បីរៀបចំទទួលកីឡាករ Manny Pacquiao ឲ្យបានសមរម្យទៅតាមកិត្តិយសរបស់លោកហើយយើងនឹងពិភាក្សាក៏ដូចជាសុំចែករំលែកបទពិសោធន៍ស្ដីពីការអភិវឌ្ឍវិស័យកីឡាប្រដាល់ផងដែរ ។
តាមប្រភពព័ត៌មានក្នុងស្រុកមួយចំនួនបញ្ជាក់ថា ក្នុងដំណើរទស្សនកិច្ចនៅកម្ពុជានេះ លោកប្រធានាធិបតីហ្វ៊ីលីពីនRodrigo Duterte នឹងចូលគាល់ព្រះមហាក្សត្រកម្ពុជាព្រះបាទសម្ដេចព្រះបរមនាថ នរោត្ដម សីហមុនី និងជួបពិភាក្សាការងារជាមួយសម្ដេចតេជោនាយករដ្ឋមន្ត្រី ហ៊ុន សែន ហើយក៏មានការចុះអនុស្សរណៈចំនួន២ ក្នុងនោះក៏មានអនុស្សរណៈស្ដីពីវិស័យកីឡាផងដែរ ៕
ចែករំលែកព័តមាននេះ