រាជធានីភ្នំពេញ ៖ កីឡាករជ័យលាភីលំដាប់ថ្នាក់ពិភពលោកផ្នែកកីឡាប៉េតង់ ឆ្នាំ២០១៦ សុខ ចាន់មាន បានត្រឡប់មកដល់កម្ពុជាវិញហើយកាលពីយប់ថ្ងៃទី៧ ធ្នូ កន្លងមកនេះ ដោយបាននាំមកជាមួយនូវមេដាយ
រាជធានីភ្នំពេញ ៖ កីឡាករជ័យលាភីលំដាប់ថ្នាក់ពិភពលោកផ្នែកកីឡាប៉េតង់ ឆ្នាំ២០១៦ សុខ ចាន់មាន បានត្រឡប់មកដល់កម្ពុជាវិញហើយកាលពីយប់ថ្ងៃទី៧ ធ្នូ កន្លងមកនេះ ដោយបាននាំមកជាមួយនូវមេដាយមាស១គ្រឿងមកជូនជាតិទៀតផង ។
កីឡាករសុខ ចាន់មាន បានមកដល់អាកាសយានដ្ឋានអន្តរជាតិភ្នំពេញនៅវេលាម៉ោង៧និង៣០នាទីយប់ ដោយមានការរង់ចាំទទួលស្វាគមន៍យ៉ាងកក់ក្ដៅពីសំណាក់មិត្តភក្ដិ បងប្អូន ថ្នាក់ដឹកនាំជាន់ខ្ពស់របស់រាជរដ្ឋាភិបាលកម្ពុជាគឺលោកបណ្ឌិតថោង ខុន រដ្ឋមន្ត្រីក្រសួងទេសចរណ៍និងជាប្រធានគណៈកម្មាធិការជាតិអូឡាំពិកកម្ពុជា និងម៉ូតូសចំនួន១២គ្រឿងអមក្បួនរថយន្តចេញដំណើរមកកាន់ទីស្នាក់ការ គណៈកម្មាធិការជាតិអូឡាំពិកកម្ពុជាដើម្បីជួបសំណេះសំណាលជាបន្តទៀត ។
ឆ្លៀតក្នុងឱកាសនោះ លោកបណ្ឌិតថោង ខុន បានថ្លែងកោតសរសើរយ៉ាងខ្លាំងចំពោះកីឡាករសុខ ចាន់មាន ដែលបានបង្កើតនូវស្នាដៃជាប្រវត្តិសាស្ត្រមួយថ្មីទៀតសម្រាប់ជាតិមាតុភូមិកម្ពុជាយើង ។ កន្លងមកនេះ មានកីឡាការិនីតេក្វាន់ដូស៊ន សៀវម៉ី និងកីឡាការិនីប៉េតង់កែ ឡេង បានសាងប្រវត្តិសាស្ត្រឱ្យកម្ពុជាដែលមិនធ្លាប់មានអស់រយៈពេលជាច្រើនទសវត្សកន្លងមកនេះ ។ ដោយឡែកពេលនេះ កម្ពុជាកាន់តែធ្វើឱ្យពិភពលោកមានការភ្ញាក់ផ្អើលយ៉ាងខ្លាំងតាមរយៈការដណ្ដើមបានមេដាយលំដាប់ពិភពលោកជាបន្តបន្ទាប់ ។
លោក សុខ ម៉ុង ត្រូវជាឪពុកបង្កើតកីឡាករសុខ ចាន់មាន ដែលពេលនេះលោកមានវ័យជាង៧០ឆ្នាំទៅហើយនោះ បានប្រាប់កោះសន្តិភាពថា កីឡាករសុខ ចាន់មាន បានចូលហ្វឹកហាត់កីឡាប៉េតង់នៅក្នុងឆ្នាំ១៩៩៩ ហើយនៅឆ្នាំ២០០៥ បានជាប់ជាកីឡាករជម្រើសជាតិ ។ នៅក្នុងឆ្នាំ២០០៤ ធ្លាប់ចេញទៅចូលរួមប្រកួតជើងឯកពិភពលោកនៅទីក្រុងម៉ាកសី ប្រទេសបារាំង ទទួលបានមេដាយសំរឹទ្ធិលើវិញ្ញាសាប្រកួតជាក្រុម៣នាក់ទល់នឹង៣នាក់ ។ ចូលមកដល់ឆ្នាំ២០០៧ ប្រកួតកីឡាស៊ីហ្គេមលើកទី២៥នៅប្រទេសថៃ ដណ្ដើមបានមេដាយមាស១គ្រឿងលើវិញ្ញាសាវាយយកពិន្ទុ និងនៅឆ្នាំ២០០៩ បានទៅចូលរួមប្រកួតកីឡាស៊ីហ្គេមលើកទី២៩ នៅប្រទេសឡាវ ដណ្ដើមបានមេដាយមាស១គ្រឿងទៀតលើវិញ្ញាសាវាយយកពិន្ទុដូចគ្នា ។ នៅឆ្នាំ២០១៦នេះ សុខ ចាន់មាន ដណ្ដើមបានមេដាយមាសពីការប្រកួតជើងឯកពិភពលោកលើវិញ្ញាសាវាយយកពិន្ទុដែលបានរៀបចំធ្វើចាប់ពីថ្ងៃទី១ដល់ទី៤ ធ្នូ នៅទីលានPalais Des Sport Mahamasina ស្ថិតក្នុងទីក្រុងAntananarivo ប្រទេសម៉ាដាហ្គាស្កា។ លោកបានបញ្ជាក់់ថា កីឡាករសុខ ចាន់មាន ធ្លាប់ធ្វើដំណើរទៅចូលរួមប្រកួតនៅលើឆាកអន្តរជាតិជាច្រើនលើករាប់មិនអស់ ហើយទទួលបានមេដាយសរុប៣៨គ្រឿង ក្នុងនោះមេដាយមាស១៣គ្រឿង មេដាយប្រាក់១៦គ្រឿង និងមេដាយសំរឹទ្ធិ៩គ្រឿង ៕
ចែករំលែកព័តមាននេះ