ទីប្រឹក្សាក្រសួងអប់រំជំរុញឱ្យមានការដាក់បញ្ចូលកីឡាវាយកូនឃ្លីលើតុនៅក្នុងគ្រឹះស្ថានសិក្សា
- ភ្នំពេញ
រាជធានីភ្នំពេញ ៖ លោកព្រំ ប៊ុនយី ទីប្រឹក្សាក្រសួងអប់រំ យុវជន និងកីឡា បានជំរុញឱ្យមានការដាក់
រាជធានីភ្នំពេញ ៖ លោកព្រំ ប៊ុនយី ទីប្រឹក្សាក្រសួងអប់រំ យុវជន និងកីឡា បានជំរុញឱ្យមានការដាក់បញ្ចូលប្រភេទកីឡាវាយកូនឃ្លីលើតុនៅក្នុងគ្រឹះស្ថានសិក្សាឱ្យបានច្រើនតាមតែអាចធ្វើទៅបាន។
នេះបើតាមការលើកឡើងរបស់លោកនៅក្នុងឱកាសបិទការប្រកួតកីឡាវាយកូនឃ្លីលើតុក្របខណ្ខឧត្តមសិក្សានិងមធ្យមសិក្សាបច្ចេកទេសថ្នាក់ជាតិឆ្នាំ២០២២នៅក្នុងពហុកីឡដ្ឋានជាតិកាលពីព្រឹកថ្ងៃទី២៩ មិថុនា ។
លោកព្រំ ប៊ុនយី មានប្រសាសន៍បែបនេះ ដោយលោកបានកត់សម្គាល់ឃើញថា សព្វថ្ងៃគ្រឹះស្ថានឧត្តមសិក្សានិងមធ្យមសិក្សាបច្ចេកទេសមានរហូតដល់ទៅជាង១០០សាលា ប៉ុន្តែមកប្រកួតជាក់ស្ដែងមានតែ៨គ្រឹះស្ថានសិក្សាប៉ុណ្ណោះ។ ទន្ទឹមគ្នានេះដែរលោកក៏បានកោតសរសើរយ៉ាងខ្លាំងដល់កីឡាករ-កីឡាការិនីដែលបានខិតខំប្រឹងប្រែងប្រកួតអស់ពីសមត្ថភាព គោរពវិន័យបានល្អ ធ្វើឱ្យការប្រកួតមានភាពរលូនតាំងពីដើមដល់ចប់។
មិនតែប៉ុណ្ណោះ លោកក៏បានជំរុញឱ្យមានការខិតខំប្រឹងប្រែងហ្វឹកហាត់បន្ថែមទៀតទាំងអ្នកដែលដណ្ដើមបានមេដាយ និងអ្នកដែលមិនទាន់ដណ្ដើមបានមេដាយ ព្រោះថានៅមានការប្រកួតជាច្រើនទៀតទាំងកម្រិតជាតិនិងអន្តរជាតិ។ ជាពិសេសព្រឹត្តិការណ៍ប្រកួតកីឡាស៊ីហ្គេមលើកទី៣២ឆ្នាំ២០២៣សល់ពេលមិនដល់មួយឆ្នាំទៀតនោះទេ តែអ្វីដែលជាបញ្ហាសំខាន់នៅចំពោះមុខនោះគឺព្រឹត្តិការណ៍កីឡាថ្នាក់ជាតិលើកទី៣ ដែលជាការប្រកួតលើកចុងក្រោយបង្អស់មុននឹងឈានទៅដល់ការធ្វើជាម្ចាស់ផ្ទះកីឡាស៊ីហ្គេមលើកទី៣២ ។ ព្រឹត្តិការណ៍កីឡាជាតិនេះនឹងប្រព្រឹត្តទៅនៅខែវិច្ឆិកា ដែលជាវេទិការសាកល្បងលើកចុងក្រោយ ។
ពេលនោះហើយទាំងគណៈកម្មការរៀបចំការប្រកួតក៏ដូចជាប្រភេទកីឡាជាដើមគឺយើងយកគ្រប់ប្រភេទកីឡាដែលត្រូវដាក់ឱ្យប្រកួតនៅក្នុងស៊ីហ្គេមយកមកប្រកួតនៅក្នុងព្រឹត្តិការណ៍ដ៏មានសារៈសំខាន់មួយនេះទាំងអស់ ។ ដូច្នេះលោកមានការជឿជាក់ថា គណៈកម្មការរៀបចំការប្រកួតរបស់យើងអាចធ្វើបានទាំងក្នុងការប្រកួតថ្នាក់ជាតិនិងអន្តរជាតិ។
ដោយឡែក ផ្អែកតាមរបាយការណ៍របស់លោក ស៊ុន សុទ្ធារិទ្ធ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា សម្រាប់ការប្រកួតកីឡាវាយកូនឃ្លីលើតុជ្រើសរើសជើងឯកឧត្តមសិក្សានិងមធ្យមសិក្សាបច្ចេកទេសថ្នាក់ជាតិឆ្នាំ២០២២នេះ ធ្វើឡើងចាប់ពីថ្ងៃទី២៥ដល់២៩មិថុនាដោយមានគ្រឹះស្ថានសិក្សាចូលរួមចំនួន៨ ក្នុងនោះមានគ្រឹះស្ថានសិក្សាចំនួន៥ប៉ុណ្ណោះដែលដណ្ដើមបានមេដាយ។
ទី១-ពុទ្ធិកសាកលវិទ្យាល័យសម្ដេចអគ្គមហាសេនាបតីតេជោហ៊ុន សែន ដណ្ដើមបានមេដាយនាំមុខគេគឺមេដាយមាសចំនួន២គ្រឿង និងមេដាយប្រាក់ចំនួន២គ្រឿងសរុប៤គ្រឿង ។ ទី២-បណ្ឌិតសភាបច្ចេកវិទ្យាឌីជីថលកម្ពុជា ដណ្ដើមបានមេដាយមាស១គ្រឿង និងមេដាយសំរឹទ្ធ១គ្រឿង ។ ទី៣-វិទ្យាស្ថានសិក្សាដើម្បីជោគជ័យដណ្ដើមបានមេដាយមាស១គ្រឿង ។ ទី៤-ខេម អេដប៊ីសនីសស្គូល ដណ្ដើមបានមេដាយប្រាក់ចំនួន១គ្រឿង និងមេដាយសំរឹទ្ធចំនួន៣គ្រឿង និងទី៥វិទ្យាស្ថានបច្ចេកវិទ្យាកម្ពុជាដណ្ដើមបានមេដាយប្រាក់១គ្រឿង ៕
ចែករំលែកព័តមាននេះ