រាជធានីភ្នំពេញ ៖ កីឡាករ ពុទ្ធ ផនកុសល ឡើងប្រកួតនៅសង្វៀនទូរទស្សន៍អាស៊ីអាគ្នេយ៍ កាលពីថ្ងៃទី៣ ធ្នូ កន្លងមកនេះ បានរងរបួសបាក់ក្តោងច្រមុះធ្ងន់ធ្ងរត្រូវបញ្ជូនទៅព្យាបាលនៅមន្ទីរពេទ្យព្រះអង្គឌួងនោះពេលនេះកំពុងតែជួបបញ្ហាអត់មានប្រាក់ព្យាបាលរបួស ។
ពុទ្ធ ផនកុសល មានឈ្មោះដើមយីវ កុសល អាយុ២៧ឆ្នាំ ជាកីឡាកររបស់ក្លិបពុទ្ធសិរីវង្សព្រែកតាទែន បច្ចុប្បន្នស្នាក់នៅផ្ទះជួលក្នុងភូមិម័ល សង្កាត់ដង្កោ ខណ្ឌដង្កោ មានស្រុកកំណើតនៅភូមិថ្មី ឃុំបាក់ខ្លង ស្រុកមណ្ឌលសីមា ខេត្តកោះកុង មានប្រពន្ធជាកម្មការិនីរោងចក្រកាត់ដេរ និងមានកូនស្រីម្នាក់អាយុ២ឆ្នាំ ។ កន្លងមកកីឡាកររូបនេះធ្លាប់ចូលរួមប្រកួតដណ្ដើមខ្សែក្រវាត់ស្រាបៀរលីអូរដូវកាលទី១នៅស្ថានីយទូរទស្សន៍បាយ័នទទួលបានចំណាត់ថ្នាក់លេខ៤ ។
ក្រៅពីអាជីពជាអ្នកប្រដាល់ ពេលទំនេរ កីឡាករ ពុទ្ធ ផនកុសល បានទៅធ្វើជាកម្មករលីម្សៅមីឱ្យក្រុមហ៊ុនផលិតមីម៉ាម៉ានៅចំការដូង ខណ្ឌដង្កោ ដោយលីម្សៅមី១តោនកន្លះទទួលបានប្រាក់៨.០០០រៀល ។ ជាអកុសល កាលពីថ្ងៃទី៣ ធ្នូ ឆ្នាំ២០១៦ កីឡាករ ពុទ្ធ ផនកុសល បានឡើងសង្វៀនប្រកួតជាមួយកីឡាករលឿង រ៉ា ហើយបានភ្លាត់ស្នៀតនៅទឹកទី៣ដោយត្រូវមួយកែងរបស់គូប្រកួតបណ្តាលឲ្យបែកលើចិញ្ចើមនិងច្រមុះដេរចំនួន១១ថ្នេរ ព្រមទាំងបាក់ក្តោងច្រមុះដល់ខាងក្នុងត្រូវបានគ្រូពេទ្យសហព័ន្ធកីឡាប្រដាល់កម្ពុជាបញ្ជូនទៅព្យាបាលនៅមន្ទីរពេទ្យព្រះអង្គឌួង។ ពេលទៅដល់ភ្លាម គ្រូពេទ្យបានគាស់ច្រមុះផ្នែកខាងក្រៅហើយ ប៉ុន្តែតម្រូវឲ្យទៅគាស់ឆ្អឹងខ្ទង់ច្រមុះផ្នែកខាងក្នុងម្តងទៀតនៅថ្ងៃទី៧ ធ្នូ ខាងមុខនេះម្តងទៀត ។
ដោយសារតែជួបគ្រោះថ្នាក់នៅពេលប្រកួតរហូតរងរបួសត្រូវសម្រាកព្យាបាលនៅមន្ទីរពេទ្យតែអត់ប្រាក់សម្រាប់ព្យាបាលនិងហូបចុកប្រចាំថ្ងៃ កីឡាករ ពុទ្ធ ផនកុសល បានអំពាវនាវដល់សប្បុរសជនទាំងអស់ ជាពិសេសសម្តេចអគ្គមហាសេនាបតីតេជោ ហ៊ុន សែន និងលោកជំទាវកិតិ្តព្រឹទ្ធបណ្ឌិត មេត្តាជួយឧបត្ថម្ភដល់រូបគាត់ផង ។
សប្បុរសជនអាចទំនាក់ទំនងផ្ទាល់តាមរយៈលេខទូរស័ព្ទ ០៩៧ ២០១២ ៤០៦ ៕
ចែករំលែកព័តមាននេះ