រាជធានីភ្នំពេញ ៖ លោក កឹម សុខា អតីតប្រធានគណបក្សប្រឆាំងដែលត្រូវតុលាការរំលាយបានបើកទ្វារផ្ទះទទួលស្វាគមន៍អ្នកគាំទ្រជាលោកដំបូង ចាប់តាំងលោករងបណ្តឹងចោទប្រកាន់ពីទោសក្បត់ជាតិមក ។ អតីតមេដឹកនាំគណបក្សប្រឆាំងរូបនេះឈានចូលដល់វ័យ៧០ឆ្នាំ កាលពីថ្ងៃទី២៧…
រាជធានីភ្នំពេញ ៖ លោក កឹម សុខា អតីតប្រធានគណបក្សប្រឆាំងដែលត្រូវតុលាការរំលាយបានបើកទ្វារផ្ទះទទួលស្វាគមន៍អ្នកគាំទ្រជាលោកដំបូង ចាប់តាំងលោករងបណ្តឹងចោទប្រកាន់ពីទោសក្បត់ជាតិមក ។
អតីតមេដឹកនាំគណបក្សប្រឆាំងរូបនេះឈានចូលដល់វ័យ៧០ឆ្នាំ កាលពីថ្ងៃទី២៧ មិថុនាម្សិលមិញ ។ ទោះលោកស្ថិតនៅក្នុងការឃ្លាំមើលរបស់តុលាការ ប៉ុន្តែលោកបានទទួលអ្នកគាំទ្រមកពីខេត្តនានានៅក្នុងប្រទេសកម្ពុជា នៅក្នុងឱកាសខួបកំណើតរបស់លោក ។ នេះជាការបើកទ្វារផ្ទះទទួលស្វាគមន៍សកម្មជន អ្នកគាំទ្រជាលើកដំបូងក្នុងទ្រង់ទ្រាយធំដែលគេមិនធ្លាប់ឃើញ ។ តែនាពេលកន្លងមកលោកបានទទួលជួបជាមួយអង្គទូតបណ្តាប្រទេសលោកខាងលិចផងដែរ។
លោក កឹម សុខា បានសរសេរលើបណ្តាញទំនាក់ទំនងសង្គម ហ្វេសប៊ុកថា ចាប់តាំងពីម៉ោង៨:៣០នាទីព្រឹក រហូតដល់ម៉ោង៨:៣០ នាទីយប់ នៅថ្ងៃទី២៧ ខែមិថុនា ឆ្នាំ២០២២នេះនៅគេហដ្ឋានរបស់ខ្ញុំក្នុងរាជធានីភ្នំពេញ ខ្ញុំមានសេចក្តីសោមនស្សរីករាយ និងមានកិត្តិយសណាស់ ដែលបានទទួលស្វាគមន៍តំណាងប្រជាពលរដ្ឋខ្មែរដែលគាំទ្រស្រឡាញ់រាប់អានខ្ញុំចំនួន១៨ខេត្តបានមកជូនពរខ្ញុំផ្ទាល់ នៅថ្ងៃខួបកំណើតរបស់ខ្ញុំគម្រប់៦៩ឆ្នាំឈានចូល៧០ឆ្នាំ ។
លោក កឹម សុខា កើតនៅថ្ងៃ២៧ មិថុនា ១៩៥៣ ។ តាមសំណេររបស់លោក អ្នកគាំទ្រនៅខេត្តឆ្ងាយៗ ពុំបានចូលមកជូនពរលោកក្នុងឱកាសនោះទេ ។ លោកមិនបានបង្ហាញឲ្យដឹងថា នៅពេលជួបជាមួយអ្នកគាំទ្រខ្លួននោះ លោកបាននិយាយអ្វីខ្លះ ពិសេសថា តើលោកមាននិយាយពីបញ្ហានយោបាយជាមួយអ្នកគាំទ្រឬអត់?។
លោកកឹម សុខា បានត្រឹមឲ្យដឹងថា លោកបាន ថ្លែងអំណរគុណយ៉ាងជ្រាលជ្រៅបំផុតចំពោះបងប្អូនជនរួមជាតិទាំងអ្នកដែលបានមកផ្ទាល់ ក៏ដូចជា អ្នកដែលបានផ្ញើរសារជូនពរថ្ងៃខួបកំណើតលោក ។ លោកបានបញ្ជាក់ថា សូមឲ្យពរជ័យទាំងឡាយ និងកុសលផលបុណ្យដែលបងប្អូនបញ្ជូនមកឲ្យខ្ញុំនេះ ខ្ញុំសូមចែករំលែកដល់បងប្អូនជនរួមជាតិខ្មែរគ្រប់ៗគ្នាមិនប្រកាន់និន្នាការណាឡើយ ។
ឱកាសខួបកំណើតរបស់លោកកឹម សុខា ពុំឃើញមានភរិយា និងកូនៗនៅជិតលោកនោះទេ ។ ពីនាយសមុទ្រកូនស្រីរបស់លោក គឺកញ្ញា កឹម មនោវិទ្យា បានជូនពរលោកឪពុករបស់ខ្លួនពីចម្ងាយ ។
កញ្ញាសរសេរថា «កូនសូមគោរពជូនពរលោកឪពុក ក្នុងឱកាសថ្ងៃកំណើត សូមលោកជួបប្រទះតែសេចក្តីសុខពីថ្ងៃនេះតទៅ និងជំនះបាននូវឧបសគ្គទាំងឡាយក្នុងដំណើរបូជនីយកិច្ច ទាមទារ និងការពារលិទ្ធិប្រជាធិបតេយ្យនៅកម្ពុជា ។
លោក កឹម សុខា ត្រូវបានសមត្ថកិច្ចជាប់ខ្លួន កាលពីខែកញ្ញា ឆ្នាំ២០១៧ ពីបទសន្ទិដ្ឋភាពជាមួយបរទេសក្នុងការផ្តួលរំលំរដ្ឋាភិបាលកម្ពុជា ។ តុលាការបានដកហូតសិទ្ធិធ្វើនយោបាយពីលោក កឹម សុខា ផងដែរ ៕
ចែករំលែកព័តមាននេះ