រាជធានីភ្នំពេញ ៖ ព្រំ វី មកពីក្លិបតាព្រហ្មមានជ័យ និងជឹម ចិត្រា មកពីក្លិបខេត្តព្រៃវែង ដែលត្រូវបានគេរៀបចំឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ស៊ីអិនស៊ីថ្ងៃអាទិត្យ ទី៤ ធ្នូ ខានស្អែកនេះ មិនទាន់ដឹងថា មួយណាសម្រេចគោលដៅនោះទេ ដោយសារសមាសភាពកីឡាករថៃហាក់មានសមត្ថភាពមិនណយដែរនោះ ។
នេះមិនមែនជាលើកទី១នោះទេ ដែលកីឡាករកម្ពុជាទាំង២ត្រូវបានគណៈកម្មការរៀបចំការប្រកួតផ្គូផ្គងឱ្យប្រកួតជាលក្ខណៈមិត្តភាពអន្តរជាតិជាមួយកីឡាករថៃនោះ គឺមានច្រើនលើករួចមកហើយ ។ ប៉ុន្តែសម្រាប់ការប្រកួតលើកនេះ ព្រំ វី ត្រូវជួបប្រកួតជាមួយកីឡាករថៃឈ្មោះ ឃឹម ប.ស.ខ ក្នុងប្រភេទទម្ងន់៥៧គីឡូក្រាម ខណៈ ជឹម ចិត្រា ត្រូវជួបប្រកួតជាមួយកីឡាករថៃឈ្មោះ អិុតធីដេត ស.ដាន ឆ័យ ក្នុងប្រភេទទម្ងន់៦៥គីឡូក្រាម ។
ព្រំ វី ធ្លាប់ប្រកួត៦៧ដង ឈ្នះ៤៣ដងចាញ់២១ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១១ដង ។ ចំណែកកីឡាករថៃដែលជាគូប្រកួតរបស់គេវិញ ធ្លាប់ប្រកួតបាន៥១ដង ឈ្នះ៤០ដង ចាញ់៦ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បាន៥ដង ។ ដូច្នេះបើប្រៀបធៀបទៅលើប្រវត្តិប្រកួត គឺគូនេះអាចស៊ីសងគ្នាបាន គ្រាន់តែកីឡាករថៃម្នាក់នេះមិនធ្លាប់មកប្រកួតនៅស្រុកខ្មែរពីមុនមក ទើបគេមិនទាន់ដឹងថា ឃឹម ប.ស.ខ មានសមត្ថភាពខ្លាំងប៉ុនណា ។
ចំណែកជឹម ចិត្រា ធ្លាប់ប្រកួតបាន២០ដងឈ្នះ១៥ដង ចាញ់៥ដង និងធ្លាប់ផ្ដួលគូប្រកួតឱ្យសន្លប់បាន៥ដង ។ ប៉ុន្តែ ជឹម ចិត្រា គេស្គាល់ច្បាស់ថាជាជើងខ្លាំងមួយរូបដែល
មានល្បិចប្រយុទ្ធនៅលើសង្វៀនល្អគ្រាន់បើ ទម្រង់នៃការវាយចេញរបស់គេមានភាពរហ័សរហួន ថែមទាំងមានចិត្តសឿងទៀតផង ។ រីឯគូប្រកួតរបស់គេធ្លាប់ប្រកួតបាន៦៥ដង ឈ្នះ៥០ដង ចាញ់១៣ដង ស្មើ២ដង និងធ្លាប់ផ្ដួលគូប្រកួតឱ្យសន្លប់នៅលើសង្វៀនបាន៥ដង ។ ដូច្នេះជឹម ចិត្រា ប្រកួតលើកនេះមិនអាចធ្វេសប្រហែសបានឡើយ បើមិនដូច្នោះទេច្បាស់ជាស៊យធំមិនខាន ។
ដោយឡែកគូប្រកួតមិត្តភាពធម្មតាវិញមានកីឡាករ ផូ សុភាព មកពីក្លិបសាលវ័ន្តកីឡា ប្រកួតជាមួយកីឡាករ ឌុំ កែវដាំ មកពីក្លិបសុភានូមានជ័យ ។ កីឡាករ សិទ្ធ ចន្ទ្រ មកពីក្លិបសាមគ្គីកូនខ្មែរ ប្រកួតជាមួយកីឡាករ ឡុង រ៉ាមី មកពីក្លិបខ្លារខិនមានរិទ្ធ ។ កីឡាករ ផន ភឿត មកពីក្លិបឃ្លាំងមឿងកីឡា ប្រកួតជាមួយកីឡាករ សួង សុវណ្ណថា មកពីសមាគមកីឡាប្រដាល់ក្រសួងការពារជាតិ និងគូចុងក្រោយ កីឡាករ ហ៊ែល វិចិត្រ មកពីក្លិបឃ្លាំងមឿងកីឡា ប្រកួតជាមួយកីឡាករ សំអាត រ៉ាវីត មកពីក្លិបកុលបុត្រគុនខ្មែរ៕
ចែករំលែកព័តមាននេះ