ខេត្តកំពង់ឆ្នាំង៖​ ខណ្ឌរដ្ឋបាលជលផលនៃមន្ទីរកសិកម្មរុក្ខាប្រមាញ់ និងនេសាទ ខេត្តកំពង់ឆ្នាំង បានបញ្ជូនជនសង្ស័យចំនួន ២នាក់ ទៅកាន់សាលាដំបូងខេត្ត ពីបទបានប្រើប្រាស់ឧបករណ៍​ឆក់ត្រី​ដោយ​ខុសច្បាប់ ដែលបាន​ប្រព្រឹត្ត​ កាលពីយប់ថ្ងៃទី២២​ ខែមិថុនា ហើយត្រូវបានកម្លាំង​សមត្ថកិច្ចនគរបាលប៉ុស្តិ៍រដ្ឋបាលឃុំប្រឡាយមាស និងប្រជាការពារចាប់​បញ្ជូនខ្លួនឱ្យមន្ត្រី​ជលផល​។ បុរស ២នាក់នេះ ស្ថិតក្នុងចំណោម ៣នាក់ ដែលបានជិះទូក​ ឆក់ត្រី នៅបឹងទន្លេសាប។

សមត្ថកិច្ចនគរបាលប៉ុស្តិ៍រដ្ឋបាលប្រឡាយមាស បានឱ្យដឹងថា នៅយប់ថ្ងៃទី២២ ខែមិថុនា កម្លាំងនគរបាលប៉ុស្តិ៍រដ្ឋបាលសហការជាមួយប្រជាការពារបានចេញល្បាត ក៏បានជួបប្រទះនឹងអ្នកប្រព្រឹត្តបទល្មើសនេសាទ ដែលកំពុងធ្វើសកម្មភាពឆក់ត្រីចំនួន ៣នាក់ ហើយក៏បានចាប់​ឃាត់ខ្លួន បានចំនួន ២នាក់។ ចំណែកម្នាក់ទៀត បានហក់ចូលទឹក គេចខ្លួនបាត់។

ការចាប់ឃាត់ខ្លួនជនសង្ស័យខាងលើ គឺ​នៅចំណុចសាច់ស្ពៃ នៅក្នុងភូមិអន្លង់កញ្ចុះ ឃុំប្រឡាយ​មាស ស្រុកកំពង់លែង។ ជនសង្ស័យទាំង ២នាក់ មាន​ឈ្មោះ ម៉ៅ ប៉ែន អាយុ ៣៥ឆ្នាំ និង​ឈ្មោះ ថន វណ្ណៈ អាយុ ១៩ឆ្នាំ និងម្នាក់ទៀត អាយុ ១៧ឆ្នាំ បានលោតចូលទឹក គេចខ្លួនបាត់។

នៅក្នុងការបង្ក្រាបនោះ សមត្ថកិច្ចបានដកហូតវត្ថុតាង មានទូកបាឡាស្មាច់ ចំនួន ២គ្រឿង ក្បាលអាំងវ៉ាទ័រ​ឆក់ត្រីចំនួន ២គ្រឿង និងអាគុយ ២គ្រឿង។

ក្រោយធ្វើការឃាត់ខ្លួនសមត្ថកិច្ច ក៏បានបញ្ជូនទៅមន្ត្រីជំនាញទាំងយប់ ទើបនៅព្រឹកថ្ងៃទី២៣ មិថុនា​ មន្ត្រីជំនាញជលផល បានកសាងសំណុំរឿងបញ្ជូនមកកាន់តុលាការបន្ត​។

ពាក់ព័ន្ធនឹងបញ្ហានេះ លោក ងិន ហ៊ុន ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តកំពង់ឆ្នាំង បានឱ្យ​ដឹងថា បទល្មើសនេសាទ គឺជាបទល្មើសបំផ្លាញមច្ឆជាតិ​ដ៏ធ្ងន់ធ្ងរ ហេតុនេះ មិនអាចលើកលែងបានឡើយ​។

ជាមួយគ្នានេះ ក្នុងនាមលោកជាមន្ទីរជំនាញ លោក​សូមអំពាវនាវឱ្យបងប្អូនប្រជាពលរដ្ឋ បញ្ឈប់ការប្រើប្រាស់ឧបករណ៍នេសាទដោយខុសច្បាប់តទៅទៀត ដូចជា ការដាក់របាំងស្បៃមុង របាំងសាច់ សាច់អួនក្រឡាញឹក និងឧបករណ៍ឆក់ត្រី ជាដើម៕ ពៅ សុខហ៊ាន