ញូវយ៉ក ៖ តម្លៃប្រេងឆៅអន្តរជាតិបានធ្លាក់ចុះកាលពីថ្ងៃសុក្រ ខណៈទីផ្សារគ្មានភាពច្បាស់លាស់ចំពោះកិច្ចព្រមព្រៀងកាត់បន្ថយទិន្នផលនៅក្នុងចំណោមបណ្តាប្រទេសអ្នកផលិតប្រេង ។
អារ៉ាប៊ីសាអូឌីត ជាសមាជិក និងជាប្រទេសនាំចេញប្រេងកំពូលនៅក្នុងបណ្តាប្រទេសនាំប្រេងចេញ (OPEC) បាននិយាយកាលពីថ្ងៃសុក្រថា ខ្លួននឹងមិនចូលរួមក្នុងកិច្ចប្រជុំរវាងអង្គការ OPEC និងអ្នកផលិតមិនមែនសមាជិក OPEC ដើម្បីពិភាក្សាអំពីសេចក្តីលម្អិតក្នុងការកាត់បន្ថយទិន្នផលប្រេងនោះ ទេ ។ នេះបើតាមសេចក្តីរាយការណ៍របស់ប្រព័ន្ធផ្សព្វផ្សាយ ។
ក្រុមអ្នកវិភាគឱ្យដឹងថា ដំណឹងនេះ គឺជាកត្តាចម្បងដែលធ្វើឲ្យតម្លៃប្រេងធ្លាក់ចុះ ខណៈវិនិយោគិនមិនច្បាស់ថា តើអង្គការ OPEC នឹងអាចឈានដល់កិច្ចព្រមព្រៀងកាត់បន្ថយទិន្នផលប្រេងនៅចុងខែនេះ ឬយ៉ាងណា ។
អង្គការ OPEC បានឈានដល់កិច្ចព្រមព្រៀងបឋមនៅខែកញ្ញា ដើម្បីកាត់បន្ថយទិន្នផលប្រេងឆៅ ក្នុងគោលបំណងរក្សាស្ថិរភាពនៃតម្លៃប្រេងជាសកល ។ ក្រុមនេះបានកំណត់ពេលពិភាក្សាលម្អិតទៅលើកិច្ចព្រមព្រៀងនៅទីក្រុង Vienna ប្រទេស Austria នៅថ្ងៃពុធខាងមុខ ។ ប្រសិនបើកិច្ចព្រមព្រៀងនេះត្រូវបានអនុម័ត វានឹងក្លាយជាកិច្ចព្រមព្រៀងលើកដំបូងចាប់តាំងពីឆ្នាំ២០០៨មក ៕
ចែករំលែកព័តមាននេះ