ខេត្តព្រះសីហនុ ៖ ទូហ្គេមអេឡិចត្រូនិកដែលសមត្ថកិច្ចធ្វើការដកហូតបាននៅក្នុងក្រុង ខេត្តព្រះសីហនុចំនួនជាង១៥០ទូ ត្រូវបានយកទៅកម្ទេចចោល នៅរសៀលថ្ងៃទី២០ មិថុនា ក្រោមការចូលរួមពីលោក ពេញ ពិសិដ្ឋ ព្រះរាជអាជ្ញារងអមសាលាដំបូងខេត្ត, លោកឧត្ដមសេនីយត្រី ណុប បញ្ញា ស្នងការរងនគរបាលទទួលផែនការងារព្រហ្មទណ្ឌ ខេត្តព្រះសីហនុ រួមជាមួយនឹងអាជ្ញាធរមូលដ្ឋាន។
មានប្រសាសន៍នៅក្នុងឱកាសនោះលោកព្រះរាជអាជ្ញារងសាលាដំបូងខេត្តបានលើកឡើងថាដើម្បីបំបាត់នូវល្បែងស៊ីសងដែលខុសច្បាប់នៅក្នុងខេត្តព្រះសីហនុ កម្លាំងសមត្ថកិច្ចត្រូវតែធ្វើការដកហូតយកមកដុតចោល នឹងត្រូវមានការផាកពិន័យផ្ដន្ទាទោសតាមច្បាប់ផងដែរ ។ បទល្មើសល្បែងស៊ីសងទាំងអស់នេះ អាចបង្កឱ្យក្លាយទៅជាអំពើហិង្សា ការលួចឆក់ ប្លន់ និងជាកន្លែងប្រើប្រាស់ជួញដូរចែកចាយគ្រឿងញៀនពិតប្រាកដ ។
ដូច្នេះ រាល់សកម្មភាពការបើកល្បែងអត់ច្បាប់គ្រប់ប្រភេទ សមត្ថកិច្ចត្រូវតែធ្វើការបង្ក្រាប ដើម្បីភូមិឃុំមានសុវត្ថិភាពស្របតាមគោលការណ៍របស់ក្រសួងមហាផ្ទៃដូចជារាជរដ្ឋាភិបាលបានដាក់ចេញជាក់ស្ដែង ទូហ្គេមអេឡិចត្រូនិច្ចចម្រុះចំនួន១៦៣ទូ ត្រូវបានកម្ទេចចោលនៅក្នុងភូមិសាស្ត្រសង្កាត់លេខ៣ ក្រុងព្រះសីហនុ។
កម្លាំងជំនាញ នៃការិយាល័យនគរបាលព្រហ្មទណ្ឌកម្រិតធ្ងន់ បានសហការជាមួយកម្លាំងជំនាញនៃអធិការដ្ឋាននគរបាលក្រុងព្រះសីហនុ ប្រមូលឧបករណ៍ហ្គេមអេឡិចត្រូនិកខុសច្បាប់ ដែលបង្ក្រាបបានចាប់ពីអំឡុងខែមករា ដល់ខែមិថុនា ឆ្នាំ២០២២ នេះចំនួន១០ទីតាំង មកធ្វើការដុត កម្ទេចចោល នៅទីតាំងដីបឹងព្រែកទប់ ស្ថិតក្នុងភូមិ១ សង្កាត់៣ ក្រុង-ខេត្តព្រះសីហនុ ។
ចែករំលែកព័តមាននេះ